1. Ke thapelo efe yeo e tsebjago kudu yeo ga bjale re tlago go e ahlaahla?

BATHO ba dimilione ba tseba thapelo e tsebjago kudu yeo e bitšwago Tatawešo wa magodimong goba Thapelo ya Morena. Jesu o dirišitše thapelo ye go ruta barutiwa ba gagwe kamoo ba swanetšego go rapela ka gona. O ile a rapelela dilo dife? Le gona ke ka baka la’ng thapelo ye e le bohlokwa go rena lehono?

2. Ke dilo dife tše tharo tše bohlokwa tšeo Jesu a re rutilego gore re di rapelele?

² Jesu o itše: “Ka gona, le swanetše go rapela ka tsela ye: ‘Tatago rena wa magodimong, leina la gago a le kgethagatšwe [goba, le dirwe le lekgethwa]. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.’” (Bala Mateo 6:9-13.) Ke ka baka la’ng Jesu a ile a re ruta gore re rapelele dilo tšeo tše tharo?​—Bala Tlhaloso 20.

3. Re tlo ithuta’ng ka Mmušo wa Modimo?

³ Re ithutile gore leina la Modimo ke Jehofa. Le gona re ahlaahlile seo e lego thato ya Modimo ka batho le ka lefase. Eupša Jesu o be a e ra go re’ng ge a re: “Mmušo wa gago a o tle”? Re tlo ithuta gore Mmušo wa Modimo ke eng, seo o tlago go se dira le kamoo o tlago go kgethagatša leina la Modimo ka gona.

4. Mmušo wa Modimo ke’ng, gomme Kgoši ya wona ke mang?

⁴ Jehofa o hlomile Mmušo legodimong gomme a kgetha Jesu gore e be Kgoši ya wona. Beibele e bitša mmušo wo gore ke Mmušo wa Modimo. Jesu ke “Kgoši ya bao ba  bušago e le dikgoši le Morena wa bao ba bušago e le marena.” (1 Timotheo 6:15) Jesu o kgona go dira dilo tše dintši tše dibotse go feta mmuši le ge e le ofe wa motho, e bile ke yo matla kudu go feta babuši ka moka ba batho ba kopane.

5. Mmušo wa Modimo o buša o le kae? O tlo buša bomang?

⁵ Ka morago ga matšatši a masomenne Jesu a tsošitšwe, o ile a boela legodimong. Mafelelong, Jehofa o ile a mmea gore e be Kgoši ya Mmušo woo. (Ditiro 2:33) Mmušo wa Modimo o tla buša batho ka moka mo lefaseng o le legodimong. (Kutollo 11:15) Ke ka baka leo Beibele e bitšago Mmušo wa Modimo gore ke ‘Mmušo wa legodimong.’​—2 Timotheo 4:18.

6, 7. Ke’ng se se dirago gore Jesu e be kgoši e phalago dikgoši ka moka?

⁶ Beibele e re Jesu ke yo mogolo go feta dikgoši ka moka tša batho ka gobane ke “yena a nnoši yo a sa hwego.” (1 Timotheo 6:16) Mafelelong dikgoši ka moka di a hwa, eupša Jesu a ka se tsoge a hwile. Dilo ka moka tše di kgahlišago tšeo Jesu a tlago go re direla tšona di tla ba gona ka mo go sa felego.

⁷ Boporofeta bja Beibele bo bolela gore Jesu e tla ba Kgoši yeo e ahlolago ka toka le yeo e kwelago batho bohloko. Bo re: “Moya wa Jehofa o tla dula go yena, e lego moya wa bohlale le wa kwešišo, moya wa keletšo le wa matla, moya wa tsebo le wa go boifa Jehofa; o tla thabela go boifa Jehofa. A ka se ahlole go ya ka seo a se bonago ka mahlo feela goba go fo kgalema [goba, go laya] go ya ka seo a se kwelego ka ditsebe tša gagwe. O tla ahlola babotlana [goba, badiidi] ka toko.” (Jesaya 11:2-4) Na o be o ka rata go ba le kgoši ya mohuta wo?

