Jehofa o ile a re go Moshe: ‘Rotogela go nna mo Thabeng ya Sinai. Ke tlo ngwala melao ya ka matlapeng gomme ka go nea ona.’ Moshe o ile a ya thabeng yeo gomme a dula moo matšatši a 40 le mašego a 40. Ge a le moo thabeng, Jehofa o ile a ngwala Melao e Lesome matlapeng a mabedi ke moka a mo nea ona.

Moshe o ile a fetša matšatši a mantši Baisiraele ba sa mmone, ka gona ba nagana gore o ba tlogetše. Ke moka ba re go Arone: ‘Re nyaka motho yo e ka bago moetapele wa rena. Re direle modimo!’ Arone a re: ‘Mpheng dilo tša lena tša gauta.’ Ka gona Arone a tološa dilo tšeo gomme a dira namane ka tšona. Baisiraele ba re: ‘Namane ye ke Modimo wa rena yo a re ntšhitšego Egipita!’ Ke moka ba thoma go rapela namane yeo ya gauta, e bile ba dira monyanya. Na go rapela namane yeo go be go fošagetše? Ee, ka gobane Baisiraele ba be ba tshepišitše Jehofa gore ba tlo rapela yena feela. Eupša ga bjale ba be ba bontšha gore ba boletše maaka.

 Jehofa o ile a bona seo Baisiraele ba bego ba se dira, ke moka a re go Moshe: ‘Theoga o ye go Baisiraele. Ga ba sa nkwa e bile ba rapela modimo wa maaka.’ Moshe a theoga thabeng yeo a swere matlapa a mabedi ao Jehofa a ngwadilego Molao wa gagwe go ona.

Ge Moshe a batamela moo Baisiraele ba bego ba dula gona, a kwa dikoša. Ke moka a ba bona ba bina e bile ba rapela namane yela ya gauta. Moshe o ile a kwata kudu, a lahlela matlapa ale a mabedi fase gomme a pšhatlega. Gateetee a pšhatla modimo yoo wa namane. Ke moka a botšiša Arone a re: ‘Go tlile bjang gore batho ba ba go diriše sebe se sekaakaa?’ Arone a re go Moshe: ‘O se ke wa kwata. O a tseba gore batho ba ba bjang. Ba mpoditše gore ba nyaka modimo, ke moka nna ka lahlela dilo tša bona tša gauta mollong gomme gwa tšwa namane ye!’ Arone o be a se a swanela go dira namane yeo. Moshe o ile a boela thabeng ya Sinai gomme a kgopela Jehofa gore a lebalele Baisiraele.

Jehofa o ile a lebalela bao ba bego ba nyaka go mo kwa. Na o a bona gore go be go le bohlokwa gore Baisiraele ba theetše Moshe?