Naga Karolo e kgolo ya sehlakahlaka sa Hispaniola ke Dominican Republic; gomme karolo e nyenyane ya sona ke Haiti. Naga ye e ratwa ke dipula, e na le dithaba tše ditelele, dihlašana tše di melago mo go dulago go na le monola le maganata. Thaba e telele go di feta kua Dominican Republic, e lego Pico Duarte, ke ya botelele bja dimithara tše e ka bago tše 3 175. Karolo e kgolo ya lebopo e na le santa e tšhweu e botse, gomme sehlakahlaka se se na le meedi e nonnego, go swana le Cibao Valley.

Batho Bontši bja batho ba mo ke ditlogolo tša Mayuropa le Maafrika. Go na le merafo e mengwe e mmalwa ya batho ba sego kae; gomme Mahaiti ke ona a mantši.

Leleme Leleme la semmušo la moo ke Sepanishi.

 Boiphedišo Naga ye e ikhumiša ka meepo, go dira swikiri, kofi le go gweba ka motšoko. Ga bjale boemo bja ikonomi bo kaonafetše ka baka la batho bao ba etelago naga ye le ditšweletšwa tša yona.

Boemo bja Leratadima Sehlakahlakeng se ga go fiše kudu e bile ga go tonye kudu, go ratwa ke dipula, gomme thempheretšha ya moo gantši ke digrata tše 25. Dithabeng tša ka leboabohlabela, ka ngwaga go na dipula tše matla kudu mola dikarolong tša maganata di sa ne kudu. Sehlakahlaka se se fela se hlaselwa ke madimo a šoro le mafula a matla.

Setšo Dijo tša bona tša ka mehla ke reise, dinawa le merogo. Le gona batho ba moo ba rata dijo tšeo di tšwago lewatleng, dienywa, di pepper le dipanana tše di gadikilwego. Tše dingwe tša dijo tše di hwetšwa dijong tše di ratwago kudu tšeo di bitšwago La Bandera Dominicana (folaga ya Dominican Republic). Badudi ba moo ba rata baseball, mmino le go tantsha, kudukudu motantsho wa merengue. E bile ba rata katara kudu, meropa, dinaka le seletšo se se bitšwago marimba.