Bafarisei ba be ba dira dilo go kgahla batho. Ge ba diretše motho selo se sebotse, ba be ba nyaka go retwa. Ba be ba rapela phatlalatša, gore ba bonwe ke batho. Bafarisei ba be ba swere dithapelo tše ditelele ka hlogo gomme ba di rapela disinagogeng le dikhoneng tša diterata gore batho ba ba kwe. Ka gona batho ba ile ba makala ge Jesu a be a ba botša gore: ‘Le se ke la rapela go swana le Bafarisei. Ba nagana gore Modimo o kgahlwa ke dithapelo tša bona tše ditelele, eupša ga di mo kgahle. Ge o rapela, o swanetše go bolela le Jehofa o le nnoši. Le gona o se ke wa boeletša dilo tše di swanago ge o rapela. Jehofa o nyaka gore o mmotše seo se lego ka pelong ya gago.

‘Le swanetše go rapela ka tsela ye: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”’ Le gona  Jesu o ba boditše gore ba kgopele Modimo gore a ba nee dijo tša letšatši le letšatši, a ba lebalele dibe le go ba thuša ditabeng tše dingwe.

Jesu o itše: ‘Le se ke la tlogela go rapela. Tšwelang pele le kgopela Tatago lena e lego Jehofa gore a le nee dilo tše dibotse. Motswadi yo mongwe le yo mongwe o nyaka go nea ngwana wa gagwe dilo tše dibotse. Ge ngwana wa gago a kgopela borotho, na o tla mo nea leswika? Ge a kgopela hlapi, na o tla mo nea noga?’

Ke moka Jesu o ile a hlalosa seo re ka ithutago sona tabeng yeo. O ile a re: ‘Ge e ba lena le kgona go nea bana ba lena dilo tše dibotse, na Tatago lena e lego Jehofa a ka palelwa ke go le nea moya o mokgethwa? Jehofa Modimo o letetše feela gore le mo kgopele.’ Na o dira seo Jesu a se boletšego? Wena o botša Modimo dilo dife ge o rapela?