DITŠHIŠINYEGO tša lefase, dithabamollo le ditsunami gantši di thatafiša maphelo a batho kua Indonesia. Ge dikotsi tše bjalo di direga, batho ba Jehofa ba akgofela go thuša batho bao di ba wetšego, kudukudu bana babo bona ba moya. Ka mohlala, ka 2005 tšhišinyego e matla ya lefase e ile ya šwalalanya toropo ya Gunungsitoli, e lego toropo e kgolo sehlakahlakeng sa Nias ka Leboa la Sumatra. Diphuthego tša kgauswi le moo tša sehlakahlakeng sa Sumatra le ofisi ya lekala kapelapela di ile tša romela dilo tša tlhakodišo mafelong ao a sentšwego ke tšhišinyego ya lefase. Molebeledi wa tikologo wa lefelong leo le moemedi wa lekala ba ile ba ya sehlakahlakeng seo go kgothatša le go homotša bana babo rena. Yuniman Harefa e lego mogolo wa kua Nias, o re: “Batho bao ba lego gare ga rena ba be ba tšhogile kudu. Eupša tsela yeo mokgatlo wa Modimo o arabetšego kapejana ka yona e ile ya re kgodiša gore ga re nnoši.”