1, 2. (a) Motswadi ka tlhago o arabela bjang ge ngwana wa gagwe a lla? (b) Ke maikwelo afe ao e lego a matla kudu go feta kwelobohloko ya mma?

NGWANA o a lla gare ga mpa ya bošego. Gatee-tee, mma o a tsoga. Ga a sa robala boroko go etša pele—go tloga nakong ya ge ngwana wa gagwe a be a belegwa. O ithutile go hlaola mehuta ya go se swane ya tsela ya ngwana wa gagwe ya go lla. Ka gona, gantši o kgona go lemoga ge ngwana wa gagwe yo a sa tšwago go belegwa a nyaka go lešwa, go kukwa goba go hlokomelwa. Eupša go sa šetšwe gore ngwana o llela eng, mma o a arabela. Pelo ya gagwe ga e kgone go mo dumelela a hlokomologa dinyakwa tša ngwana wa gagwe.

² Kwelobohloko yeo motswadi a bago le yona bakeng sa ngwana wa gagwe e gare ga maikwelo a lerato kudu ao a tsebjago bathong. Lega go le bjalo, go na le maikwelo a matla ka mo go sa felego—kwelobohloko e lerato ya Modimo wa rena, Jehofa. Go hlahloba seka se se lerato go ka re thuša go batamela kgaufsi le Jehofa. Ka gona, anke re ahla-ahleng seo kwelobohloko e lego sona le kamoo Modimo wa rena a e bontšhago ka gona.

3. Ke’ng seo se bolelwago ke lediri la Sehebere leo le fetoletšwego e le “go bontšha kgaugelo” goba “go ba le lešoko”?

³ Ka Beibeleng, go na le tswalano ya kgaufsi magareng ga kwelobohloko le kgaugelo. Mantšu a mantši a Sehebere le a Segerika a fetišetša kgopolo ya kwelobohloko e lerato. Ka mohlala, ela hloko lediri la Sehebere ra·chamʹ, leo gantši le fetolelwago e le “go bontšha kgaugelo” goba “go ba le lešoko.” Puku e nngwe ya ditšhupetšo e hlalosa gore lediri ra·chamʹ le “bontšha maikwelo a tseneletšego le a lerato a kwelobohloko,  go etša ge a tsošwa ke go bona bofokodi goba go tlaišega go bao re ba ratago goba bao ba nyakago thušo ya rena.” Lentšu le la Sehebere leo Jehofa a le dirišago go yena le tswalana le lentšu leo le dirišwago bakeng sa “popelo” gomme le ka hlaloswa e le “kwelobohloko ya bomma.” *—Ekisodo 33:19; Jeremia 33:26.

4, 5. Beibele e diriša bjang maikwelo ao mma a nago le wona go ngwana wa gagwe bakeng sa go re ruta mabapi le kwelobohloko ya Jehofa?

⁴ Beibele e diriša maikwelo ao mma a nago le wona go ngwana wa gagwe bakeng sa go re ruta mabapi le seo se bolelwago ke kwelobohloko ya Jehofa. Go Jesaya 49:15, re bala gore: “A fa mosadi a ka lebala leseanyana l’axwe, a lesa xo šôkêlwa [ra·chamʹ] ngwana yo a mmelexexo?—Le xe yêna a ka lebala, Nna nka se Xo lebale.” Tlhaloso yeo e kgomago e gatelela go tsenelela ga kwelobohloko ya Jehofa bakeng sa batho ba gagwe. Bjang?

