Tšhemo ya maleme a šele ya kua Jeremane e oketšegile ka baka la bafaladi ba bantši kudu bao ba tlilego nageng yeo. Dikgweding tše senyane tša morago bjale, go ile gwa thongwa dihlopha le dihlotswana tše 229 tša maleme a šele. Bagoeledi ba e ka bago ba 800 ba tsena diklase tše e ka bago tše 30 tša maleme a 13.

Bana babo rena ba dira boboledi go bafaladi mafelong ao bafaladi ba dulago go ona. Bana babo rena ba sepedišitše dikgatišo tše e ka bago tše 640 000 ba diriša diteroli tša dikgatišo mafelelong a fetago a 200.

 Sehlopha se Bušago se ile sa dumelela lesolo le kgethegilego la go dira boboledi go tloga ka May go fihla ka July 2016. Bagoeledi ba e ka bago ba 700 ba ba bolelago Searaba bao ba tšwago dinageng tše šupa, ba ile ba ya mafelong a lesome kua Aus-tria le Jeremane go yo bolela ka Beibele le dihlopha tša batho ba bantši bao ba bolelago Searaba bao ba dulago moo.

Bagoeledi ba 50 ba Phuthegong ya Faber’s Road Kriol kua Belize gantši ba sepela ka maoto ge ba nea bohlatse tšhemong ya gabo bona. Bana babo rena ba bantši ba moo ga ba na sa bona, eupša ba tsoma dibaka tša go bontšha moya wa go nea. Mengwageng e mentši e fetilego, bana babo rena ba ile ba thoma go topa tšhelete ya tšhipi yeo ba e hwetšago ditseleng tša mabu ge ba le gare ba bolela ditaba tše dibotse ka ntlo le ntlo. Ga e sa le go tloga ka nako yeo, mafelelong a ngwaga ba a bokana gore ba hlatswe tšhelete yeo ba e topilego, ba e hlaole le go e bala.

Gaešita le ge bontši bja ditšhelete tša tšhipi e le tša boleng bja tlasana (seripagare sa sente ya United States), fela ngwaga le ngwaga ba kgoboketša ditšhelete tša tšhipi tšeo di dirago mo e ka bago R3,000.00. Bana babo rena ba diriša seripagare sa tšhelete yeo go thuša go lefelela ditshenyagalelo tša Holo ya Mmušo, gomme seripagare se sengwe ba se romela bakeng sa go thekga modiro wa lefase ka bophara.

E nngwe ya ditiragalo tše dikgolo kudu historing ya dilo tša Pušo ya Modimo kua Burundi e diregile ka di-5 tša March 2016, nakong ya ketelo ya lekala yeo e bego e swerwe ke Ngwanabo rena Anthony Griffin, yo e lego moemedi wa ntlongkgolo. Lenaneo ka moka le le kgethegilego leo le bego le swaretšwe diphuthego le ile la gašwa nageng ka moka seteišeneng se segolo sa naga sa radio. Go ile gwa akanyetšwa gore batho bao  ba bego ba theeditše e be e le ba e ka bago ba dimilione tše nne!

Kgašo ya radio e ile ya nea bohlatse bjo bogolo, gomme batho ba bantši ba ile ba bolela dilo tše di kgahlišago ka yona. Yo mongwe wa bašomi ba seteišeneng sa radio yo a bego a thuša kgašong yeo o itše: “Le swanetše go dira mananeo a mantši a swanago le le!” Mošomi yo mongwe wa seteišeneng seo sa radio o ngwadile gore: “Ke le kgothaletša gore le tšwela pele [le tšweletša mananeo a swanago le le], ao go se nago pelaelo gore a tla phološa maphelo a mantši.” Lenaneo le le be le bapalwa radiong ka dipeseng le dithekising tše dintši.

Letšatšing la pele ga Segopotšo ka 2016, bana babo rena bao ba lego sehlopheng se senyenyane seo se lego lekatana sa kua Nepal, ba ile ba tshwenyega ge ba ekwa gore go be go tlo ba le khonsate e kgolo ya mmino sekolong seo se lego kgauswi le holo yeo ba bego ba e hirile.

Dikhonsate tše bjalo di na le mašata kudu. Ge bana babo rena ba be ba hlwekiša holo mesong ya letšatši la Segopotšo, morulaganyi wa khonsate yeo o ile a re go bona: “Ga le tlo kwa selo ge e se mmino wa rena.”

