Jesu o sa dutše a le kua Jerusalema ka Sabatha. Ge yena le barutiwa ba gagwe ba sepela motseng, ba bona mokgopedi yo a belegwego e le sefofu. Barutiwa ba botšiša Jesu gore: “Rabi, ke mang yo a dirilego sebe, na ke motho yo goba ke batswadi ba gagwe, ge a belegwe e le sefofu?”—Johane 9:2.

Barutiwa ba a tseba gore motho yo ga a na moya wo o sa bonagalego woo o bego o le gona pele ga ge a ka belegwa; lega go le bjalo, ba ipotšiša ge e ba motho a ka dira sebe ge a sa le ka mpeng ya mmagwe. Jesu o araba ka gore: “Sebe ga se sa dirwa ke motho yo goba batswadi ba gagwe, eupša e be e le gore mediro ya Modimo e bonagatšwe go yena.” (Johane 9:3) Ka gona ga se motho yo goba batswadi ba gagwe bao ba dirilego phošo e itšego goba sebe seo se bakilego bofofu bja gagwe. Go e na le moo, ka baka la sebe sa Adama, batho bohle ba belegwa e le ba sa phethagalago gomme ba na le mafokodi a bjalo ka bofofu. Eupša bofofu bja motho yo bo nea sebaka sa gore Jesu a bonagatše mediro ya Modimo, ka ge a ile a dira bjalo dinakong tše dingwe ge a be a fodiša batho malwetši a bona.

Jesu o gatelela go akgofa ga go dira mediro ye. O re: “Re swanetše go dira mediro ya yo a nthomilego ge e sa le mosegare; bošego bo a tla bjoo ka bjona motho a ka se dirego selo. Ge feela ke le lefaseng, ke seetša sa lefase.” (Johane 9:4, 5) Ee, go se go ye kae, lehu la Jesu le tla mo lahlela leswiswing la lebitla moo a ka se kgonego go dira selo. Mo nakong ye, ke yena a sedimošago lefase.

Eupša na Jesu o tla fodiša motho yo, gomme ge e ba go le bjalo, gona o tla dira seo bjang? Jesu o tshwela mare mmung gomme a duba leraga. O bea karolo ya leraga leo mahlong a sefofu gomme a re: “Sepela o yo hlapa bodibeng bja Siloama.” (Johane 9:7) Motho yo o a mo kwa. Ka morago ga go dira bjalo, o thoma go bona! Nagana ka lethabo leo a bago le lona ka ge e le la mathomo a bona bophelong bja gagwe!

Baagišani le batho ba bangwe bao ba bego ba mo tseba e le sefofu ba maketše. Ba a botšiša ba re: “Na yo ga se motho yo a bego a fela a dula gomme a kgopela?” Ba bangwe ba a araba ba re: “Ke yena.” Eupša ba bangwe ga ba dumele seo gomme ba re: “Ga se yena le gatee, eupša o swana le yena.” Motho yoo yena a re: “Ke nna yena.”—Johane 9:8, 9.

Ka gona, ba a mmotšiša ba re: “Bjale go tlile bjang gore mahlo a gago a buduloge?” A ba araba a re: “Motho yo a bitšwago Jesu o dubile leraga a le tlotša mahlong a ka, a re go nna: ‘Eya Siloama o hlape.’ Ka gona ka ya ka hlapa gomme ka bona.” Ke moka ba botšiša ba re: “Motho yoo o kae?” Mokgopedi a araba ka gore: “Ga ke tsebe.”—Johane 9:10-12.

Batho ba iša motho yo go Bafarisei, bao le bona ba nyakago go tseba gore go tlile bjang gore a bone. O ba botša gore: “O beile leraga mahlong a ka, ka hlapa gomme ka bona.” E be e tla ba mo go kwagalago gore Bafarisei ba nyake go thaba le mokgopedi yo a fodišitšwego. Go e na le moo, ba bangwe ba bona ba sola Jesu. Ba re: “Motho yo ga a tšwe go Modimo gobane ga a boloke Sabatha.” Ba bangwe bona ba re: “Motho yo e lego modiradibe a ka dira bjang dipontšho tša mohuta woo?” (Johane 9:15, 16) Ka go re’alo, gwa ba le karogano gare ga bona.

Ka ge ba lebeletšane le dipono tše tšeo di lwantšhanago, ba retologela go motho yoo bjale a kgonago go bona gomme ba mmotšiša ba re: “Wena o re’ng ka yena, ka ge a go budulotše mahlo?” Ga a belaele Jesu le gatee gomme o araba ka gore: “Ke moporofeta.”—Johane 9:17.

Bajuda ba gana go dumela seo. Ba ka ba ba nagana gore go swanetše go ba go na le leano le itšego magareng ga Jesu le motho yo gore a fore batho. Ba phetha ka gore tsela e kaone ya go rarolla bothata ke go botšiša batswadi ba mokgopedi yo ge e ba ruri e be e le sefofu.