Jesu o nea baapostola ba gagwe ditaelo tše di kgahlišago tša kamoo ba ka dirago modiro wa boboledi ge ba dutše ba sepela ka babedi ka babedi. Lega go le bjalo, ga a felele moo. Ka botho o ba lemoša ka baganetši. O re: “Bonang! Ke le roma bjalo ka dinku gare ga diphiri . . . Le itote bathong, gobane ba tla le gafela dikgorong tša lefelong leo gomme ba le otla disinagogeng tša bona. Ee, le tla gogelwa pele ga babuši le dikgoši ka baka la ka.”—Mateo 10:16-18.

Ee, balatedi ba Jesu ba ka lebeletšana le tlaišo e šoro, lega go le bjalo o ba holofetša ka go ba bea pelo, o re: “Ge ba le gafa, le se ke la belaela mabapi le kamoo le tlago go bolela ka gona goba seo le tlago go se bolela, gobane seo le tlago go se bolela le tla se newa ka nako yeo, gobane bao ba bolelago ga se lena feela, eupša ke moya wa Tatago lena wo o bolelago ka lena.” Jesu o tšwela pele ka gore: “Ngwanabo motho o tla gafela ngwanabo lehung, tate a gafele ngwana wa gagwe lehung, bana ba tsogele batswadi matla gomme ba ba dira gore ba bolawe. Le tla ba ba hloilwego ke batho bohle ka baka la leina la ka, eupša yo a kgotleletšego go fihla bofelong ke yena a tlago go phološwa.”—Mateo 10:19-22.

Ka ge modiro wa boboledi e le o bohlokwahlokwa, Jesu o gatelela go nyakega ga temogo e le gore balatedi ba gagwe ba dule ba lokologile go dira modiro wo. O re: “Ge ba le tlaiša motseng o mongwe, le tšhabele go o mongwe, gobane ruri ke re go lena: Le gatee le ka se fetše tikologo ya metse ya Isiraele go fihla Morwa wa motho a goroga.”—Mateo 10:23.

Ruri Jesu o nea baapostola ba gagwe ba 12 ditaelo tše kgethegilego, ditemošo le kgothatšo! Lega go le bjalo, o ka bona gore mantšu a a šoma le go bao ba tla tšeago karolo modirong wo wa boboledi le ka morago ga lehu le tsogo ya gagwe. Se se bontšhwa ke ge a bolela gore barutiwa ba gagwe ba tla ‘hloiwa ke batho ka moka,’ e sego feela bao baapostola ba romilwego go yo bolela le bona. Go feta moo, ga go moo re balago gore baapostola ba ile ba gogelwa go babuši le dikgoši nakong ye ya lesolo le lekopana la boboledi kua Galilea goba gore ba ile ba gafelwa lehung ke ditho tša malapa a bona.

Go molaleng gore ge Jesu a botša baapostola dilo tše o naganne ka seo se tla diregago nakong e tlago. Ela hloko gore mantšu a gagwe a be a era gore barutiwa ba gagwe ba ka se fetše tikologo ya metse yeo ba bolelago go yona “go fihla Morwa wa motho a goroga.” Jesu o bontšha gore barutiwa ba gagwe ba ka se fetše go bolela ka Mmušo wa Modimo pele ga ge Kgoši e tagafaditšwego Jesu Kriste e goroga e le moahlodi yo a kgethilwego ke Modimo.

Ge ba le gare ba dira modiro wa boboledi, baapostola ga se ba swanela go makatšwa ke kganetšo yeo ba tla lebeletšanago le yona, ka gobane Jesu o re: “Morutiwa ga a fete morutiši wa gagwe, le mohlanka ga a fete mong wa gagwe.” Ntlha ya Jesu e a kwagala. O swarwa gampe e bile o a tlaišwa ka baka la go bolela ka Mmušo wa Modimo, gomme le bona ba tla lebeletšana le boemo bjo bo swanago. Lega go le bjalo, Jesu o ba kgothatša ka gore: “Le se ke la boifa bao ba bolayago mmele eupša ba sa kgone go bolaya moya; go e na le moo le boife yo a kgonago go fediša moya gotee le mmele Gehenna.”—Mateo 10:24, 28.

Jesu o beile mohlala tabeng ye. O kgotleletše lehu ka ntle le go boifa go e na le go kwanantšha potego ya gagwe ya go botegela Ramatlaohle, e lego Jehofa. Ke Modimo Ramatlaohle yo a kgonago go fediša “moya” wa motho (e lego dikholofelo tša motho tša bokamoso) goba yo a ka tsošago motho gore a thabele bophelo bjo bo sa felego. Ruri seo se swanetše go ba se ile sa kgodiša baapostola!

Jesu o bontšha tlhokomelo ya Modimo e lerato ka balatedi ba gagwe ka tsela ye. O re: “Na dithaga tše pedi ga di rekišwe ka tšhelete ya tšhipi ya theko e nyenyane? Lega go le bjalo, ga go le e tee ya tšona yeo e tlago go wela fase Tatago lena a sa tsebe. . . . Ka gona, le se ke la boifa: Le ba bohlokwa go feta dithaga tše dintši.”—Mateo 10:29, 31.

Molaetša wo Jesu a laelago barutiwa ba gagwe gore ba o bolele o tla aroganya malapa, ka ge ditho tše dingwe tša lapa di o amogela gomme tše dingwe di o gana. Jesu o hlalosa gore: “Le se ke la nagana gore ke tletše go tliša khutšo lefaseng.” Ruri go nyakega sebete gore setho sa lapa se amogele therešo ya Beibele. Jesu o re: “Yo a ratago tatagwe goba mmagwe kudu go mpheta ga se a ntshwanela, le yo a ratago morwa goba morwedi wa gagwe kudu go mpheta ga se a ntshwanela.”—Mateo 10:34, 37.

Lega go le bjalo, ba bangwe ba be ba tla amogela barutiwa ba gagwe gabotse. O re: “Mang le mang yo a neago yo mongwe wa ba banyenyane ba senwelo feela sa meetse a tonyago gore a nwe ka baka la ge e le morutiwa wa ka, ruri ke a le botša ke re: A ka se lobe moputso wa gagwe le gatee.”—Mateo 10:42.

Ka ge ba hlamilwe gabotse ka ditaelo, ditemošo le kgothatšo ya Jesu, baapostola ba “phatša selete seo go tloga motsaneng go ya motsaneng, ba bolela ditaba tše dibotse le go fodiša kae le kae.”—Luka 9: 6.