8. Re tseba bjang gore Jesu a ka se buše a nnoši?

⁸ Modimo o kgethile batho ba bangwe gore ba buše le  Jesu mmušong wa legodimong. Ka mohlala, moapostola Paulo o boditše Timotheo gore: “Ge e ba re tšwela pele re kgotlelela, re bile re tla buša gotee re le dikgoši.” (2 Timotheo 2:12) Ke batho ba bakae bao ba tlago go buša le Jesu e le dikgoši?

9. Ke batho ba bakae bao ba tlago go buša le Jesu? Modimo o thomile neng go ba kgetha?

⁹ Go Kgaolo 7 re ithutile gore moapostola Johane o ile a bontšhwa pono yeo go yona a ilego a bona Jesu e le Kgoši legodimong le dikgoši tše dingwe tše 144 000. Batho bao ba 144 000 ke bomang? Johane o hlalosa gore ke ‘bao ba ngwadilwego leina la Jesu le leina la Tatagwe diphatleng.’ Le gona o oketša ka gore: “Ke bao ba latelago Kwana [ke gore, Jesu] kae le kae mo e yago gona. Ba ba rekilwe gare ga batho.” (Bala Kutollo 14:1, 4.) Batho ba ba 144 000 ke Bakriste ba botegago bao Modimo a ba kgethilego go tlo “buša [le Jesu] e le dikgoši godimo ga lefase.” Ge ba ehwa, ba tsošetšwa go yo phela legodimong. (Kutollo 5:10) Ga e sa le go tloga nakong ya baapostola, Jehofa o be a dutše a kgetha Bakriste ba botegago gore e be karolo ya dikgoši tšeo tše 144 000.

10. Jehofa o ile a bontšha bjang lerato ka go rulaganya gore Jesu le ba 144 000 ba tle ba buše batho?

¹⁰ Jehofa o re rata kudu moo a ilego a rulaganya gore batho ba itšego ba tle ba buše le Jesu. Jesu o tla re buša gabotse ka gobane o a re kwešiša. O a tseba gore go bjang go ba motho le go tlaišega. Paulo o itše Jesu o re “kwela bohloko bofokoding bja rena” le gona o “[lekilwe] ka ditsela tšohle go swana le rena.” (Baheberu 4:15; 5:8) Batho ba ba 144 000 le bona ba a tseba gore go bjang go ba motho. Le gona ba ile ba tlaišwa ke go se phethagale le go babja. Ka gona re ka kgodišega gore Jesu le ba 144 000 ba ka se kwešiše feela kamoo re ikwago ka gona  eupša ba tla kwešiša le mathata ao re lebeletšanago le ona.

11. Ke ka baka la’ng Jesu a ile a ruta barutiwa ba gagwe go rapelela gore thato ya Modimo e direge legodimong?

¹¹ Jesu o ile a ruta barutiwa ba gagwe go rapelela gore thato ya Modimo e direge legodimong. Ka baka la’ng? Go Kgaolo 3 re ithutile gore Sathane Diabolo o ile a rabela go Jehofa. Ka morago ga gore Sathane a rabele, Jehofa o ile a dumelela yena le barongwa bao ba sa botegego, goba batemona, gore ba dule legodimong ka nakwana. Ka gona ga se barongwa ka moka kua legodimong bao ba bego ba dira thato ya Modimo. Go Kgaolo 10, re tlo ithuta ka mo go oketšegilego ka Sathane le batemona.

12. Ke ditiragalo dife tše pedi tše bohlokwa tšeo di hlaloswago go Kutollo 12:10?

¹² Beibele e hlalosa gore gateetee ka morago ga gore Jesu a bewe go ba Kgoši ya Mmušo wa Modimo, o be a tla lwa le Sathane. (Bala Kutollo 12:7-10.) Temana ya 10 e hlalosa ditiragalo tše pedi tše bohlokwa kudu. Ya pele ke ya gore Mmušo wa Modimo wo Kgoši ya wona e lego Jesu Kriste o thoma go buša gomme ya bobedi ke ya gore Sathane o lahlelwa lefaseng go tšwa legodimong. Re sa tlo ithuta kamoo ditiragalo tše di diragetšego ka gona.