⁵ Go thata go akanya gore mma o be a ka lebala go fepa le go hlokomela ngwana wa gagwe yo a anyago. Go ba gona, ngwana ga a kgone go itirela selo; bošego le mosegare ngwana o nyaka tlhokomelo ya mmagwe le lerato la gagwe. Lega go le bjalo, ka manyami, gantši go kwewa ka bo-mma bao ba hlokomologago bana ba bona, kudu-kudu ‘dinakong tše tše hlobaetšago’ tšeo di swawago ka go hlokega ga “lerato la tlhago.” (2 Timotheo 3:1, 3, NW) Jehofa o tsebatša gore: “Nna nka se Xo lebale.” Kwelobohloko e lerato yeo Jehofa a nago le yona bakeng sa bahlanka ba gagwe ga e fele. Ke e matla ka mo go sa lekanywego go feta maikwelo a lerato kudu a tlhago ao re ka naganago ka ona—kwelobohloko yeo mma gantši a bago le yona bakeng sa lesea la gagwe. Ga go makatše ge mohlalosi yo mongwe a boletše ka Jesaya 49:15 gore: “Ye ke e nngwe ya dipontšho tše matla kudu tša lerato la Modimo Testamenteng ya Kgale, ge e ba e se yona pontšho e matla go di feta ka moka.”

6. Batho ba bantši ba ba sa phethagalago ba ile ba lebelela kwelobohloko ka tsela efe, eupša ke’ng seo Jehofa a re kgonthišetšago sona?

 ⁶ Na kwelobohloko e lerato ke pontšho ya bofokodi? Batho ba bantši ba sa phethagalago ba be ba dutše ba e-na le kgopolo yeo. Ka mohlala, radifilosofi wa mo-Roma Seneca, yo a phetšego mehleng ya Jesu e bile e le setsebi se segolo kua Roma, o ile a ruta gore “kwelobohloko ke bofokodi bja monagano.” Seneca e be e le mmoleledi wa filosofi ya bo-Stoic, e lego filosofi yeo e gatelelago boiketlo bjo bo se nago maikwelo. Seneca o boletše gore motho yo bohlale a ka thuša bao ba lego tlalelong, eupša ga se a swanela go itumelela go ba kwela bohloko ka gobane maikwelo a bjalo a ka mo tima khutšo. Pono yeo ya boithati ka bophelo e be e sa nee sebaka sa go ba le kwelobohloko e tšwago pelong. Eupša Jehofa ga a bjalo le gatee! Ka Lentšung la gagwe, Jehofa o re kgonthišetša gore “ke yo lerato kudu maikwelong a borutho le wa kwelobohloko.” (Jakobo 5:11, mongwalo wa ka tlase wa NW) Go etša ge re tla bona, kwelobohloko ga se bofokodi eupša ke seka se matla le se bohlokwa. Anke re hlahlobeng kamoo Jehofa bjalo ka motswadi yo lerato, a e bonagatšago ka gona.

7, 8. Ba-Isiraele ba ile ba tlaišega ka tsela efe Egipita ya bogologolo, gomme Jehofa o ile a arabela bjang tlaišegong ya bona.

⁷ Kwelobohloko ya Jehofa e bonagala gabotse tseleng yeo a bego a dirišana le setšhaba sa Isiraele ka gona. Bofelong bja lekgolo la bo-16 la nywaga B.C.E., ba-Isiraele ba dimilione ba be ba dirilwe makgoba kua Egipita ya bogologolo moo ba bego ba gateletšwe o šoro. Ba-Egipita ba ile ba “xalakiša bophelô bya bôná ka medirô e methata leraxeng, le makokoteng.” (Ekisodo 1:11, 14) Tlalelong ya bona, ba-Isiraele ba ile ba kgopela thušo go Jehofa. Modimo wa kwelobohloko e lerato o ile a arabela bjang?

