Ka Sontaga sa April 1, 1945, Lennart le Virginia Johnson e lego dialoga tša Gilead ba ile ba fihla kua Ciudad Trujillo (ga bjale ke Santo Domingo), e lego motsemošate wa Dominican Republic. Ka ge e be e le Dihlatse tša mathomo tša go tla nageng ye, ba be ba fihlile nageng yeo e bego e sentšwe ke dintwa le dikgaruru. * Yearbook ya 1946 e begile gore: “Ye tšhemo e nyaka babulamadibogo, gomme dialoga tše tša Gilead di tla swanelwa ke go e thoma fase.” Nagana feela: Go be go se na ofisi ya lekala, go se na Diholo tša Mmušo e bile go se na diphuthego. Baromiwa ba ba be ba sa tsebe motho nageng yeo, ba sa tsebe Sepanishi gakaalo e bile ba se na legae le dithoto. Ba be ba tla dira’ng?

Lennart o gopola ka gore: “Re ile ra kgopela marobalo Hoteleng ya Victoria gomme re lefa ditolara tše hlano ka letšatši, go akaretša le dijo. Mantšiboeng ona ao re ile ra thoma thuto ya mathomo ya legae ya Beibele. E thomile ka tsela ye: Basadi ba babedi bao ba tšwago nageng ye bao re bego re ithuta Beibele le bona kua Brooklyn ba ile ba re nea maina a meloko ya bona le a batho bao ba tlwaelanego le bona, gomme yo mongwe wa bona e be e le ngaka yeo e bitšwago Green. Ge re be re mo etetše, re ile ra kopana le moagišani wa gagwe e lego Moses Rollins. Ka morago ga gore ba tsebe kamoo re hweditšego maina a bona le diaterese, ba ile ba theetša ka kelohloko molaetša wa Mmušo gomme ba dumela go swarelwa thuto ya Beibele. Go se kgale Moses o ile a ba mogoeledi wa mathomo wa Mmušo nageng ye.”

Baromiwa ba bangwe ba bane ba ile ba fihla mathomong a June 1945, gomme go se go ye kae ba be ba šetše ba  sepedišitše dikgatišo tše dintši le go thoma dithuto tše dintši tša Beibele. Ka October go ile gwa ba molaleng gore go be go nyakega lefelo la go swarela diboka. Ka gona, baromiwa ba ba ile ba fetoša phapoši ya bodulo le ya go jela ya legae la bona la boromiwa gore e be Holo ya Mmušo ya motšwa-o-swere. Dibokeng tšeo go be go etla batho ba e ka bago ba 40.

Yo mongwe wa batho ba mathomo bao ba ilego ba amogela therešo e be e le Pablo Bruzaud, yoo a bego a tsebja ka leina la Palé. O be a otlela pese go tloga Santiago go fihla Ciudad Trujillo, ka gona o be a eya gantši moo motsemošate. Ka letšatši le lengwe ge Palé a be a le kua Ciudad Trujillo, o ile a kopana le Dihlatse, gomme a amogela puku ya “The Truth Shall Make You Free.” O ile a thoma go ithuta Beibele le tšona letšatši le letšatši. Go se go ye kae Palé o ile a thoma go dira boboledi le baromiwa bao le go sepela le bona ka pese yeo a bego a e otlela. Ka morago o ile a kopana le Lennart Johnson gomme a sepela le yena go tloga Ciudad Trujillo ba leba Santiago le go phatša dithabeng tša moo ba lebile toropong yeo e lego lebopong ya Puerto Plata go yo etela sehlopha sa batho bao ba thabelago seo se bego se ngwaletše ntlongkgolo ya lefase kua Brooklyn, New York, se nyaka tsebišo e oketšegilego mabapi le Beibele.

Ka March 1946, Nathan Knorr le Frederick Franz bao ba tšwago ntlongkgolo ya lefase ba ile ba etela Dominican Republic. Bana babo rena ba be ba tloga ba fagahletše ketelo yeo, gomme batho ba bangwe ba 75 bao ba thabelago le bona ba ile ba tla go tlo theetša polelo ya Ngwanabo rena Knorr. Nakong ya ketelo, Ngwanabo rena Knorr o ile a rulaganya gore go tle go hlongwe ofisi ya lekala moo Dominican Republic.

Go ile gwa fihla baromiwa ba oketšegilego, gomme ge ngwaga wa tirelo wa 1946 o fela ke ge go šetše go na le bagoeledi ba 28 nageng yeo. Ka ge ditaba tše dibotse di be di thoma  go bolelwa nageng ye, baromiwa ba ba ile ba fetša mašego a mantši ba thala mmapa wa tšhemo go kgonthišetša gore ba e akaretša ka moka le ka tsela e rulagantšwego gabotse.

Ka 1947, go be go na le bagoeledi ba ka godimo ga ba 59. Ngwageng wona woo, baromiwa ba bangwe bao ba kilego ba hlankela kua Cuba ba ile ba romelwa nageng ye ya Dominican Republic. Gare ga bona go be go na le Roy le Juanita Brandt. Ngwanabo rena Brandt o ile a kgethwa go ba mohlanka wa lekala gomme a hlankela kabelong yeo ka nywaga e lesome.

Ge ngwaga wa tirelo wa 1948 o fela, go be go na le bagoeledi ba e ka bago ba 110 bao ba bego ba šoma gotee le baromiwa go boleleng ditaba tše dibotse ka mafolofolo. Lega go le bjalo, bagoeledi bao ba mafolofolo ga se ba ka ba lemoga gore ba be ba le kgauswi le go lebeletšana le tlaišo e šoro.