KA LETŠATŠI la boraro morago ga lehu la Jesu, basadi ba bangwe bao e bego e le barutiwa ba gagwe ba ile ba lemoga gore lefsika leo le bego le thibile lebitla la gagwe le tlošitšwe. Go oketša moo, lebitla le be le se na selo!

Barongwa ba babedi ba ile ba tšwelela. Morongwa yo mongwe o ile a re: “Le nyaka Jesu wa Monatsaretha . . . O tsošitšwe.” (Mareka 16:6) Ka ntle le go dika-dika, basadi bao ba ile ba kitima gomme ba yo botša baapostola. Ge ba le tseleng, ba ile ba kopana le Jesu. O ile a re go bona: “Le se ke la boifa! E-yang le begele bana bešo, gore ba ye Galilea; ba tla mpona moo.”—Mateo 28:10.

Morago letšatšing lona leo, barutiwa ba babedi ba be ba sepela ba e-tšwa Jerusalema gomme ba e-ya motseng wa Emause. Motho yo ba sa mo tsebego o ile a sepela le bona gomme a ba botšiša gore ba bolela ka eng. Ge e le gabotse e be e le Jesu yo a tsošitšwego, yoo a tšweletšego ka sebopego seo ba bego ba sa se lemoge mathomong. Ka difahlego tšeo di bontšhago go nyama, ba ile ba re ba be ba bolela ka Jesu. Motho yoo o ile a thoma go hlalosa dilo ka moka tšeo di lego ka Mangwalong mabapi le Mesia. Ka kgonthe, Jesu o be a phethagaditše diporofeto ka moka tšeo di lego mabapi le Mesia ka mo go feletšego. * Motho yoo o ile a nyamelela ge barutiwa ba thoma go lemoga gore ke Jesu yo a tsošitšwego e le moya.

Ka nako yona yeo, barutiwa bao ba babedi ba ile ba boela Jerusalema. Moo ba ile ba hwetša baapostola ba kgobokane ka ngwakong o notletšwego. Ge barutiwa bao ba sa hlalosa seo ba se bonego, Jesu o ile a tšwelela. Balatedi ba gagwe bao ba maketšego ba be ba sa kgolwe seo! Jesu o ile a ba botšiša gore: “Ke ka baka la’ng go rotoga dipelaelo dipelong tša lena? Go ngwadilwe gore Kriste o tla tlaišega le go tsoga bahung ka letšatši la boraro.”—Luka 24:38, 46.

Matšatši a 40 ka morago ga tsogo ya gagwe, Jesu o ile a tšwelela go barutiwa ba gagwe maemong a fapanego. Boemong bjo bongwe, o ile a tšwelela go ba fetago 500! Mohlomongwe ke nakong ye mo a ilego a ba nea kabelo ye e boima: “E-yang le dire batho ba ditšhaba ka moka barutiwa, . . . le ba ruta go boloka dilo tšohle tšeo ke le laetšego tšona. Bonang! Ke na le lena matšatši ka moka go fihla bofelong bja tshepedišo ya dilo.”—Mateo. 28:19, 20.

Sebokeng sa gagwe sa mafelelo le baapostola ba gagwe ba botegago ba 11, Jesu o ile a ba holofetša gore: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka . . . go fihla karolong ya kgole ya lefase.” (Ditiro 1:8) Ke moka Jesu o ile a rotogela godimo, gomme leru le ile la ba thiba gore ba se hlwe ba mmona ge a rotogela legodimong.

—E theilwe go Mateo kgaolo 28; Mareka kgaolo 16; Luka kgaolo 24; Johane dikgaolo 20 le 21; 1 Bakorinthe 15:5, 6.