Johane Mokolobetši o na le lebaka le e ka bago ngwaga a le kgolegong. Lega go le bjalo, o kwa ka mediro e kgahlišago ya Jesu. Akanya kamoo Johane a ikwago ka gona ge barutiwa ba gagwe ba mmotša gore Jesu o tsošitše morwa wa mohlologadi kua Naini. Lega go le bjalo, Johane o nyaka go ikwela ka boyena go Jesu ka seo se bolelwago ke dilo tše ka moka. Ka gona Johane o roma barutiwa ba gagwe ba babedi. Gore ba yo dira’ng? Ba swanetše go yo botšiša Jesu, ba re: “Na ke wena Yo a Tlago goba na re swanetše go letela yo mongwe?”—Luka 7:19.

Na yeo e kwagala e le potšišo e tlabago? Johane ke monna yo a ineetšego yoo, ge a be a kolobetša Jesu mo e nyakilego go ba nywaga e mebedi e fetilego, a bonego moya wa Modimo o theogela godimo ga Jesu gomme a kwa lentšu la Modimo la go mo amogela. Ga re na lebaka la go nagana gore tumelo ya Johane e thomile go fokola. Ge e ba go le bjalo, gona Jesu o be a ka se rete Johane bjalo ka ge a mo reta lebakeng le. Eupša ge e ba Johane a sa belaele, ke ka baka la’ng a botšiša Jesu potšišo ye?

Johane a ka fo ba a nyaka kgonthišetšo e tšwago go Jesu ka go lebanya ya gore ke yena Mesia. Se se tla matlafatša Johane ge a dutše a tlaišega kgolegong. Le gona go bonagala potšišo ya Johane e na le kwešišo e oketšegilego. O tlwaelane le diporofeto tša Beibele tšeo di bontšhago gore Motlotšwa wa Modimo o swanetše go ba kgoši le mophološi. Lega go le bjalo, dikgwedi tše dintši ka morago ga ge Jesu a kolobeditšwe, Johane o kgolegong. Ka gona Johane o botšiša ge e ba go na le yo mongwe yo a tlago, yo go ka thwego o hlatlama Jesu, yoo a tlago go phethagatša ka botlalo dilo tšohle tšeo go boletšwego e sa le pele gore Mesia o tla di fihlelela.

Go e na le gore a fo botša barutiwa ba Johane a re: ‘Ke therešo gore ke nna Yo a Tlago,’ Jesu o nea bohlatse bja gore o thekgwa ke Modimo ka go fodiša batho ba bantši bao ba nago le malwetši a mehuta ka moka gotee le mefokolo. Ke moka o botša barutiwa o re: “Sepelang le yo begela Johane se le se kwago le se le se bonago le re: Difofu di boetše di a bona, dihlotša di a sepela, balephera ba a hlwekišwa, difoa di a kwa, bahu ba a tsošwa gomme badiidi ba tsebišwa ditaba tše dibotse.”—Mateo 11:4, 5.

Potšišo ya Johane e ka ba e bolela gore go letetšwe gore Jesu o tla dira mediro e fetago ya bjale le gore mohlomongwe o tla lokolla Johane kgolegong. Lega go le bjalo, Jesu o botša Johane gore a se letele mehlolo e fetago yeo ge e le gabotse a e dirago.

Ge barutiwa ba Johane ba sepela, Jesu o kgonthišetša lešaba gore Johane ga e fo ba moporofeta. Ke “motseta” wa Jehofa yo go porofetilwego ka yena go Maleaki 3:1. Le gona ke moporofeta Eliya, bjalo ka ge go boletšwe e sa le pele ka yena go Maleaki 4:5, 6. Jesu o a hlalosa o re: “Ruri ke a le botša: Gare ga bao ba belegwego ke basadi ga se gwa ka gwa tsoga yo mogolo go feta Johane Mokolobetši; eupša motho yo e lego yo monyenyane Mmušong wa magodimo ke yo mogolo go mo feta.”—Mateo 11:11.

Ka go bolela gore yo monyenyane Mmušong wa magodimo ke yo mogolo go feta Johane, Jesu o bontšha gore Johane a ka se be Mmušong wa magodimo. Johane o lokišeditše Jesu tsela eupša o hwa pele Kriste a bula tsela ya go ya legodimong. (Baheberu 10:19, 20) Lega go le bjalo, Johane ke moporofeta yo a botegago wa Modimo gomme o tla ba molata wa lefaseng wa Mmušo wa Modimo.