13. Go ile gwa direga’ng legodimong ka morago ga gore Sathane a rakwe?

¹³ Beibele e hlalosa kamoo barongwa ba botegago ba ilego ba thaba ka gona ka morago ga gore Sathane le batemona ba gagwe ba rakwe legodimong. Re bala gore: “Thabang lena magodimo le bao le dulago go ona!” (Kutollo 12:12) Ga bjale kua legodimong go na le khutšo le botee ka gobane barongwa ka moka ba dira thato ya Modimo.

14. Ka ge Sathane a rakilwe legodimong, go direga’ng mo lefaseng?

 ¹⁴ Eupša bophelo mo lefaseng bo fapane kudu le bja kua legodimong. Dilo tše mpe di diragalela batho ka “gobane Diabolo o theogetše” lefaseng gomme o “galefile kudu, ka ge a tseba gore o na le nako e kopana.” (Kutollo 12:12) Sathane o galefile kudu. O rakilwe legodimong gomme o a tseba gore kgauswinyane o tlo fedišwa. O dira selo se sengwe le se sengwe se a ka se kgonago go baka mathata, dilo tše di kwešago bohloko le tlaišego lefaseng ka moka.

15. Morero wa Modimo ka lefase ke ofe?

¹⁵ Eupša morero wa Modimo ka lefase ga se wa fetoga. O sa dutše a nyaka gore batho ba phethagetšego ba phele ka mo go sa felego lefaseng la paradeise. (Psalme 37:29) Ka gona Mmušo wa Modimo o tlo dira bjang gore se se kgonege?

16, 17. Daniele 2:44 e re botša’ng ka Mmušo wa Modimo?

¹⁶ Boporofeta bjo bo lego go Daniele 2:44 bo re: “Mehleng ya dikgoši tšeo Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.” Boporofeta bjo bo re ruta’ng ka Mmušo wa Modimo?

¹⁷ Sa pele, bo re ruta gore Mmušo wa Modimo o tlo thoma go buša “mehleng ya dikgoši tšeo.” Se se bolela gore mebušo e mengwe e tla ba e sa le gona mo lefaseng ge Mmušo wa Modimo o thoma go buša. Sa bobedi, bo re ruta gore Mmušo wa Modimo o tlo buša ka mo go sa felego gomme wa se tšeelwe legato ke mmušo o mongwe. Sa boraro, go tla ba le ntwa magareng ga Mmušo wa Modimo le mebušo ya lefase le. Mmušo wa Modimo  o tlo fenya gomme ya ba wona feela o bušago lefaseng ka moka. Mafelelong batho ba tla ba le mmušo o mokaonekaone wo o sa kago wa ba gona.

18. Ntwa ya makgaolakgang ya magareng ga Mmušo wa Modimo le mebušo ya lefase le e bitšwa’ng?

¹⁸ Ke bjang Mmušo wa Modimo o tlo go tšeela mebušo ka moka ya lefase legato? Pele ga ntwa ya makgaolakgang yeo e bitšwago Haramagedone, batemona ba tla lahletša “dikgoši tša lefase ka moka go di rapela ntweng ya letšatši le legolo la Modimo Ramatlaohle.” Ee, mebušo ya batho e tla lwa le Mmušo wa Modimo.​—Kutollo 16:14, 16; bala Tlhaloso 10.

19, 20. Ke ka baka la’ng re hloka Mmušo wa Modimo gore o buše lefase ka moka?

