THUTO 26
Ke ka Baka la Eng re Welwa ke Mathata?
Gantši ge motho a welwa ke mathata o ipotšiša gore: “Kgane ke sentše’ng?” Re thaba kudu ka gore Beibele e re botša gore ke ka baka la eng re welwa ke mathata.
1. Sathane o ile a dira eng gore mo lefaseng go thome go ba le mathata?
Sathane Diabolo o ile a thoma go se sa kwa Modimo. O be a nyaka gore e be yena a bušago, ka gona o ile a dira gore batho ba mathomo e lego Adama le Efa, ba se sa kwa Modimo go no swana le yena. O ile a dira seo bjang? O thomile ka go fora Efa. (Genesi 3:1-5) O ile a dira gore Efa a nagane gore Jehofa o mo tima selo se itšego se sebotse. Ka mantšu a mangwe, o be a era gore batho ba be ba tlo thaba kudu ge ba be ba ka se kwe Modimo. Maaka a mathomo ao Sathane a a boditšego Efa ke a gore o be a ka se hwe. Ke ka baka leo Beibele e rego Sathane ke “moaketši le tatago maaka.”—Johane 8:44.
2. Adama le Efa ba ile ba kgetha go dira eng?
Jehofa o be a diretše Adama le Efa dilo tše dintši. O ile a ba botša gore ba ka ja dienywa tša sehlare se sengwe le se sengwe moo serapeng sa Edene, ntle le dienywa tša sehlare setee feela. (Genesi 2:15-17) Eupša bona ba ile ba no kgetha go ja dienywa tša sehlare seo. Beibele e re Efa o ile ‘a kga seenywa sa sehlare seo ke moka a se ja.’ Ka morago Adama o ile a no kgetha go mo latela le yena ‘a se ja.’ (Genesi 3:6) Adama le Efa ba ile ba se kwe Modimo. Ka ge ba be ba se na sebe, go be go le bonolo gore ba kwe Modimo. Eupša bona ba ile ba no kgetha go se mo kwe. Ka gona ba ile ba dira sebe, gomme ba bontšha gore ga ba nyake gore Modimo a ba botše gore ba dire eng goba ba se ke ba dira eng. Phetho yeo ba e dirilego, e ile ya ba bakela mathata a magolo.—Genesi 3:16-19.
3. Phetho yeo Adama le Efa ba e dirilego e re ama bjang?
Ka ge Adama le Efa ba ile ba se kwe Modimo, ba ile ba thoma go ba le sebe, gomme sebe seo se ile sa fetela bana ka moka bao ba ilego ba ba le bona. Beibele e re: “Go etša ge ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle.” (Baroma 5:12) Motho o tee yo go bolelwago ka yena temaneng ye ke Adama.
Bjale ke ka baka la’ng re welwa ke mathata? Go na le dilo tša go fapafapana tšeo di dirago gore re welwe ke mathata. Ka dinako tše dingwe re welwa ke mathata ka baka la diphetho tšeo re di dirago. Ka dinako tše dingwe re welwa ke mathata ka baka la diphetho tšeo di dirilwego ke batho ba bangwe. Mola ka dinako tše dingwe re welwa ke mathata ka ge re le lefelong leo go diregago kotsi.—Bala Mmoledi 9:11.
ITHUTE KA MO GO TSENELETŠEGO
Ekwa gore ke ka baka la eng Modimo e se yena a dirago gore re welwe ke mathata, le gore o ikwa bjang ge a bona re wetšwe ke mathata.
4. Ke mang yo a re bakelago mathata?
Batho ba bantši ba nagana gore Modimo ke yena a laolago lefase. Na taba ye ke nnete? Bapalang BIDIO ye.
Balang Jakobo 1:13 le 1 Johane 5:19, gomme le boledišaneng ka potšišo e latelago:
-
Na Modimo ke yena a dirago gore re welwe ke mathata?
