Mantšiboeng a gagwe a mafelelo a na le baapostola ba gagwe, Jesu o be a ba boditše gore: “Ka morago ga ge ke tsošitšwe, ke tla le eta pele la nkhwetša Galilea.” (Mateo 26:32; 28:7, 10) Bjale ba bantši ba balatedi ba gagwe ba tšea leeto la go ya moo, eupša ba swanetše go dira’ng kua Galilea?

Lebakeng le lengwe, Petro o botša ba tshelelago ba baapostola o re: “Ke yo rea dihlapi.” Bao ka moka ba tshelelago ba re: “Le rena re ya le wena.” (Johane 21:3) Ba fetša bošego ka moka ba sa sware selo. Ge go esa, Jesu o tšwelela lebopong, eupša ga ba lemoge gore ke yena. Jesu o a goeletša o re: “Bana ba ba rategago, na le na le sa go ja?” Ba araba ba re: “Aowa!” Jesu a re go bona: “Lahlelang lokwa ka lehlakoreng le letona la sekepe gomme le tla di hwetša.” (Johane 21:5, 6) Ba swara dihlapi tše dintši kudu moo ba palelwago ke go goga lokwa la bona.

Johane o botša Petro o re: “Ke Morena!” (Johane 21:7) Kapejana, Petro o itata ka seaparo sa gagwe sa ka ntle, seo a bego a se apotše ge a be a swara dihlapi. O itahlela ka lewatleng gomme a rutha monabo wa dimithara tše e ka bago tše 90 go ya lebopong. Ba bangwe ba mo latela ba iketlile ka seketswaneng, ba goga lokwa leo le tletšego dihlapi.

Ge ba fihla lebopong, ba bona “mollo gomme dihlapi le senkgwa di le godimo ga wona.” Jesu o re: “Tlišang tše dingwe tša dihlapi tšeo le sa tšwago go di swara gona bjale.” Petro o goga lokwa leo le nago le dihlapi tše dikgolo tše 153! Jesu o re: “Tlang le je sefihlolo sa lena.” Ga go le o tee wa bona yo a nago le sebete sa go mmotšiša gore: “Ke wena mang?” ka gobane ba lemoga gore ke Jesu. (Johane 21:10-12) Le ke lekga la boraro a tšwelela go barutiwa ba gagwe e le sehlopha.

Jesu o nea yo mongwe le yo mongwe wa bona senkgwa le hlapi gore a je. Ke moka, mohlomongwe e le ge a lebeletše dihlapi tšeo di swerwego, o a botšiša o re: “Simone morwa wa Johane, na o nthata go feta tše?” Na Petro o rata kgwebo ya go rea dihlapi go feta modiro woo Jesu a nyakago a o dira? Petro o a araba o re: “Ee Morena, o a tseba gore ke go rata kudu.” Ka gona o re go yena: “Fepa dikwana tša ka.”—Johane 21:15.

Jesu o botšiša gape o re: “Simone morwa wa Johane, na o a nthata?” Mohlomongwe e le ge a maketše, Petro o araba go tšwa pelong o re: “Ee Morena, o a tseba gore ke go rata kudu.” Jesu o sa arabela ka gore: “Diša dinku tša ka tše dinyenyane.”—Johane 21:16.

Lekgeng la boraro, Jesu o botšiša ka gore: “Simone morwa wa Johane, na o nthata kudu?” Bjale Petro a ka ba a ipotšiša ge e ba Jesu a belaela potego ya gagwe. Petro o bolela a tiišitše o re: “Morena, o tseba tšohle; o a tseba gore ke go rata kudu.” Le lekgeng le Jesu o sa gatelela seo Petro a swanetšego go se dira, o re: “Fepa dinku tša ka tše dinyenyane.” (Johane 21:17) Ee, bao ba etelelago mohlape pele ba swanetše go hlankela bao ba gogelwago mohlapeng wa Modimo.

Jesu o ile a tlengwa le go bolawa ka gobane o be a dirile modiro woo Modimo a bego a mo rometše go o dira. Bjale o utolla gore Petro o tla feleletša ka tsela e swanago. Jesu o re: “Ge o be o sa le yo monyenyane o be o fela o ikapeša gomme o eya mo o go ratago. Eupša ge o tšofala o tla otlolla matsogo a gago gomme motho yo mongwe a go apeša a go iša mo o sa go ratego.” Fela Jesu o mo kgothatša ka gore: “Tšwela pele o ntatela.”—Johane 21:18, 19.

Petro o bona moapostola Johane gomme a botšiša a re: “Morena, go tla direga eng ka monna yo?” Na bokamoso bja moapostola yoo Jesu a mo ratago ka mo go kgethegilego e tla ba bofe? Jesu o a araba o re: “Ge e ba e le thato ya ka gore a be gona go fihlela ge ke boa, seo se go tshwenya ka eng?” (Johane 21:21-23) Petro o swanetše go latela Jesu a sa tshwenyege ka gore ba bangwe ba dira eng. Lega go le bjalo, Jesu o bontšha gore Johane o tla phela nako e telele go feta baapostola ba bangwe gomme o tla fiwa pono ya ge Jesu a etla a le matleng a Mmušo.

Ke therešo gore go na le dilo tše dingwe tšeo Jesu a di dirilego, tše dintši tšeo mangwalo a ka se kgonego go di rwala.