Ge nako e dutše e eya, monna yo a bitšwago Belshatsara o ile a ba kgoši ya Babilona. Bošegong bjo bongwe, o ile a mema batho ba bantši ba maemo setšhabeng gore ba tle monyanyeng wa gagwe. Monyanyeng woo, o ile a laela bašomi ba gagwe gore ba tliše dikomiki tša gauta tšeo Nebukadinetsara a di tšerego tempeleng ya Jehofa. Belshatsara le baeng ba gagwe ba ile ba nwa bjala ka dikomiki tšeo gomme ba rapela medimo ya bona ya maaka. Gateetee gwa tšwelela seatla gomme sa ngwala mantšu a makatšago lebotong la ka phapošing yeo ba bego ba swaretše monyanya go yona.

Belshatsara o ile a tšhoga kudu. O ile a bitša baloi ba gagwe gomme a re go bona: ‘Motho le ge e le ofe yo a tlago go hlalosa mantšu a, e tla ba wa boraro ka maemo mmušong wa ka wa Babilona.’ Baloi bao ka moka ba ile ba leka go hlalosa mantšu ao eupša ba palelwa. Ke moka mosadi wa kgoši Belshatsara a tla gomme a re go kgoši: ‘Go na le monna yo mongwe yo a bitšwago Daniele. Monna yoo o be a kgona go hlalosetša Nebukadinetsara dilo tša mohuta wo. A ka kgona go go hlalosetša mantšu a.’

Daniele o ile a tla go kgoši Belshatsara, gomme Belshatsara a re go yena: ‘Ge o ka bala mantšu a gomme wa a hlalosa, ke tla go nea pheta ya gauta gomme ka go dira wa boraro ka maemo mmušong wa ka wa Babilona.’ Daniele a re: ‘Ga ke nyake dimpho tša gago, eupša ke tla go botša seo mantšu a a se bolelago. Tatago e lego Nebukadinetsara o be a ikgogomoša, gomme Jehofa a mo otla. Wena o tseba dilo ka moka tšeo di mo diragaletšego, eupša o nyaditše Jehofa ka go nwa bjala ka dikomiki tša gauta tša go tšwa tempeleng ya gagwe. Ka gona mantšu ao Modimo a a ngwadilego mo lebotong a re: Mene, Mene, Tekel le Pharsin. Mantšu ao a bolela gore Bamede le Baperesia ba tlo fenya Babilona gomme wena o ka se sa ba kgoši.’

Go be go bonala go se na kgoši yeo e ka fenyago Bababilona. Motse wa bona o be o ageleditšwe ka maboto a magolo e bile o  dikologilwe ke noka. Eupša bošegong bjona bjoo, Bamede le Baperesia ba ile ba hlasela motse woo. Kgoši ya Baperesia e lego Korese o ile a aroša meetse a noka yeo gore mašole a gagwe a kgone go tsena motseng wa Babilona. Ge mašole ao a fihla motseng woo, a ile a hwetša mabati a bulegile! A ile a hlasela Bababilona, a ba fenya gomme a bolaya kgoši Belshatsara. Ke moka Korese a laola Babilona.

Ngwageng woo, Korese o ile a tsebiša gore: ‘Jehofa o mpoditše gore ke age leswa tempele ya gagwe kua Jerusalema. Mang le mang wa batho ba gagwe yo a nyakago go yo thuša go aga a ka ya.’ Bjalo ka ge Jehofa a be a tshepišitše, Bajuda ba bantši ba ile ba boela Jerusalema. Ka nako yeo, go be go fetile mengwaga e 70 motse wa Jerusalema o sentšwe. Kgoši Korese o ile a bušetša dikomiki tša gauta le tša silifera le dibjana tšeo Nebukadinetsara a bego a di tšere tempeleng ya Jerusalema. Na o bona kamoo Jehofa a thušitšego batho ba gagwe a diriša Korese?