GO THOMA POLEDIŠANO
THUTO 3
Bontšha Botho
Molao wa motheo: “Lerato . . . le botho.” —1 Bakor. 13:4.
Seo Jesu a se Dirilego
1. Bogela BIDIO goba o bale Johane 9:1-7, ke moka o leke go hwetša dikarabo tša dipotšišo tše di latelago:
-
Na Jesu o ile a thoma ka go fodiša monna yo a foufetšego di sa tloga fase, goba o ile a thoma ka go mmotša ditaba tše dibotse?—Bona Johane 9:35-38.
-
O nagana gore ke’ng seo se ilego sa dira gore monna yoo a theetše Jesu?
Seo re Ithutago Sona go Jesu
2. Ge batho ba bona gore re na le taba le bona mohlomongwe ba ka theetša molaetša wa rena.
Ekiša Jesu
3. Ipee maemong a motho yoo o bolelago le yena. Leka go nagana gore a ka ba a ikwa bjang.
-
Ipotšiše gore: ‘A ka ba a tshwenyegile ka eng? Nka dira eng gore a thabe?’ Go ipotšiša dipotšišo tše go tla go thuša gore o bontšhe motho yoo botho.
-
Theetša motho yo o boledišanago le yena go bontšha gore o na le taba ka seo se mo tshwenyago. Ge motho a go botša kamoo a ikwago ka gona ka selo se itšego goba a go botša bothata bjoo a lebeletšanego le bjona, mo theetše, go e na le gore o bolele le yena ka taba e fapanego. Go dira bjalo go tla bontšha gore o na le taba le seo a tshwenyegilego ka sona.
4. Bolela ka botho le ka tlhompho. Tsela yeo o bolelago le motho ka yona e tla bontšha gore o mo kwela bohloko e bile o tloga o nyaka go mo thuša. Kgetha mantšu gabotse ge o bolela le yena, bolela le yena ka botho, gomme o pheme go bolela dilo tšeo di ka mo kgopišago.
5. Thuša motho yoo o boledišanago le yena. Leka go nagana gore o ka thuša motho yoo bjang. Ge re bontšha batho ba bangwe botho go tlo ba bonolo gore ba re theetše.
