Bana babo rena le dikgaetšedi ga se ba ka ba boifa, gomme ba ile ba tšwela pele ba bokana. Bagolo ba be ba gata megato ya tšhireletšo ka bohlale gore ba šireletše bagoeledi. Ngwanabo rena André Carbonneau, e lego ramolao wa mo-Canada yo a bego a lwela bana babo rena mengwageng yeo, o gopola ka gore: “Gantši ngwanabo rena o be a ema kgauswi le moo seboka se bego se swarelwa gona a swere selefouno. Ge a be a ka bona sehlopha sa bahlolampherefere se etla, gateetee o be a lemoša bagolo ka tlhaselo yeo e ka bago gona.”

Ka morago ga tlhaselo e nngwe le e nngwe, baemedi ba babedi bao ba tšwago ofising ya lekala ba be ba etela bana babo rena gore ba ba matlafatše. André o re: “Se se makatšago ke gore gantši baemedi ba go tšwa lekaleng ba be ba hwetša bana babo rena le dikgaetšedi ba tletše lefelong la seboka ba thabile.”

Bao ba bego ba sa kgongwe ke ditlhaselo tšeo ka go lebanya, go akaretša barutwana ba Beibele, le bona ba be ba ikemišeditše go se boife. André o gopola a boledišana le mosadi  yo a bego a swanelega go ba mogoeledi yo a sa kolobetšwago. Mosadi yoo o ile a botša André gore: “Ge ke be ke bogetše ditlhaselo tšeo thelebišeneng, ke bone phapano magareng ga Bakriste ba therešo le ba maaka, gomme ke nyaka go ba Mokriste wa therešo.”

Mengwageng yeo ya mathata, bagoeledi ba ile ba bontšha tumelo yeo e beago mohlala le go bontšha sebete ka go dula ba swaregile modirong wa boboledi. Bao ba bego ba lwela badumedigotee le bona dikgorong tša tsheko ba ile ba bontšha tumelo e swanago.

 Gantši Dihlatse di be di sa bolelwe gabotse dipegong tša ditaba, go thwe di thuba malapa, di gana kalafo le gore di thulana le Mmušo. Boramolao bao ba bego ba lwela Dihlatse ba be ba bea botumo le mošomo wa bona kotsing.

John Burns yo e lego ramolao wa lekaleng la Canada, yo a bego a thuša bana babo rena ba Georgia mengwageng yeo, o gopola ka gore: “Bana babo rena le dikgaetšedi ba [Georgia] bao ba bego ba šoma e le boramolao ba be ba thuša. Go sa šetšwe gore ba be ba ka loba mešomo ya bona, ba be ba sa tšhabe go ya kgorong ya tsheko gomme ba itsebiše gore ke  Dihlatse tša Jehofa.” Dihlatse tšeo tše di ilego tša bontšha sebete di ile tša tsenya letsogo “go lweleng le go theeng ka molao ditaba tše dibotse.”—Bafil. 1:7.

Go sa dutše go le bjalo, Dihlatse di ile tša tšwela pele di tlaišwa ka bošoro. Ka baka leo, go thoma ka di-8 tša January, 2001, Dihlatse di ile tša phatlalatša kgopelo ya gore di šireletšwe tlhaselong ya dihlopha tša bahlolampherefere le gore go swarwe bao ba bego ba tlaiša badudi bao ba nago le khutšo.

Ngwanabo rena Burns o hlalosa morero wa kgopelo yeo ka gore: “Morero wa rena e be e le go bontšha gore batho ba bantši ba Georgia ba be ba le kgahlanong le bošoro bjo bo bego bo dirwa Dihlatse tša Jehofa le gore bošoro bjoo bo be bo bakwa ke sehlotswana sa bao ba fišegelago bodumedi ka mo go feteletšego.”

 Lebakeng la dibeke tše pedi feela, batho ba bagolo ba 133 375 bao ba tšwago dileteng ka moka tša Georgia—bao bontši bja bona e bego e le ba Kereke ya Orthodox—ba ile ba saena kgopelo yeo. Le ge kgopelo yeo e ile ya išwa go Mopresidente Shevardnadze, bošoro ga se bja ka bja kgaotša. Batho bao ba fišegelago bodumedi ka mo go feteletšego ba ile ba tšwela pele ba tlaiša Dihlatse ka boomo.

