MAHUMO AO A LEGO KA LETŠUNG LA MODIMO | EKISODO 10–11
Moshe le Arone ba Ile ba Bontšha Gore ba na le Sebete
Moshe le Arone ba ile ba bontšha sebete ge ba be ba bolela le Farao, yoo e bego e le monna yo matla kudu lefaseng ka moka mehleng ya gagwe. Ke’ng seo se ba thušitšego gore ba be le sebete? Ge Beibele e bolela ka Moshe e re: “Ka tumelo o ile a tloga Egipita, eupša a sa boife bogale bja kgoši, gobane o ile a tšwela pele a tiile go etša ge eka o bona Yo a sa bonagalego.” (Heb 11:27) Moshe le Arone ba be ba na le tumelo e kgolo kudu go Jehofa e bile ba ithekgile ka yena.
Ke maemong afe moo go nyakegago gore o be le sebete ge o hlalosetša motho yo a nago le matla a taolo ka tumelo ya gago?