Khonsate e ile ya thoma mosegare, gomme e be e na le mašata kudu bjalo ka ge go be go letetšwe. Le ge bana babo rena ba be ba hirišitše segodišamodumo se se fetago kudu seo ba bego ba rerile go se diriša mathomong, ba be ba sa kgone go kwa maekrofouno ge ba be ba hlahloba gore segodišamodumo seo se šoma bjang. Bana babo rena ba be ba ferekane eupša ba rapela go tšwa pelong ka taba yeo. Ke moka, mmino woo o ile wa kgaotša gateetee metsotso e 30 pele ga ge Segopotšo se ka thoma, nakong ya ge bana babo rena ba be ba fihla ka bontši. Batho bao ba bego ba enwa khonsateng yeo ba ile ba thoma go lwa, gomme maphodisa a ile a emiša khonsate yeo. Bana babo  rena ba ile ba kgona go swara Segopotšo go se na mašata eupša go na le khutšo le boemo bjo bo hlomphegago.

Giuseppe ke mmulamadibogo wa ka mehla wa kua Italy. O šoma a le ka gae a šomela feme ya ditsebi tša Inthanete. Ngwageng wa go feta ka May o ile a ya sebokeng le bašomigotee le yena ba 70 go yo ahlaahla dikakanyo tše difsa tšeo di ka dirišwago ke khamphani ya bona. Molaodi yo mogolo wa khamphani o ile a bolela gore go ka dirišwa diwepesaete tše dingwe e le mohlala wa seo khamphani ya bona e bego e nyaka go se dira. Ke moka o ile a ba bontšha mohlala sekirining. Giuseppe o ile a makala go bona letlakala la mathomong la Wepesaete ya jw.org le tšwelela sekirining. Molaodi yo mogolo o ile a re: “Ye ke Wepesaete yeo e di phalago ka moka lefaseng!” Ke moka o ile a thoma go sekaseka bokgoni bjo bo dirišitšwego Wepesaeteng ya jw.org. O ile a bolela gabotse ka  dikgokagano (di-link) tšeo di hwetšagalago gabonolo le diswantšho tše di kgahlišago.

Giuseppe o itše: “Bašomigotee le nna ba ile ba makala go kwa palo ya maleme ao a lego gona Wepesaeteng ya rena. Bofelong bja poledišano, mookamedi wa ka o ile a botša bao ba bego ba le gona le molaodi yo mogolo a re: ‘Giuseppe ke Hlatse ya Jehofa.’ Ge molaodi yo mogolo a ekwa seo, o ile a re go nna: ‘Mokgatlo wa lena o swanetšwe ke go retwa. Le hlamile Wepesaete yeo khamphani le ge e le efe, feme goba mokgatlo o ka dumago go ba le yona. Ke nagana gore go nyakega maiteko gore e dule e le nakong le gore go be bonolo go e diriša, e bile ke nagana gape gore dikarolwana le dikagare tša yona di tloga di nyaka šedi e kgolo.’ Ke be ke lewa ke dihlong ka baka la go retwa kudu ka selo seo ke sego ka se dira. Eupša ke be ke thabišwa ke gore batho ba bantši bao ba bego ba sa tsebe selo ka Dihlatse tša Jehofa ba hweditše bohlatse. Ga bjale ke dula ke boledišana le ba bangwe bao ke šomago le bona gomme ke thomile go ithuta Beibele le ba bararo ba bona.” Khamphani yeo Giuseppe a e šomelago e tšwela pele e hlahloba Wepesaete ya jw.org, mola Giuseppe yena a tšwela pele a boledišana ka Beibele le bašomigotee le yena.

Jorge ke mofsa yo a dulago Argentina. Mathomong a 2010, Jorge o ile a thoma go kwa ka ditaba tše dibotse ka motho yo a bego a tsena le yena ka klaseng. Ka baka leo, o ile a thoma go ithuta Beibele a diriša puku ya Ke Eng Seo ge e le Gabotse Beibele e se Rutago? Nakong yona yeo, o be a bapala kgwele ya maoto. O be a e kgona kudu gomme a swanelegela go bapala sehlopheng sa tlasana sa sehlopha se segolo sa kgwele ya maoto. Ka April 2014, o ile a hwetša taletšo yeo e bego e mo leka ya gore a yo bapalela sehlopha sa kua Jeremane. Ka ge a be a thabišitšwe kudu ke go nagana gore e tla ba sebapadi sa maemo a  godimo sa kgwele ya maoto, o ile a amogela taletšo yeo. Matšatšing a sego kae pele Jorge a ka ya Yuropa, mohlahli wa gagwe o ile a re go yena: “Na ga o Hlatse ya Jehofa? O se ke wa senya bophelo bja gago ka go ya moše wa mawatle. Ge ke be ke sa le mofsa, le nna ke be ke le Hlatse. Ke ile ka laletšwa gore ke yo bapalela sehlopha sa nageng ya Asia. Ke ile ka holofetšwa dilo tše dintši, gomme dilo tšeo ka moka di be di nkgahla. Ka gona, ke ile ka ya moo le lapa lešo, eupša ra boa re nyamile.” Jorge o re: “Seo a se boletšego se ile sa nkgoma kudu, gomme ka phetha ka gore ke se ye Yuropa. Ka 2015, ke ile ka ba mogoeledi wa ditaba tše dibotse gomme ka kolobetšwa.”