⁸ Pelo ya Jehofa e ile ya kgomega. O itše: “Mahloko a sethšaba sa-ka se se lexo kwa Egipita ke a bone; ke ba kwile xe ba  xôlôla ka ’baka la baxapeletši ba bôná; ruri, ditlaišêxô tša bôná ke a di tseba.” (Ekisodo 3:7) Jehofa o be a ka se bone ditlaišego tša batho ba gagwe le go kwa go golola ga bona gomme seo sa se mo kgome. Bjalo ka ge re bone go Kgaolo 24 ya puku ye, Jehofa ke Modimo yo a ipeago maemong a ba bangwe. Le gona go ipea maemong a ba bangwe—bokgoni bja go kwa bohloko bja ba bangwe—go tswalana kgaufsi le kwelobohloko. Eupša Jehofa o be a sa kwele feela batho ba gagwe bohloko, eupša o ile a tutueletšega go gata mogato legatong la bona. Jesaya 63:9 e re: “A ba lokolola ka leratô la xaxwe le ka xo ba hlômôxêla pelo.” Ka “seatla se matla,” Jehofa o ile a lopolla ba-Isiraele Egipita. (Doiteronomio 4:34) Ka morago ga moo, o ile a ba nea dijo tša mohlolo gomme a ba iša nageng ya bona e enywago kudu.

9, 10. (a) Ke ka baka la’ng Jehofa a ile a lopolla ba-Isiraele leboelela ka morago ga ge ba be ba dudišegile Nageng ya Kholofetšo? (b) Mehleng ya Jafeta, Jehofa o ile a lopolla ba-Isiraele kgatelelong efe, gomme ke’ng seo se ilego sa mo tutueletša go dira bjalo?

⁹ Kwelobohloko ya Jehofa ga se ya felela moo. Ge Isiraele e dudišegile Nageng ya Kholofetšo, e ile ya wela tseleng ya go se botege leboelela gomme ya tlaišega ka baka la seo. Eupša boemong bjoo batho ba be ba hlaphogelwa gomme ba bitša Jehofa. O be a ba hlakodiša leboelela. Ka baka la’ng? “Ka xobane à kwêla sethšaba sa xaxwe bohloko.”—2 Koronika 36:15; Baahlodi 2:11-16.

¹⁰ Ela hloko seo se ilego sa direga mehleng ya Jafeta. Ka ge ba-Isiraele ba be ba retologetše go hlankeleng medimo ya maaka, Jehofa o ile a dumelela gore ba gatelelwe ke ba-Amoni lebaka la nywaga e 18. Mafelelong, ba-Isiraele ba ile ba itshola. Beibele e re botša gore: “Ba r’yalo ’me ba tloša medimo e šele mo xo bôná, ba hlankêla Morêna, xomme Morêna a bá a hlômôxa pelo xe a bona Ba-Isiraele bà fêrêhlêxa.” * (Baahlodi 10:6-16)  Gatee-tee ge batho ba gagwe ba be ba bontšha go itshola ga kgonthe, Jehofa o be a sa kgotlelele go ba bona ba tlaišega. Ka gona Modimo wa kwelobohloko e lerato o ile a nea Jafeta matla a go lopolla ba-Isiraele diatleng tša manaba a bona.—Baahlodi 11:30-33.

11. Go ya ka tsela yeo Jehofa a bego a dirišana ka gona le ba-Isiraele, ke’ng seo re ithutago sona ka kwelobohloko?

¹¹ Ditirišano tša Jehofa le setšhaba sa Isiraele di re ruta’ng mabapi le kwelobohloko e lerato? Gare ga dilo tše dingwe, re bona gore ke se se fetago go lemoga ka tsela ya kwelobohloko mahloko ao a welago batho. Gopola mohlala wa mma yoo kwelobohloko ya gagwe e mo tutueletšago go arabela sellong sa ngwana wa gagwe. Ka mo go swanago, Jehofa ga se yo a sa kwego dillo tša batho ba gagwe. Kwelobohloko ya gagwe e lerato e mo tutueletša go ba imolla tlaišegong ya bona. Go oketša moo, tsela yeo Jehofa a bego a dirišana le ba-Isiraele ka yona e re ruta gore kwelobohloko ga se bofokodi le gatee, ka gobane seka se se lerato se ile sa mo tutueletša gore a gate mogato o matla le wa makgaola-kgang bakeng sa batho ba gagwe. Eupša na Jehofa o bontšha kwelobohloko feela go bahlanka ba gagwe e le sehlopha?

