Ka morago ga gore Baisiraele ba phološwe go Farao le madira a gagwe Lewatleng le Lehwibidu, ba be ba na le mabaka a mantši a go leboga Jehofa. Le rena re ka leboga Jehofa ka lethabo. Ke therešo gore ge re lebeletšane le diteko re ka nolega moko gabonolo. Dinakong tše bjalo, re ka homotšwa le go matlafatšwa ke go naganišiša ka ditšhegofatšo tša rena.

 E nngwe ya ditšhegofatšo tšeo re di tšeelago godimo kudu ke kholofelo ya rena e kgonthišeditšwego ya go tlo lokollwa dilong ka moka tšeo di re bakelago bohloko le tlaišego. Go sa šetšwe mathata ao a ka re welago, re a tseba gore Jehofa a ka se re lahle. Modiši wa rena yo lerato o re nea dilo tšohle tšeo re di hlokago gore re mo hlankele ka potego. Le ka mohla ga a palelwe ke go ba “setšhabelo le matla a rena, . . .  thušo yeo e hwetšagalago gabonolo nakong ya ditlalelo.” (Ps. 46:1) Go dula re nagana ka ditšhegofatšo tše bjalo go tla re thuša go lebeletšana le diteko tše boima kudu. Ngwageng wo ka moka, anke re naganišišeng ka lethabo ka ditšhegofatšo tša rena gomme re tutueletšege go ‘leboga Jehofa, gobane o lokile; gobane botho bja gagwe ke bja go iša mehleng ya neng le neng.’—Ps. 106:1.