NA O tseba leina la monna yo matla kudu yo a kilego a ba gona? Ke moahlodi yo a bego a bitšwa Simisone. O be a newa matla ke Jehofa. Gaešita le pele ga ge Simisone a ka belegwa, Jehofa o ile a botša mmagwe a re: ‘Go se go ye kae o tlo ba le morwa. Ke yena a tlago go phološa Baisiraele go Bafilisita.’

Bafilisita e be e le batho ba babe bao ba bego ba dula Kanana. Ba be ba na le banna ba bantši ba ntwa e bile ba tlaiša Baisiraele kudu. Nakong e nngwe ge Simisone a be a eya moo Bafilisita ba dulago gona, o ile a gahlana le tau e kgolo e rora. Eupša o ile a e bolaya ka diatla tša gagwe feela. O ile a bolaya le Bafilisita ba bantši ba babe.

Ka morago Simisone o ile a ratana le mosadi yo a bego a bitšwa Delila. Baetapele ba Bafilisita ba ile ba holofetša Delila gore yo mongwe le yo mongwe wa bona o tla mo nea ditšhelete tše 1 100 ge e ba a ka ba botša seo se neago Simisone matla. Delila o be a nyaka tšhelete yeo ka moka. E be e se mogwera wa kgonthe wa Simisone goba wa batho ba Modimo. Ka gona o ile a dulela go botšiša Simisone ka seo se bego se mo dira gore a be le matla a magolo.

Mafelelong Delila o ile a kgona go dira gore Simisone a mmotše moo matla a gagwe a bego a etšwa gona. Simisone o ile a re: ‘Moriri wa ka ga se wa ka wa kotwa. Go tloga ge ke be ke belegwa, Modimo o ile a nkgetha gore ke be mohlanka wa gagwe yo a kgethegilego yo a bitšwago Monasari. Ge nka kotwa moriri, matla a ka a tla fela.’

Ge Delila a kwele se, a robatša Simisone diropeng tša gagwe. Ke moka a bitša monna yo a itšego gore a tle a mo kote moriri. Ge Simisone a tsoga, a kwa a feletšwe ke matla. Ka go re’alo Bafilisita ba tla ba mo swara. Ba mo gonya mahlo gomme ba mo dira lekgoba la bona.

Ka letšatši le lengwe, Bafilisita ba ile ba dira monyanya o mogolo gore ba rapele Dagoni modimo wa bona ke moka ba ntšha Simisone kgolegong gore ba tle ba bapale ka yena. Ka nako yeo, moriri wa gagwe o be o godile gape. A bolela le mošemane yo a bego a mo hlahla a mo swere ka seatla a re: “Nthuše gore ke phopholetše dikokwane tšeo di thekgilego ntlo ye.” Ke moka Simisone a rapela Jehofa gore a mo nee matla gomme a swara dikokwane tšeo. A goeletša a re: ‘Anke ke hwe le Bafilisita ba.’ Go be go na le Bafilisita ba 3 000 monyanyeng woo, ka gona eitše ge Simisone a kgorometša dikokwane tšeo, ntlo yeo ya wa ya bolaya batho bao ba babe ka moka.

Baahlodi dikgaolo 13 go ya go 16.