Baperisita ba bagolo ba ile ba iša Jesu go kgoši ya bona e lego Pilato. Pilato o ile a ba botšiša a re: ‘Le re motho yo o sentše eng?’ Baperisita bao ba re: ‘O re ke yena kgoši!’ Pilato a botšiša Jesu a re: “Na o Kgoši ya Bajuda?” Jesu a mo araba a re: ‘Mmušo wa ka ga o tšwe mo lefaseng.’

Ke moka Pilato a romela Jesu go Heroda, yoo e bego e le kgoši ya motse wa Galilea. Pilato o be a nagana gore mohlomongwe Heroda a ka bona Jesu molato. Heroda o ile a hwetša gore Jesu ga a na molato, gomme a mmušetša go Pilato. Ke moka Pilato a botša setšhaba a re: ‘Nna le kgoši Heroda ga se ra hwetša monna yo a na le molato. Ka gona ke a mo lokolla.’ Setšhaba sa goeletša sa re: ‘A bolawe! A bolawe!’ Ke moka mašole a tia Jesu ka sefepi, a mo tshwela ka mare le go mmetha. A ile a mo rweša kgare ya meetlwa hlogong gomme a mo kwera a re: “Dumela, wena Kgoši ya Bajuda.” Pilato a botša setšhaba gape a re: ‘Monna yo ga a na molato.’ Eupša setšhaba sa goeletša sa re: “A a kokotelwe koteng!” Ka gona Pilato a dumelela setšhaba seo gore se ye se bolaye Jesu.

Setšhaba seo se ile sa iša Jesu lefelong leo le bitšwago Gologotha, sa mo kokotela koteng gomme sa e emiša thwii. Jesu o ile a rapela a re: “Tate, ba lebalele, gobane ga ba tsebe seo ba se dirago.” Batho ba be ba mo kwera gomme ba re: ‘Ge e ba o le Morwa wa Modimo, fologa moo koteng! Iphološe.’

Go be go na le dikebekwa tše dingwe tše pedi tšeo di bego di kokotetšwe dikoteng tše dingwe kgauswi le Jesu. Se sengwe sa tšona se ile sa re go Jesu: “O nkgopole ge o tla be o buša.” Ke moka Jesu a se tshepiša a re: ‘O tlo ba le nna Paradeiseng.’ Ge e eba thapama, nageng yeo ka moka gwa ba le leswiswi. Leswiswi leo le ile la tšea diiri tše tharo. Ba bangwe ba barutiwa ba Jesu gotee le mmagwe, ba be ba eme kgauswi le kota yeo Jesu a bego a kokotetšwe go yona. Jesu a botša Johane gore a šale a hlokomela Maria, gomme a mo sware bjalo ka ge eka ke mmagwe.

Mafelelong Jesu a re: “Go phethegile!” Ke moka a inamiša hlogo ya gagwe gomme a hwa. Ka yona nako yeo, lefase la šikinyega kudu. Kua  tempeleng ya Jerusalema, gareteine e boima yeo e bego e aroganya Sekgethwa le Sekgethwakgethwa ya gagoga gomme ya tšwa diripa tše pedi. Ke moka molaodi yo mongwe wa mašole a re: ‘Ka nnete yo e be e le Morwa wa Modimo.’