INDONESIA
Re Ile ra Latela Tlhahlo Gomme ra Phela!
Blasius da Gomes
-
O BELEGWE KA 1963
-
O KOLOBEDITŠWE KA 1995
-
PEGO YA BOPHELO BJA GAGWE Ke mogolo yo ka lerato a ilego a hlokomela ditho tša phuthego nakong ya dikgohlano tša bodumedi kua Ambon, yeo e lego karolo ya Dihlakahlaka tša Maluku.
KA January 19, 1999, dingangišano tša magareng ga Mamoseleme le Bakriste tšeo di bego di tsogile bokgole bja dikhilomithara tše e ka bago tše tharo kgauswi le gae, di ile tša feleletša ka dintwa. Boemo bo be bo mpefetše. *
Ka morago ga gore ke kgonthišetše gore lapa lešo le bolokegile, ke ile ka founela bagoeledi ba bangwe gore ke kwe ge e ba le bona ba bolokegile. Ke ile ka ba botša gore ba iše maswafo fase le go se be mafelong a kotsi. Ka morago, bagolo ba ile ba etela ditho tša phuthego go di matlafatša moyeng le go di kgothaletša go bokana ka dihlopha tše dinyenyane ge di swara diboka.
Ofisi ya lekala e ile ya re kgothaletša gore re tloše bagoeledi le ge e le bafe bao ba dulago mafelong a kotsi, gomme re ile ra fetišetša tlhahlo yeo go malapa a mmalwa. Ngwanabo rena yo mongwe yoo a ilego a gana go tloga, ka morago o ile a bolawa ke bahlolampherefere bao ba itlhamilego. Eupša motho le ge e le ofe yo a ilego a kwa tlhahlo yeo e tšwago ofising ya lekala o ile a phologa.
^ ser. 1 Dingangišano tša profenseng ka moka ya Maluku di tšere mengwaga ya ka godimo ga e mebedi gomme tša dira gore batho ba dikete tše masome ba tšhabe magaeng a bona.
