KA 1948, nna, mosadi wa ka Paula le morwedi wa rena re ile ra thoma go ya dibokeng tša Dihlatse tša Jehofa kua Blanco Arriba. Re be re sepela ka maoto dikhilomithara tše 40 go ya le go boa, eupša le ka mohla ga sa nka ra foša diboka. Ka January 3, 1949, nna le Paula re ile ra kolobetšwa.

Ka morago ga dikgwedi tše tshela, ditho tše dingwe tša phuthegong ya gabo rena di ile tša swarwa gomme tša ahlolelwa dikgwedi tše tharo kgolegong. Re be re swanelwa ke go robala lebatong gomme re newa dijo gatee feela ka letšatši—dipanana tše ditala le tee. Ge re be re lokollwa kgolegong, bahlankedi ba mmušo ba ile ba re tšhošetša gomme ba nagana gore re tla tlogela go dira boboledi. Eupša ge re boetše magae, re ile ra thomološa go ya dibokeng le go dira boboledi ka sephiring. Ka ge bahlankedi ba mmušo ba be ba dula ba re beile leihlo, re be re kopanela magaeng a bana babo rena, mašemong a kofi goba dipolaseng. Go e na le gore re swarele diboka lefelong le le swanago leboelela, mafelelong a seboka se sengwe le se sengwe re be re tsebiša moo diboka tše di latelago di  tlago go swarelwa gona. Yo mongwe le yo mongwe o be a sepela a nnoši bodireding; re be re šoma tšhemo re apere diaparo tša mošomo, le gona re be re sa diriše dikgatišo goba Beibele. Lega go le bjalo, magareng ga 1949 le 1959, ke ile ka golegwa dikgolegong tše šupago, gomme nako le nako ke ahlolelwa go dula dikgwedi tše tharo go ya go tše tshela kgolegong.

Ke be ke swanetše go tloga ke ntšha mahlo dinameng ka gobane ba bangwe ba batlaiši ba ka e be e le ba leloko. Gaešita le ge ke be ke robala dithabeng goba dipolaseng e le gore ke se ke ka swarwa, ka dinako tše dingwe ke be ke swarwa. Lekgeng le lengwe ka morago ga gore ke swarwe, ke ile ka romelwa kgolegong ya La Victoria kua Ciudad Trujillo, moo ka seleng e nngwe le e nngwe go bego go na le bagolegwa ba 50 go ya go ba 60. Kgolegong yeo, re be re newa dijo gabedi ka letšatši—mesong re be re newa bogobe gomme mosegare re newa reise e nyenyane le dinawa. Se se kgahlišago ke gore Dihlatse ka moka kgolegong ye di be di nea bohlatse go bagolegwa ba bangwe, e bile re be re swara diboka ka mehla, tšeo re bego re di swara ka go bolela ditemana tša Beibele ka hlogo le go anega diphihlelo tša tšhemong.

Lekgeng la mafelelo la ge ke be ke golegilwe, lešole le lengwe le ile la mpetha hlogo le dikgopo ka bokamorago bja sethunya. Le ge ke sa fela ke ekwa bohloko bjo bo bakilwego ke go bethwa moo le go tlaišwa ka ditsela tše dingwe, diteko tšeo di matlafaditše tumelo ya ka, kgotlelelo ya ka gotee le go ikemišetša ga ka go hlankela Jehofa.

Gona bjale ke na le nywaga e 96, gomme ke hlankela ke le mohlanka wa bodiredi ka phuthegong. Gaešita le ge ke se sa kgona go sepela menabo e metelele, ke dula ka pele ga ntlo ya ka gomme ka dira boboledi go bafeta-ka-tsela. Kholofelo ya Mmušo ga se toro go nna. Ke selo sa kgonthe, e bile ke na le nywaga ya ka godimo ga e 60 ke botša batho ka seo. Lefase le lefsa ke selo sa kgonthe go nna lehono go fo swana le ge ke be ke ekwa molaetša wa Mmušo ka lekga la mathomo. *