Re kwa bohloko kudu ge wa leloko goba mogwera wa paale a rakwa ka phuthegong ka baka la go dira sebe gomme a sa itshole. Tsela yeo re arabelago tlhahlong ya Beibele ka taba ye e ka utolla go tsenelela ga lerato la rena ka Modimo le ka go botegela ga rena tokišetšo ya gagwe. * Ela hloko dipotšišo tšeo di rotogago ka taba ye.

Re swanetše go swara bjang motho yo a kgaotšwego? Beibele e re: “Le lese go gwerana le motho yo a bitšwago ngwanabo rena yo e lego seotswa goba motho wa megabaru goba morapedi wa medimo ya diswantšho goba wa maroga goba letagwa goba mohlakodi, le go ja le se ke la ja le motho yo bjalo.” (1 Bakorinthe 5:11) Mabapi le motho yo mongwe le yo mongwe yoo ‘a sa dulego thutong ya Kriste,’ re bala gore: “Le se ke la mo amogela magaeng a lena goba la mo dumediša. Gobane yo a mo dumedišago o na le kabelo medirong ya gagwe e kgopo.” (2 Johane 9-11) Ga re gwerane le batho bao ba kgaotšwego goba ra bolela le bona ka dilo tša moya. Morokami wa March 1, 1982, go letlakala 12, o re: “Go re fela ‘Dumela’ go motho yo mongwe e ka ba mogato wa mathomo o gogelago poledišanong gaešita le segwereng. Na re ka rata go tšea mogato wo wa mathomo le motho e a kgaotšwego?”

Na ruri go a nyakega go phema ka mo go feletšego go kopana le motho yo a kgaotšwego? Ee, ka baka la mabaka a mmalwa. La pele, ke taba ya go botegela Modimo le Lentšu la gagwe. Re kwa Jehofa e sego feela ge go le bonolo go dira bjalo eupša gape ge go le thata. Go rata Modimo go re tutueletša gore re kwe ditaelo tša gagwe ka moka, re lemoga gore o na le toka e bile ke yo lerato le gore melao ya gagwe ke e holago kudu. (Jesaya 48:17; 1 Johane 5:3) La bobedi, go kgaotša go kopana le modiri wa bobe yo a sa itsholego go šireletša rena le phuthego ka moka gore re se šilafatšwe moyeng le boitshwarong gotee le go kgomarela botumo bjo bobotse bja phuthego. (1 Bakorinthe 5:6, 7) La boraro, go swarelela ga rena ka  go tia melaong ya motheo ya Beibele go ka hola le motho yo a kgaotšwego. Ka go thekga phetho yeo e dirilwego ke komiti ya boahlodi, re ka kgoma pelo ya modiri wa bobe yoo go fihla ga bjale a paletšwego ke go arabela maitekong a bagolo a go mo thuša. Go lahlegelwa ke segwera se sebotse le bao a ba ratago go ka mo thuša go “hlaphogelwa,” go bona bogolo bja sebe sa gagwe le go gata megato ya go boela go Jehofa.​—Luka 15:17.

Go thwe’ng ge e ba wa leloko a kgaotšwe? Boemong bjo bjalo, tswalano ya kgauswi le ditho tša lapa e ka tšweletša teko ya kgonthe ya potego. Re swanetše go swara bjang wa leloko yo a kgaotšwego? Mo re ka se ahlaahle boemo bjo bongwe le bjo bongwe bjoo bo ka rotogago, eupša anke re bolele ka a mabedi a ona ao a tlwaelegilego.

Mabakeng a mangwe, setho se kgaotšwego sa leloko se ka ba se dula ngwakong o tee le lapa le itšego, ka go re’alo sa ba karolo ya lapa leo. Ka ge go kgaolwa ga sona go sa fediše ditswalano tša leloko, se ka ba le karolo ditirišanong le medirong e tlwaelegilego ya letšatši le letšatši ya lapa. Lega go le bjalo, ka tsela ya gagwe ya bophelo, motho yoo o kgethile go kgaola tlemo ya moya magareng ga gagwe le ba leloko la gabo bao ba dumelago. Ka gona, ditho tše botegago tša leloko di ka se sa hlwa di kopanela le yena medirong e akaretšago borapedi bja Modimo. Ka mohlala, ge e ba motho yo a kgaotšwego a le gona, a ka se tšee karolo ge lapa leo le kopana go ithuta Beibele. Lega go le bjalo, ge e ba motho yo a kgaotšwego e le ngwana, batswadi ba sa dutše ba ikarabela go mo ruta le go mo laya. Ka gona, batswadi ba lerato ba ka rulaganya gore ba sware thuto ya Beibele le ngwana yoo. *​—Diema 6:20-22; 29:17.

Maemong a mangwe, wa leloko yo a kgaotšwego a ka ba a sa dule ka lapeng. Gaešita le ge go ka nyakega gore ka dinako tše dingwe le kopane ka boripana ka sewelo e le gore go hlokomelwe ditaba tša lapa tša bohlokwa, go kopana mo go bjalo go swanetše go lekanyetšwa. Ditho tše botegago tša lapa la Bokriste ga di nyake sehlare sa ntšhirela e le gore di kopane le wa leloko yo a kgaotšwego  yo a sa dulego ka lapeng. Go e na le moo, go botegela Jehofa le mokgatlo wa gagwe go ba tutueletša go kgomarela thulaganyo ya Mangwalo ya go kgaola. Tsela ya bona ya potego e ka hola modiri wa bobe gomme e ka mo thuša gore a holwe ke tayo yeo a e hweditšego. *​—Baheberu 12:11.