Beibele e hlalosa dihlopha tše pedi tša banna ba Bakriste bao ba nago le boikarabelo ka phuthegong—“balebeledi le bahlanka ba bodiredi.” (Bafilipi 1:1) Ka tlwaelo, go na le bagolo le bahlanka ba bodiredi ba mmalwa bao ba hlankelago phuthegong e nngwe le e nngwe. Bahlanka ba bodiredi ba dira modiro ofe bakeng sa go re hola?

Ba thuša sehlopha sa bagolo. Bahlanka ba bodiredi ba na le tswalano e tiilego le Jehofa gomme ke banna ba laolwago ke matswalo a bona le ba botegago, ba bangwe ke ba banyenyane gomme ba bangwe ke ba bagolo. Ba hlokomela mediro e bohlokwa eupša gantši e le yeo e lego ya go rulaganya ka mehla le yeo e nyakago matla yeo e swanetšego go dirwa ka phuthegong. Se se nea bagolo sebaka sa go lebiša tlhokomelo boikarabelong bja go ruta le bja go diša mohlape.

Ba dira ditirelo tše bohlokwa. Bahlanka ba bangwe ba bodiredi ba abelwa go šoma e le bahlokomedi bao ba amogelago bohle bao ba fihlago dibokeng. Ba bangwe ba ka hlokomela ditlabakelo tša tša medumo, go abja ga dikgatišo, dipego tša ditšhelete tša phuthego le go abela ditho tša phuthego tšhemo yeo go ka newago bohlatse go yona. Gape ba thuša ka go hlokomela Holo ya Mmušo. Bagolo ba ka ba kgopela gore ba thuše batšofadi. Go sa šetšwe gore bahlanka bodiredi ba newa boikarabelo bofe, go ikemišetša ga bona go bo phetha go dira gore bohle ba ba hlomphe.—1 Timotheo 3:13.

Ba bea mohlala o mobotse bjalo ka banna ba Bakriste. Bahlanka ba bodiredi ba kgethwa ka baka la dika tša bona tše dibotse tša moya. Ge ba nea dipolelo dibokeng, ba matlafatša tumelo ya rena. Ba re tutuetša gore re be mafolofolo kudu ka go etelela pele modirong wa boboledi. Ka baka la moya wa bona wa tirišano, ba kgothaletša lethabo le botee. (Baefeso 4:16) Ge nako e dutše e eya, le bona ba ka swanelegela go hlankela e le bagolo.

• Bahlanka ba bodiredi ke banna ba mohuta mang?

• Bahlanka bao ba thuša bjang gore dilo di sepele ka thelelo ka phuthegong?