12. Molao o be o bonagatša bjang kwelobohloko ya Jehofa bakeng sa batho ka o tee ka o tee?

¹² Molao woo Modimo a o neilego setšhaba sa Isiraele o ile wa bontšha kwelobohloko yeo a nago le yona bakeng sa batho ka o tee ka o tee. Ka mohlala, nagana kamoo a bego a kgomega ka gona ka badiidi. Jehofa o be a tseba gore go be go ka tsoga maemo ao a sa letelwago ao a bego a ka lahlela mo-Isiraele bodiiding. Badiidi ba be ba swanetše go swarwa bjang? Jehofa o ile a laela ba-Isiraele ka go lebanya gore: “Xe e mongwê wa bana beno a ka diila . . . Le se kê la thatafiša pelo la mo tima. Mo neê ka xo rata, Ò se n’e pelo nthso; xobane xe O dira byalo Morêna Modimo wa xaxo O tlo Xo šexofatša medirong ya xaxo ka moka, mo xo tšohle tše O išaxo  diatla xo tšôna.” (Doiteronomio 15:7, 10) Jehofa o ile a tšwela pele go laela gore ba-Isiraele ba se ke ba buna mathokong a mašemo a bona ka mo go feletšego goba ba topela mašaledi. Go budutša mo go bjalo go be go dirwa ke bahlaki. (Lefitiko 23:22; Ruthe 2:2-7) Ge setšhaba se be se dumelelana le molao wo o naganelago bakeng sa badiidi bao ba lego gare ga bona, go be go sa nyakege gore bahlaki Isiraeleng ba kgopele dijo. Na seo e be e se ponagatšo ya kwelobohloko e lerato ya Jehofa?

13, 14. (a) Mantšu a Dafida a re kgonthišetša bjang gore Jehofa o tshwenyegile kudu ka rena re le motho ka o tee ka o tee? (b) Gore Jehofa o kgaufsi le bohle ba “’pelo di robexilexo” goba ba “meôya e kxobetsi” go ka swantšhwa bjang?

¹³ Ka mo go swanago, lehono Modimo wa rena yo lerato o tshwenyegile kudu ka rena re le batho ka o tee ka o tee. Re ka kgonthišega gore o bona e le ka kgonthe tlaišego le ge e le efe yeo re ka bago re lebeletšana le yona. Mopsalme Dafida o ngwadile gore: “Mahlô a Morêna a bôna baloki; ’tsêbê tša xaxwe di kwa xe ba lla. Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:15, 18) Mabapi le bao ba hlaloswago ke mantšu a, mohlalosi yo mongwe wa Beibele o bolela gore: “Ke ba pelo e robegilego le moya o setlegilego, ke gore, bao ba tlaišegago ka baka la sebe, gomme ka baka la go hloka ga bona boitlhompho ba itšeela fase, gomme ga ba kgodišege ka boitlhompho bja bona.” Ba bjalo ba ka nagana gore Jehofa o kgole kudu le gore bona e tloga e se selo gore a ka ba šetša. Eupša ga go bjalo. Mantšu a Dafida a re kgonthišetša gore Jehofa ga a lahle bao ‘ba itšeelago fase.’ Modimo wa rena yo a nago le kwelobohloko o tseba gore ka dinako tše bjalo re mo nyaka go feta le ge e le neng pele, gomme o kgaufsi.

