Jesu o rutile dithuto tše bohlokwa nakong ya ge a be a le dijong ntlong ya moetapele wa Bafarisei. Ge Jesu a tšwela pele leetong la gagwe la go ya Jerusalema, mašaba a magolo a sepela le yena. Ka baka la’ng? Na a tloga a thabela go ba balatedi ba gagwe ba therešo, go sa šetšwe seo a ka swanelwago ke go se dira gore e be balatedi ba gagwe?

Ge ba le tseleng, Jesu o botša mašaba se sengwe seo se ka tlabago ba bangwe, o re: “Ge e ba motho a etla go nna gomme a rata tatagwe, mmagwe, mosadi wa gagwe, bana ba gagwe, bana babo le dikgaetšedi tša gagwe go mpheta, ee, a rata gaešita le moya wa gagwe go mpheta, gona a ka se be morutiwa wa ka.” (Luka 14:26) Eupša o ra go re’ng ka mantšu a?

Jesu ga a bolele gore bohle bao e bago balatedi ba gagwe ba swanetše go hloya metswalo ya bona e le ka kgonthe. Go e na le moo, o bolela gore ba swanetše go ba hloya ka kgopolo ya go se ba rate go feta yena Jesu, ba se swane le monna wa seswantšhong sa gagwe sa mabapi le selalelo yoo a ilego a gana taletšo e bohlokwa ka ge a sa tšwa go nyala. (Luka 14:20) Go thwe rakgolokhukhu wa Bajuda e lego Jakobo o be a ‘hloile’ Lea gomme a rata Ragele, e lego seo se bolelago gore Ragele o be a ratwa go feta Lea.—Genesi 29:31; mongwalo wa ka tlase.

Ela hloko gore Jesu o re morutiwa o swanetše go hloya “le moya wa gagwe” goba bophelo. Se se bolela gore morutiwa wa therešo o swanetše go rata Jesu go feta kamoo a ratago bophelo bja gagwe, gaešita le go ikemišetša go loba bophelo bja gagwe ge e ba go nyakega. Go molaleng gore go ba morutiwa wa Kriste ke boikarabelo bjo bogolo. Ga se bja swanela go tšewa gabohwefo, gomme bo swanetše go naganišišwa ka kelohloko.

Go ba morutiwa go ka akaretša mathata le tlaišo ka gobane Jesu o re: “Mang le mang yo a sa rwalego kota ya gagwe ya tlhokofatšo a ntatela, a ka se be morutiwa wa ka.” (Luka 14:27) Ee, morutiwa wa therešo wa Jesu o swanetše go ikemišetša go gobošwa go etša ge Jesu a ile a gobošwa. Jesu o ile a ba a bolela gore o tla hwela diatleng tša manaba a gagwe.

Ka gona mašaba ao a sepelago le Jesu a swanetše go lekola ka kelohloko kudu seo go ba morutiwa wa Kriste go se bolelago. Jesu o gatelela se ka seswantšho. O re: “Ka mohlala, ke mang wa lena yo a nyakago go aga tora a sa thomego ka go dula fase gomme a bala ditshenyegelo go bona ge e ba a na le mo go lekanego go ka e fetša? Ge go se bjalo, a ka thea motheo fela a se kgone go e fetša.” (Luka 14:28, 29) Ka baka leo, pele ga ge e ka ba barutiwa ba Jesu, bao ba sepelago le yena go ya Jerusalema ba swanetše go ba ba dirile phetho ka go tia ya go phetha boikarabelo bjo ka botlalo. O gatelela kgopolo yeo ka seswantšho se sengwe, o re:

“Ke kgoši efe yeo e tšwago dira go yo lwa le kgoši e nngwe ntweng, e sa thomego ka go dula fase ya rerišana le ba bangwe mabapi le ge e ba e tla kgona ka dihlopha tša bahlabani ba dikete tše lesome (10 000) go yo lebeletšana le yeo e tlago go yona e na le ba dikete tše masomepedi (20 000)? Ge e le gabotse, ge e ba e ka se kgone go dira bjalo, gona e tla re ge yela e sa le kgole, ya roma sehlopha sa batseta sa loba gore go be le khutšo.” E le ge a gatelela ntlha ye, Jesu o re: “Ka gona, le ka kgonthišega gore ga go le o tee wa lena yo a sa furalelego dilo tša gagwe ka moka yo a ka bago morutiwa wa ka.”—Luka 14:31-33.

Ke therešo gore Jesu ga a bolele seo feela ka mašaba ao a mo šetšego morago tseleng. Bohle bao ba ithutago ka Kriste ba swanetše go ikemišetša go dira seo a se bolelago mo. Se se bolela gore ba swanetše go ikemišetša go gafa dilo ka moka tšeo ba nago le tšona—dithoto tša bona, gaešita le bophelo—ge e ba ba nyaka go ba barutiwa ba gagwe. Seo ke selo seo go ka naganwago ka sona le go se rapelela.

Bjale Jesu o bolela ka taba yeo a ilego a bolela ka yona Thutong ya gagwe ya Thabeng ge a be a re barutiwa ba gagwe ke “letswai la lefase.” (Mateo 5:13) Mohlomongwe o be a bolela gore go etša le ge letswai la kgonthe e le sethibela-go-bola, barutiwa ba gagwe le bona ba thibela go bola ka tsela e itšego bathong; ba ba šireletša go bola moyeng le boitshwarong. Bjale, ge bodiredi bja gagwe bo le gare bo eya bofelong, o re: “Ge e le gabotse, letswai le lokile. Eupša ge e ba letswai ruri le tapa, le tla nokwa ka’ng?” (Luka 14:34) Batheetši ba gagwe ba tseba gore letswai leo le lego gona ka nako yeo le be le sa seka, le tswakane le mmu gomme ka go re’alo le se na mohola gakaalo.

Ka gona Jesu o bontšha gore le bao e bego e le kgale e le barutiwa ba swanetše gore ba se dumelele boikemišetšo bja bona bo fokola. Ge e ba seo se be se ka direga, gona ba be ba tla hloka mohola, go swana le letswai leo le tapilego. Ka gona, lefase le be le tla ba kwera. Ka godimo ga moo, ba be ba ka se swanelege pele ga Modimo, gaešita le gona go goboša leina la gagwe. Jesu o gatelela bohlokwa bja go phema seo, ge a re: “Yo a nago le ditsebe tša go theetša, a a theetše.”—Luka 14:35.