Bana Babo Rena ba Rategago:

Morago kua lekgolong la bošupa la mengwaga B.C.E., moporofeta Hesekiele o ile a bona pono e makatšago. O ile a bona koloi e kgolokgolo, e lego koloi ya legodimong, e laolwa ke Mmuši wa legohle. Selo se se kgahlišago kudu ka koloi ye ke tsela yeo e bego e sepela ka yona. E be e kitima ka lebelo la legadima, le ge e be e leba lehlakoreng le lengwe—e be e sa fokotše lebelo goba gona go retologa!—Hesek. 1:4, 9, 12, 14, 16-27.

Pono yeo e re gopotša gore karolo ya legodimong ya mokgatlo wa Jehofa wa legohle e dula e gatela pele. Go thwe’ng ka karolo ya lefaseng? Ngwaga o fetilego wa tirelo o bontšhitše gabotse gore Jehofa o sepediša batho ba gagwe bao ba rulagantšwego ba mo lefaseng ka lebelo le le makatšago!

Mo United States, ditho tša lapa la Bethele di be di swaregile ka go tšwa Brooklyn di hudugela ntlongkgolo e mpsha ya lefase kua Warwick, New York, le go hudugela meagong e mengwe ya Bethele gotee le tšhemong. Ditho tša Bethele tšeo di lego makaleng a mantši lefaseng ka moka le tšona di swaregile ka go aga, go mpshafatša le go hudugela mafelong a mafsa. Go thwe’ng ka wena? Gaešita le ge o be o sa swarega ka go huduga, ga go pelaelo gore le wena o be o swaregile ka ditsela tše dingwe.

 Sehlopha se Bušago se kgongwa kudu le go kgothatšwa ke go bona gore batho ba Modimo lefaseng ka moka ba be ba swaregile kudu go feta le ge e le neng pele ge ba le gare ba sepela ka mošito o tee le mokgatlo wa Jehofa. Ba bantši ba hudugetše go ya go hlankela moo go nago le tlhokagalo. Ba bangwe ba tsenetše mehuta e mengwe ya tirelo, e bjalo ka go hlankela tšhemong ya leleme lešele. Ba bangwe ba thomile go leka sebopego se sefsa sa go nea bohlatse seo ba bego ba sa se tsebe e bile ba sa se tlwaela. Ba bangwe ba bantši ba okeditše tirelo ya bona ka ditsela tše dingwe. Le gona Bakriste ka moka ba botegago, go akaretša le batšofadi le bao ba babjago, ba kitima lebelo la bophelo ka go botega—ba swaregile tirelong ya Jehofa gomme ka go dira bjalo ba thuša go pepentšha Sathane e le moaketši!—1 Bakor. 9:24.

 Kgonthišegang gore Jehofa o bona moya wo le o bontšhago. (Baheb. 6:10) Moya wa lena wa boikgafo o dira gore re nagane ka Aborahama le Sara. Ge Aborahama a be a le mengwageng ya gagwe ya bo-70, o ile a huduga motseng wa Bakaladea wa Uri gomme a iša lapa la gagwe nageng ya kgole ya Kanana, moo a bego a tla phela mengwaga e mengwe e lekgolo a le ditenteng. Ruri yena le mosadi wa gagwe ba tloga ba bontšhitše moya wa boikgafo!—Gen. 11:31; Dit. 7:2, 3.

Na le wena o bontšha moya o bjalo? Lena ka moka bao le kgotleletšego ka potego mehleng ye e thata, le dira seo Jesu a re boditšego gore re se dire. O itše: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa.”—Mat. 28:19.

Le gona go diriša ga Jesu lentšu le le rego “eyang” go bontšha gore re swanetše go gatela pele, re be mafolofolo. Ruri go a thabiša go bona dilo tše dintši tšeo di fihleletšwego ke balatedi ba Kriste ba fišegago ngwageng o fetilego! Go bonolo go bona gore seatla sa Jehofa se matla se be se dutše se šegofatša modiro wa go bolela ditaba tše dibotse tša Mmušo ditšhabeng ka moka.—Mar. 13:10.

Ba bantši ba arabela molaetšeng. Tlhora ya bagoeledi ya ngwagola e bile 8 340 847, mola ka kakaretšo kgwedi le kgwedi go ile gwa swarwa dithuto tša Beibele tše 10 115 264. Ruri go molaleng gore koloi ya legodimong e a kitima, gomme go bjalo le ka lena! Tšwelang pele ka modiro wa lena o mobotse nakong ye e kopana yeo e šetšego, pele Jehofa a tswalela mojako wo o lebišago phološong.

Ruri ke mo go swanetšego ge temana ya rena ya ngwaga ya 2017 e le e rego, “Bota Jehofa, o dire tše dibotse”! (Ps. 37:3) Ge le ekwa mantšu ao, le dira tše dibotse ka go direla  Jehofa tirelo e kgethwa, le bontšha gore le a mmota. Hle dulang le gopola gore le ka mohla ga le noši. Mantšu a Jesu e tla dula e le a therešo ge a re: “Tsebang gore ke na le lena matšatši ka moka go fihla bofelong bja tshepedišo ya dilo.”—Mat. 28:20.

Kgonthišega gore Jehofa o tla dula a šegofatša go mo hlankela ga gago ka potego. Go sa šetšwe gore seo o mo direlago sona ke se segolo goba se senyenyane, sa bohlokwa go Jehofa ke gore o mo nea sohle seo o ka se kgonago e bile o dira seo ka maikemišetšo a mabotse. Dimpho tše bjalo ka moka di kgoma pelo ya gagwe gomme di dira gore a go amogele. (2 Bakor. 9:6, 7) Ka gona, tšwela pele o batamela kgauswi le Tatago yo lerato ka go dula o rapela, o ithuta Lentšu la Modimo, o e ba gona dibokeng tša Bokriste le go tšea karolo ka mafolofolo bodireding.

Go fihlela ge “nako [ye] e kopana” yeo e šaletšego Diabolo e fela, lerabele leo le kgopo le ikemišeditše go diriša mekgwa ka moka yeo e lego gona go re aroša tseleng ya rena ya go dula re sa šišinyege go botegeleng ga rena Jehofa. (Kut. 12:12) Dula o le kgauswi le Jehofa, gomme Diabolo o tla palelwa maitekong a gagwe ka moka. (Ps. 16:8) Hle tsebang gore re le rata kudu le go leboga thušo ya lena go hlokomeleng dikgahlego tša Mmušo wa Morena mehleng ye ya bofelo.

Bana babo lena,

Sehlopha se Bušago sa Dihlatse tša Jehofa