Baapostola ba ile ba kwa taelo ya Jesu ya gore ba bolele ditaba tše dibotse lefaseng ka moka. Ka ngwaga wa bo-47, bana babo rena ba kua Antiokia ba ile ba roma Paulo le Baranaba gore ba ye ba bolele ditaba tše dibotse dinageng tše dingwe. Bana babo rena ba bao ba nago le mafolofolo, ba ile ba sepela naga ka moka ya Asia ba bolela ditaba tše dibotse, metseng ya go swana le Derebe, Lisitara le Ikonia.

Paulo le Baranaba ba be ba botša motho yo mongwe le yo mongwe ditaba tše dibotse. Ba be ba di botša bahumi, badiidi, bana le batho ba bagolo. Batho ba bantši e ile ya ba Bakriste. Ge Paulo le Baranaba ba be ba botša molaodi wa selete sa Tsipero e lego Seregio Paulose ditaba tše dibotse, moloi yo mongwe o ile a leka go ba thibela. Paulo o ile a botša moloi yoo a re: ‘Jehofa a ka se kwane le wena ka seo o lekago go se dira.’ Ka yona nako yeo, moloi yoo a ba sefofu. Ge molaodi Seregio Paulose a bona seo, a fetoga Mokriste.

Paulo le Baranaba ba be ba bolela ditaba tše dibotse kae le kae. Ba be ba di bolela ka ntlo le ntlo, mebarakeng, ditseleng le disinagogeng. Nakong e nngwe ka morago ga gore ba fodiše monna wa segole kua Lisitara, batho bao ba bonego mohlolo woo ba ile ba nagana gore Paulo le Baranaba ke medimo, gomme ba nyaka go ba rapela. Eupša Paulo le Baranaba ba ba thibela, gomme ba re go bona: ‘Rapelang Modimo a nnoši! Rena re no ba batho.’ Ka morago ga moo, Bajuda ba bangwe ba tla gomme ba dira gore lešaba leo le lwe le Paulo. Lešaba leo le ile la kgatla Paulo ka maswika, la mo gogela ka ntle ga motse, gomme la mo tlogela moo le nagana gore o hwile. Lega go le bjalo, Paulo o be a se a hwa! Ka yona nako yeo, bana babo ba Bakriste ba ile ba tla ba mo thuša gomme ba boela motseng le yena. Ka morago, Paulo o ile a boela Antiokia.

Ka ngwaga wa bo-49, Paulo o ile a tšea leeto la bobedi la go yo bolela ditaba tše dibotse. Ka morago ga gore a etele bana babo rena ba ditikologong tša Asia, o ile a yo bolela ditaba tše dibotse gaešita le dinageng tša kgole tša kua Yuropa. O ile a ya Athene, Efeso, Filipi, Thesalonika le dinageng tše dingwe. Silase, Luka le lesogana leo le bitšwago Timotheo, ba ile ba sepela le Paulo. Ba ile ba šoma gotee go thoma diphuthego le go di thuša gore di tie. Paulo o ile a dula Korinthe ngwaga o tee le seripa gomme a matlafatša bana babo rena ba moo. O be a bolela ditaba tše dibotse, a ruta e bile a ngwalela diphuthego tše dintši mangwalo. Le gona o be a šoma go dira ditente gomme a di rekiša. Ge nako e dutše e eya, o ile a boela Antiokia.

Ka morago, ka ngwaga wa bo-52, Paulo o ile a tšea leeto la boraro la go tšama a bolela ditaba tše dibotse. O ile a thoma go di bolela ditikologong tša Asia. O ile a fihla le metseng ya kgolekgole ya ka leboa, e lego metse ya go swana le Filipi, gomme ka morago a theogela tlasetlase kua Korinthe. Paulo o ile a fetša mengwaga e mmalwa a dula Efeso, a ruta batho ka Mmušo wa Modimo, a fodiša batho e bile a thuša phuthego. Le gona, letšatši le lengwe le le lengwe o be a ruta batho ka Mmušo wa Modimo holong ya sekolo gona moo. Batho ba bantši ba be ba mo theetša gomme ba fetoga Bakriste. Mafelelong, ka morago ga gore Paulo a bolele ditaba tše dibotse dinageng tše dintši, o ile a ya Jerusalema.