Dilo dife? Bafilipi 4:8 e re re naganišiše ka dilo tša therešo, tše di naganišišwago ka šedi, tše di lokilego, tše di sekilego, tše di rategago, tšeo go bolelwago gabotse ka tšona, tša bokwala le tše di tumišegago. Se ga se re gore Bakriste ba swanetše go no dula ba nagana ka Beibele feela. Eupša ge re nagana ka dilo tše dingwe, e swanetše go ba tšeo di kgahlišago Jehofa. Le gona dilo tšeo ga se tša swanela go re dira gore re se sa hlankela Jehofa ka dipelo tša rena ka moka.—Ps 19:14.

Go dula re nagana ka dilo tše dibotse go ka ba thata. Ka baka la’ng? Ka gobane menagano ya rena e sa phethagalago e dira gore go be bonolo go nagana ka dilo tše mpe, le gona Sathane, yena “modimo wa lefase le,” o dira gore re nagane dilo tše mpe. (2Ko 4:4) O dira gore dilo tšeo di lego thelebišeneng, radiong, inthaneteng, dikuranteng, dimakasineng le dipukung, di tšweletše dilo tšeo di gobogilego. Ka gona re swanetše go kgetha ka kelohloko dilo tšeo re di tsenyago ka menaganong ya rena, ka gobane di ka fetoša tsela yeo re dirago dilo ka yona.—Jak 1:14, 15.

BOGELANG BIDIO YEO E REGO, PHEMA SE SE SENYAGO POTEGO—BOITHABIŠO BJO BO FOŠAGETŠEGO, KE MOKA LE ARABENG DIPOTŠIŠO TŠE DI LATELAGO:

• Ngwanabo rena o be a lebelela’ng founong ya gagwe, gona seo se ile sa mo kgoma bjang?

• Lengwalo la Bagalatia 6:7, 8 le la Psalme 119:37 a mo thušitše bjang?