Ka morago ga gore Jesu a kgethe baapostola ba 12, o ile a theoga thabeng gomme a ya moo go bego go kgobokane lešaba la batho. Batho bao ba be ba etšwa Galilea, Judea, Tiro, Sidone, Siria le metseng e mengwe ya ka mošola wa Jorodane. Ba ile ba tliša batho ba go babja le bao ba bego ba tshwenywa ke batemona. Jesu o ile a ba fodiša ka moka ga bona. Ke moka a dula godimo ga thaba a thoma go ruta. O ile a bolela seo re swanetšego go se dira gore re be bagwera ba Modimo. Le gona re swanetše go lemoga gore re ka se phele ka ntle le Jehofa, ka gona re swanetše go ithuta go mo rata. Lebaka ke gore ga go kgonege gore re rate Jehofa ge e ba re sa rate batho ba bangwe. Re swanetše go rata batho ka moka, gaešita le bao ba re hloilego.

Jesu o ile a re: ‘Ga se wa swanela go rata bagwera ba gago feela, eupša o swanetše go rata le bao ba go hloilego. O swanetše go lebalela batho go tšwa pelong. Ge o kwešitše motho bohloko, o swanetše go ya go yena kapelapela gomme o kgopele tshwarelo. O swanetše go swara ba bangwe ka tsela yeo o ka ratago ba go swara ka yona.’

 Le gona Jesu o ile a nea batho keletšo e botse ka mahumo. O ile a re: ‘Go ba mogwera wa Jehofa go phala go ba le tšhelete e ntši. Tšhelete e ka utswiwa, eupša segwera sa gago le Jehofa se ka se utswiwe. Tlogela go belaela gore o tla ja eng, wa nwa eng goba wa apara eng. Lebelela dinonyana. Modimo o di fa dijo ka mehla. Go belaela go ka se dire gore o phele nako e telele. Dula o gopola gore Jehofa o tseba dilo tšeo o di hlokago.’

E be e le la mathomo batho bao ba ekwa motho wa go kgona go ruta go swana le Jesu. Baetapele ba bona ba bodumedi, e lego Bamangwalo le Bafarisei, ba be ba se ba ka ba ba ruta dilo tšeo Jesu a ba rutilego tšona. Ke ka baka la eng Jesu a be a kgona go ruta? Ke ka gobane dilo ka moka tšeo a bego a di ruta di be di etšwa go Jehofa.