¹⁹ Ke ka baka la’ng re hloka Mmušo wa Modimo? Ka boripana, go na le mabaka a mararo. Lebaka la pele ke gore re badiradibe, ka gona re a babja le go hwa. Eupša Beibele e re ka tlase ga Mmušo wa Modimo re tlo phela ka mo go sa felego. Ge e le gabotse, Johane 3:16 e re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”

²⁰ Lebaka la bobedi ke gore re phela le batho ba babe. Ba bantši ba bolela maaka, ga ba botege e bile ga ba na boitshwaro. Ga go na se re ka se dirago gore re ba fediše mo lefaseng, eupša Modimo yena o tla ba fediša. Batho bao ba tšwelago pele ba dira dilo tše mpe ba tla fedišwa ntweng ya Haramagedone. (Bala Psalme 37:10.) Lebaka la boraro ke gore mebušo ya batho e be e dutše e sa kgone go kgotsofatša dinyakwa tša batho, e le sehlogo e bile e sa botege. Ga e na taba le go thuša batho gore ba kwe  Modimo. Beibele e re “motho [o] buša yo mongwe gore a mo gobatše.”​—Mmoledi 8:9.

21. Mmušo wa Modimo o tlo kgonthišetša bjang gore thato ya Modimo e a direga mo lefaseng?

²¹ Ka morago ga ntwa ya Haramagedone, Mmušo wa Modimo o tlo kgonthišetša gore thato ya Modimo e a direga mo lefaseng. Ka mohlala, Mmušo woo o tla fediša Sathane le batemona ba gagwe. (Kutollo 20:1-3) Mafelelong, ga go na motho yo a tlago go babja goba go hwa. Ka baka la sehlabelo sa Jesu sa topollo, batho ka moka bao ba botegago ba tla phela ka mo go sa felego Paradeiseng. (Kutollo 22:1-3) Mmušo wa Modimo o tla kgethagatša leina la gagwe. Se se ra go re’ng? Se ra gore ge Mmušo wa Modimo o tla be o buša mo lefaseng, batho ka moka ba tla tumiša leina la Jehofa.​—Bala Tlhaloso 21.

22. Re tseba bjang gore Jesu ga se a thoma go ba Kgoši ge a be a le mo lefaseng goba gateetee ka morago ga gore a tsošwe?

²² Jesu o rutile barutiwa ba gagwe go rapela ka gore: “Mmušo wa gago a o tle.” Ka gona go be go le molaleng gore Mmušo wa Modimo o be o tla tla nakong e tlago. Jehofa o be a tla thoma pele ka go hloma Mmušo wa gagwe gomme a bea Jesu go ba Kgoši ya wona. Na Jesu o ile a bewa go ba Kgoši gateetee ka morago ga gore a boele  legodimong? Aowa, o ile a swanelwa ke go leta. Nakwana ka morago ga gore Jesu a tsošwe, Petro le Paulo ba ile ba bolela se gabotse ge ba be ba hlalosa gore boporofeta bjo bo lego go Psalme 110:1 bo šupa go Jesu. Boporofeteng bjo, Jehofa o re: “Dula ka letsogong la ka la le letona, go fihla ke bea manaba a gago e le bogato bja dinao tša gago.” (Ditiro 2:32-35; Baheberu 10:12, 13) Jesu o be a tla swanelwa ke go leta nako e kaaka’ng pele Jehofa a ka mmea gore e be Kgoši?

23. (a) Jesu o thomile neng go buša e le Kgoši ya Mmušo wa Modimo? (b) Re tlo ithuta’ng kgaolong e latelago?

²³ Mengwaga e mentši pele ga 1914, sehlopha sa Bakriste ba botegago se be se kwešiša gore woo e be e tla ba ngwaga o bohlokwa wa go phethagala ga boporofeta bja Beibele. Ga e sa le go tloga ka 1914, ditiragalo tša lefase di hlatsetše gore ba be ba nepile. Jesu o thomile go buša e le Kgoši ka wona ngwaga woo. (Psalme 110:2) Gateetee ka morago ga moo, Sathane o ile a lahlelwa lefaseng, gomme ga bjale “o na le nako e kopana.” (Kutollo 12:12) Kgaolong e latelago, re tlo bona bohlatse bjo bo oketšegilego bjo bo bontšhago gore re phela yona nakong yeo e kopana. Re tlo ithuta le gore kgauswinyane Mmušo wa Modimo o tla kgonthišetša gore thato ya Modimo e a direga mo lefaseng.​—Bala Tlhaloso 22.