Ka September 2015, Kopano ya Selete ya “Ekiša Jesu!” e be e swaretšwe kua Kampala, Uganda. Bao ba bego ba le gona ba be ba thabile kudu ge Ngwanabo rena Mark Sanderson wa Sehlopha se Bušago a be a lokolla Phetolelo ya Lefase le Lefsa ya Mangwalo a Makgethwa ka Seluganda.

Morutwana yo mongwe wa Beibele o itše: “Ke thabišitšwe kudu ke go hwetša Beibele ye e botse! Ka nako yeo, batho ba be ba itokišeletša ketelo ya mopapa. Go be go rekišwa dirosari tšeo go thwego ke tša tšhegofatšo ka R433.00 e le gore go kgoboketšwe tšhelete bakeng sa tiragalo yeo. Batho ba be ba nyaka ditšhegofatšo, eupša bantši ba be ba se na tšhelete. Go fapana le moo, nna ke ile ka hwetša tšhegofatšo ya kgonthe ya mahala. Jehofa o ile a nea bohle bao ba bego ba tlile kopanong tšhegofatšo yeo, gomme yo mongwe le yo mongwe o be a ka ntšha moneelo ka go rata go tšwa pelong. Ke ikwa ke šegofaditšwe kudu ge letšatši le letšatši ke bala Lentšu la Jehofa ka segagešo gomme le nthuša go mo tseba gakaone. Ke leboga Jehofa ge a mphile kopi ya Beibele.”

Ge baetapele ba dikereke tše dingwe ba be ba leka go nyenyefatša Wepesaete ya www.jw.org tikologong e nngwe kua Congo  (Kinshasa), ba ile ba ruta balatedi ba bona gore dikgatišo tša Dihlatse tša Jehofa di gatišwa lefelong la moya. E le ge ba leka go thekga taba ye, ba ile ba bolela gore ditlhaka “www” di sepedišana le palo 666 yeo e lego ka pukung ya Kutollo. (Kut. 13:18) Barutwana ba bangwe ba Beibele ba ile ba gana go ithuta ka baka la se.

Ka morago ga gore ba rapele ka taba ye, banyalani ba bangwe ba babulamadibogo ba ile ba laletša barutwana ba bona le balekane ba bona legaeng la bona. Go ile gwa tla barutwana ba bararo le balekane ba bona, gomme ka morago ga ge ba jele, banyalani ba Dihlatse ba ile ba ba bontšha bidio ya Dihlatse tša Jehofa—Di Rulaganyeditšwe go Tsebatša Ditaba tše Dibotse. Seo baeng ba bona ba ilego ba ithuta sona se ile sa fediša ka mo go feletšego dikgopolo tša maaka tšeo ba bego ba di kwele mabapi le moo dipuku tša rena di tšwago gona. Bekeng e latelago, monna wa yo mongwe wa barutwana bao, o ile a ba gapeletša gore banyalani bao ba Dihlatse ba tšee moneelo wa gagwe wa R1,400.00 gore ba o fetišetše pele bakeng sa modiro wa lefase ka bophara. O dirile seo le ge yena a be a se a hlwa a ithuta.

Le ge bana babo rena bao ba lego lefelong leo le lego lekatana kua Papua New Guinea ba se na Inthanete, ba tloga ba nyaka go ithuta dikopelo tše difsa tša Mmušo. Ka gona Phuthego ya Mundip e roma ngwanabo rena toropong ya kgauswi. Leeto leo le nyaka gore a sepele diiri tše pedi ka maoto le go tšea leeto la diiri tše dingwe tše pedi ka pese. Ge a fihla moo, o tsena Inthaneteng, a kopollela ka pukung mantšu a dikopelo tše difsa ke moka a boela gae. Ge a fihla Holong ya Mmušo o ngwala mantšu ao letlapeng gore a bonwe ke bohle. Ke moka phuthego ka moka e kopolla dikopelo tše difsa bakeng sa diboka. Ba tloga ba thabela go opela gotee le diphuthego tša lefaseng ka bophara e le karolo ya borapedi bja bona go Jehofa.