¹⁴ Ela hloko mohlala wo. Mma wa United States o ile a akgofišetša morwa wa gagwe wa nywaga e mebedi sepetlele ka gobane a be a swerwe ke bolwetši bjo šoro bja go hema. Ka morago ga go hlahloba mošemanyana, dingaka di ile tša tsebiša mmagwe gore di be di tla swanelwa ke gore di mo robatše sepetlele.  Mma o ile a robala kae bošegong bjoo? Setulong ka phapošing ya sepetlele, kgaufsi le malao a morwa wa gagwe! Mošemanyana wa gagwe o be a babja, gomme go be go nyakega gore a be kgaufsi le yena. Ka kgonthe re ka letela mo gogolo kudu go Tatago rena yo lerato wa legodimong! Ge e le gabotse, re dirilwe ka seswantšho sa gagwe. (Genesi 1:26) Mantšu a kgomago a Psalme 34:18 a re botša gore ge re ‘robegile pelo’ goba re ‘setlegile moyeng,’ Jehofa ka go swana le mma yo lerato, “ó kxaufsi”—e le yo a nago le kwelobohloko le yo a ikemišeditšego go thuša.

15. Jehofa o re thuša ka ditsela dife re le batho ka o tee ka o tee?

¹⁵ Ka gona, Jehofa o re thuša bjang re le motho ka o tee ka o tee? Ga se gore o tloša seo se re bakelago go tlaišega. Eupša Jehofa o dirile ditokišetšo tše dintši kudu bakeng sa bao ba kgopelago thušo go yena. Lentšu la gagwe, Beibele, le nea keletšo e šomago yeo e ka bago le mafelelo a lemogegago. Ka phuthegong, Jehofa o nea balebeledi bao ba swanelegago moyeng, bao ba katanelago go bontšha kwelobohloko ya gagwe ge ba thuša barapedi-gotee le bona. (Jakobo 5:14, 15) Ka ge e le “Mokwi wa dithapêlô,” “ba ba Mo kxopêlaxo ó ba nea Môya o mokxêthwa.” (Psalme 65:2; Luka 11:13) Moya woo o ka re nea “matla a fetišago a tlwaelegilego” e le gore re kgone go kgotlelela go fihlela ge Mmušo wa Modimo o tloša mathata ka moka ao a gateletšago. (2 Ba-Korinthe 4:7, NW) Na ga re thabele ditokišetšo tše ka moka? Anke re se ke ra lebala gore ke dipontšho tša Jehofa tša kwelobohloko e lerato.

16. Mohlala o mogolo wa kwelobohloko ya Jehofa ke ofe, gomme o re kgoma bjang re le batho ka o tee ka o tee?

¹⁶ Ee, mohlala o mogolo kudu wa kwelobohloko ya Jehofa ke go nea ga gagwe Yoo a mo ratago kudu gore e be topollo bakeng sa rena. E bile sehlabelo se lerato se se tšwago go Jehofa, gomme se ile sa bula tsela bakeng sa go phološwa ga rena. Gopola gore tokišetšo ya topollo e šoma go rena ka go lebanya. Ka lebaka le lebotse, Sakaria e lego tatago Johane Mokolobetši, o ile a bolela e sa le pele gore tokišetšo ye e be e godiša “kgaugelo ya Modimo wa rena.”—Luka 1:78, PK.

17-19. (a) Beibele e bontšha bjang gore kwelobohloko ya Jehofa ga se yeo e se nago magomo? (b) Ke’ng seo se dirilego gore kwelobohloko ya Jehofa go batho ba gagwe e fele?

¹⁷ Na re ka nagana gore kwelobohloko ya Jehofa ke yeo e se nago magomo? Ka mo go fapanego, Beibele e bontšha gabotse gore tabeng ya batho bao ba lwantšhago ditsela tša gagwe tša go loka, Jehofa o gomiša kwelobohloko ka mo go swanetšego. (Ba-Hebere 10:28) Bakeng sa go bona lebaka leo ka lona a dirago bjalo, gopola mohlala wa setšhaba sa Isiraele.