5. Ga e sa le go tloga Sathane a thoma go laola lefase, go direga eng mo lefaseng?
Balang Genesi 3:1-6, gomme le boledišaneng ka dipotšišo tše di latelago:
-
Sathane o ile a botša Efa maaka afe?—Bona temana 4 le 5.
-
Ke’ng seo Sathane a se boditšego Efa seo se dirilego gore Efa a nagane eka go na le selo se itšego se sebotse seo Jehofa a ba timago sona?
-
Go ya ka Sathane, na re hloka Jehofa gore a re buše e le gore re thabe?
Balang Mmoledi 8:9, gomme le boledišaneng ka potšišo e latelago:
• Ka morago ga gore Adama le Efa ba dire sebe, Jehofa o ile a se sa buša lefase. Ga e sa le go tloga ka nako yeo, go direga’ng mo lefaseng?
-
Adama le Efa ba be ba se na sebe e bile ba dula Paradeiseng. Eupša ba ile ba se sa kwa Jehofa gomme ba kwa Sathane
-
Ka morago ga gore Sathane, Adama le Efa ba se kwe Modimo batho ba ile ba thoma go ba le sebe, ba welwa ke mathata le go hwa
-
Jehofa o tlo fediša mathata, sebe le lehu. Batho ba tlo boela ba ipshina ka bophelo lefaseng la Paradeise
6. Jehofa o ikwa bjang ge re welwa ke mathata?
Na Modimo o no re lebelela ge re welwa ke mathata? Ekwa gore Kgoši Dafida le moapostola Petro ba ile ba reng. Balang Psalme 31:7 le 1 Petro 5:7, gomme le boledišaneng ka potšišo e latelago:
-
Go tseba gore Jehofa o a re bona ge re na le mathata le gore o na le taba le rena, go dira gore o ikwe bjang?
7. Modimo o tlo fediša mathata ka moka
Balang Jesaya 65:17 le Kutollo 21:3, 4, gomme le boledišaneng ka potšišo e latelago:
-
Ke ka baka la’ng go thabiša go tseba gore Jehofa o tlo fediša mathata ka moka a batho?
Na o be o tseba?
Ge Sathane a be a botša Efa maaka, o ile a senya leina la Jehofa. Se se ra gore o ile a dira gore batho ba nagane gore Jehofa ke yo mobe, ga a kgone go buša le gore ga a rate batho. Ge Jehofa a tla be a fedišitše mathata, batho ka moka ba tlo tseba gore ga se yena a bego a re bakela mathata. Ka mantšu a mangwe, o tlo bontšha batho ka moka gore ke yena a kgonago go buša. Taba ya gore Jehofa ke yena a swanelegago go buša e bohlokwa kudu lefaseng le legodimong.—Mateo 6:9, 10.
BATHO BA BANGWE BA RE: “Modimo o re leka tumelo ge re welwa ke mathata.”
-
Wena o ka re’ng go batho bao?
O ITHUTILE ENG?
Sathane Diabolo, Adama le Efa, ke bona ba dirilego gore mo lefaseng go be le mathata. Jehofa o kwa bohloko kudu ge re welwa ke mathata, e bile o tlo a fediša e se kgale.
Dipotšišo
-
Ke maaka afe ao Sathane a ilego a a botša Efa?
-
Ka ge Adama le Efa ba se ba kwa Modimo, seo se re ama bjang?
-
Re tseba bjang gore Jehofa o kwa bohloko ge re welwa ke mathata?
ITHUTE KA MO GO OKETŠEGILEGO
Ekwa gore Beibele e re sebe ke eng.
Bala ka mo go oketšegilego ka taba yeo Sathane a ilego a e bolela ka Jehofa tšhemong ya Edene.
“Ke ka Baka la Eng Modimo a Dumelela Tlaišego?” (Morokami wa January 1, 2014.)
Ekwa dikarabo tše di kgahlišago tša potšišo e latelago:
Ekwa gore ke eng seo monna yo mongwe a ilego a ithuta sona ge a be a wetšwe ke mathata.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