Ka nako e swanago, Jehofa o ile a tšwela pele a šegofatša batho ba gagwe. Le ge batho bao ba fišegelago bodumedi ka mo go feteletšego ba be ba tshwenya batho ba Modimo, Jehofa Modimo o be a ntšha batho ba bantši ba dipelo tše di botegago bodumeding bja maaka.

Babilina Kharatishvili e bile setho se mafolofolo sa Kereke ya Orthodox ya Georgia ka nako e telele. Ge a be a le mengwageng ya bo-30, o be a eya ditoropong le metsaneng a ruta batho ka maphelo a bakgethwa.

Eupša Babilina o be a nyaka go tseba mo go oketšegilego ka Modimo. Ka gona o ile a phetha ka go tsenela dithuto sekolong sa boruti sa Orthodox sa Georgia. Lebakeng le lengwe, moruti o ile a bontšha batheetši ba gagwe puku ya Tsebo e Išago Bophelong bjo bo sa Felego gomme a ba kgothaletša gore ba ikhweletše kopi ya yona go Dihlatse tša Jehofa. O ile a ba botša gore: “Puku ye e ka le ruta dilo tše dintši ka Beibele.”

Babilina o ile a tlabega. Ka mehla o be a phema Dihlatse, eupša ga bjale moruti o be a ba kgothaletša gore ba hwetše dipuku tša tšona! O ile a ipotšiša gore: ‘Ge e ba ke swanetše go rutwa ke Dihlatse tša Jehofa ka Modimo, gona ke dira’ng mo?’ Gateetee o ile a ikgokaganya le Dihlatse tša motseng wa Poti gomme a thoma go ithuta Beibele.

 Ge Babilina a le gare a ithuta dilo tše dintši ka Beibeleng, o ile a dira diphetogo tše dikgolo bophelong bja gagwe. Lekgeng le lengwe o kile a re: “Ge ke be ke iponela ka mahlo a ka gore Beibele e re go rapela diswantšho go fošagetše, ke ile ka lahla mehuta ka moka ya borapedi bja medimo ya diswantšho. Ke be ke kgodišegile gore go dira bjalo go nepagetše.” O ile a kgetha go ba Hlatse ya Jehofa go yela bofelong bja mengwaga ya gagwe ya bo-70.

Ka manyami, ka 2001, Babilina o ile a lwala gomme a hlokofala pele a ka kolobetšwa. Lega go le bjalo, ka morago motlogolo wa gagwe e lego Izabela o ile a kolobetšwa gomme gona bjale o hlankela Jehofa ka potego.

Eliso Dzidzishvili o be a na le mengwaga e 28 ge a be a dira phetho ya go ba moitlami. Ka ge go be go se na lefelo la baitlami kgauswi le toropo ya gabo ya Tkibuli, o ile a hudugela Tbilisi ka 2001. Ge a le gare a nyakana le sekgoba lefelong la baitlami, o ile a šoma mošomo wa nakwana e le morutiši wa  phoraebete. Yo mongwe wa barutwana ba gagwe e be e le morwedi wa kgaetšedi yo a bitšwago Nunu.

Eliso o anega ka gore: “Re be re fela re bolela ka Beibele. Ke be ke emelela bodumedi bja Orthodox ka bogale, mola Nunu a be a mpontšha ditemana tša Beibele ka go latelelana ga tšona a sa fele pelo. Ka letšatši le lengwe, o ile a ithaopela go mpalela poroutšha ya Ke Eng Seo Modimo a se Nyakago go Rena? Ge re le gare re bala dirapa e bile re bala le ditemana tša Beibele, ke ile ka lemoga gore go rapela diswantšho go thulana le molao wa Modimo.”

Ka morago, Eliso o ile a ya kerekeng ya lefelong leo gomme a botšiša moruti dipotšišo tše itšego. Dikarabo tša moruti di be di bontšha gore dithuto tša kereke ga se tša thewa Beibeleng. (Mar. 7:7, 8) E le ge a kgodišegile gore o hweditše therešo, o ile a thoma le semeetseng go ithuta Beibele le Dihlatse tša Jehofa gomme go se go ye kae a kolobetšwa.