¹⁸ Gaešita le ge Jehofa a ile a phološa ba-Isiraele go manaba a bona leboelela, kwelobohloko ya gagwe e ile ya feleletša e fihlile magomong a yona. Batho ba ba dinganga ba be ba rapela medimo ya diswantšho, ba bile ba tliša medingwana ya bona e šišimišago tempeleng ya Jehofa! (Hesekiele 5:11; 8:17, 18) Go feta moo, re botšwa gore: “Bôná xomme, ba dira bahlanka ba Modimo sekwêrô, ba nyatša se ba se boletšexo, ba fôtla baporofeta ba xaxwe; kxalefô ya Morêna ya ba ya xolêla sethšaba sa xaxwe, xwa hlôkwa moreku.” (2 Koronika 36:16) Ba-Isiraele ba ile ba fihla ntlheng yeo go yona go bego go se sa na motheo o swanetšego bakeng sa kwelobohloko, gomme ba ile ba fehla kgalefo ya Jehofa e lokilego. Ka mafelelo afe?

¹⁹ Jehofa o be a se sa kgona go kwela batho ba gagwe bohloko. O ile a tsebatša gore: “Nka se ke ka ba kwela bohloko, le ge e le go ba šokelwa, le go ba gaugela gore ke se ba senye.” (Jeremia 13:14, PK) Ka gona, Jerusalema le tempele ya yona di ile tša senywa, gomme ba-Isiraele ba ile ba išwa bothopša Babele. Ke mo go kwešago bohloko gakaakang ge batho ba sebe e e-ba dinganga gakaakaa moo e lego gore ba fetša kwelobohloko ya Modimo!—Dillo tša Jeremia 2:21.

20, 21. (a) Go tla direga’ng ge kwelobohloko ya Jehofa e fihla magomong a yona mehleng ya rena? (b) Ke tokišetšo efe ya kwelobohloko ya Jehofa yeo e tlago go ahla-ahlwa kgaolong e latelago?

²⁰ Go thwe’ng ka lehono? Jehofa ga se a fetoga. Ka kwelobohloko, o laetše Dihlatse tša gagwe gore di bolele “ditaba tše dibotse tša mmušo” lefaseng ka moka leo go agilwego go lona. (Mateo 24:14, NW) Ge batho ba dipelo tše di lokilego ba arabela,  Jehofa o ba thuša gore ba kwešiše molaetša wa Mmušo. (Ditiro 16:14) Eupša modiro wo o ka se tšwele pele ka mo go sa felego. E tla ba e le go se bontšhe kwelobohloko gore Jehofa a dumelele lefase le le kgopo gotee le manyami le tlaišego tša lona ka moka gore di tšwele pele di le gona ka mo go sa felego. Ge kwelobohloko ya Gagwe e fihlile magomong a yona, Jehofa o tla tliša kahlolo godimo ga tshepedišo ye ya dilo. Gaešita le ka nako yeo, o tla ba a gata mogato ka kwelobohloko—a kwela bohloko ‘leina la gagwe le lekgethwa’ gotee le bahlanka ba gagwe bao ba ineetšego. (Hesekiele 36:20-23) Jehofa o tla fediša bokgopo gomme a tliše lefase le lefsa la go loka. Mabapi le ba kgopo, Jehofa o tsebatša gore: “Leihlo la-ka le ka se ke la ba kwela bohloko, nka se ke ka ba tsebafela; ke tlo bušetša mesepelo ya bona dihlogong tša bona.”—Hesekiele 9:10, PK.

²¹ Go fihlela nakong yeo, Jehofa o kwela batho bohloko, gaešita le bao ba lebanego le phedišo. Batho bao ba nago le sebe ba ba itsholago e le ka kgonthe ba ka holwa ke e nngwe ya ditokišetšo tša Jehofa tša kwelobohloko—tebalelo. Kgaolong ye e latelago, re tla ahla-ahla tše dingwe tša ditlhaloso tše di kwagalago tše di lego ka Beibeleng tšeo di bontšhago go ba ga tebalelo ya Jehofa e feletšego.