Ka 2001, diphuthego tše dintši di be di nyaka mafelo a maleba a borapedi. Go ya ka tšhišinyo e nngwe, go be go nyakega Diholo tša Mmušo tše 70. Ka gona, go sa šetšwe kganetšo yeo e bego e le gona nageng yeo, go ile gwa thongwa lenaneo la go aga Diholo tša Mmušo.—Esera 3:3.

Go se go ye kae, sehlopha sa go aga se ile sa thoma go tsošološa moago woo o bego o dirišwa ke diphuthego tše mmalwa tša Tbilisi. Kapejana go ile gwa latela mediro e mebedi ya go aga—o mongwe o be o le kua Tbilisi gomme o mongwe o le kua Chiatura, ka bodikela bja Georgia.

Ngwanabo rena Tamazi Khutsishvili, yo a bego a šoma moagong wa kua Chiatura, o gopola gore: “Letšatši le lengwe le le lengwe, re be re šoma re le ba 15 setsheng seo. Go se go ye kae ke ge batho bohle toropong ba tseba gore re aga holo. Ka dinako tše dingwe re be re ekwa mabarebare a gore baganetši ba rena ba be ba nyaka go tlo senya Holo ya Mmušo.”

Modiro wa go aga o be o tla atlega bjang ka ge go be go na le kganetšo? Tamazi o re: “Re ile ra tšwela pele ka modiro wa rena gomme ra fetša go aga Holo ya Mmušo ka dikgwedi tše  tharo. Le ge go be go na le ditšhošetšo, ga go na baganetši bao ba ilego ba tla.” *

Ka October 2003, go ile gwa thongwa modiro wa go aga motseng wa Samtredia. Le gona moo, batho bao ba fišegelago bodumedi ka mo go feteletšego ba ile ba tšhošetša bana babo rena ba moo. Ge e le gabotse, ge baganetši ba etla go tlo phušola moago, maboto a be a sa tšwa go emišwa gomme taka e sa le meetse.

Lega go le bjalo, ka November 2003, kua Georgia go bile le tiragalo e nngwe yeo e ilego ya tlišetša bana babo rena le dikgaetšedi kimologo. Mmušo o mofsa o ile wa dira gore  madumedi a kgotlelelane. Ka baka leo, ditho tše dintši tša sehlopha sa Kereke ya Orthodox tšeo di fišegelago bodumedi ka mo go feteletšego tšeo di bego di hlasela Dihlatse tša Jehofa di ile tša golegwa.

Ka moragonyana ga gore tlaišo e fele, batho ba Jehofa ba Georgia ba ile ba hwetša ditšhegofatšo tše dintši tša moya. Kopanong ya selete ya 2004, go ile gwa lokollwa Phetolelo ya Lefase le Lefsa ya Mangwalo a Bakriste a Segerika ka Segeorgia.

Ke moka, kopanong ya Selete ya 2006 ya “Tlhakodišo e  Kgaufsi!” go bile le tiragalo e nngwe yeo e sa lebalegego. Batlakopanong ba be ba thabile kudu ge ba botšwa gore Geoffrey Jackson yo e lego setho sa Sehlopha se Bušago o tla bolela le batheetši. Le gona ba ile ba makatšwa ke ge Ngwanabo rena Jackson a tsebiša ka go lokollwa ga Beibele e feletšego ya Phetolelo ya Lefase le Lefsa ya Mangwalo a Makgethwa ka Segeorgia!

Batlakopanong ba bantši ba ile ba sekiša megokgo ya lethabo. Kgaetšedi yo mongwe o itše: “Ga ke kgone go hlalosa lethabo leo ke ilego ka ba le lona nakong ya ge re be re amogela Beibele e feletšego. . . . E be e tloga e le tiragalo ya histori.” Batho ba fetago ba 17 000 ba ile ba thabela monyanya wo wa moya, woo e bilego tiragalo yeo e sa lebalegego historing ya batho ba Jehofa ba Georgia.