Ka Mošupologo, Nisani 10, Jesu o bolela ka lehu la gagwe leo le batamelago a le tempeleng. Ka ge Jesu a tshwenyegile mabapi le kamoo botumo bja Modimo bo tlago go kgomega ka gona, o re: “Tate tagafatša leina la gago.” Lentšu le matla le tšwago legodimong le re: “Ke le tagafaditše gomme ke tla buša ke le tagafatša.”—Johane 12:27, 28.

Batho ba lego kgauswi ba gakanegile. Ba bangwe ba nagana gore ba kwele modumo wa magadima. Ba bangwe bona ba re: “Morongwa o boletše le yena.” (Johane 12:29) Lega go le bjalo, ke Jehofa yoo ba sa tšwago go mo kwa a bolela! Le gona le ga se lekga la pele moo batho ba kwelego lentšu la Modimo, e le ge a bolela ka Jesu.

Nywageng e meraro le seripa pejana, ge Jesu a be a kolobetšwa, Johane Mokolobetši o ile a kwa Modimo a bolela ka Jesu a re: “Yo ke Morwa wa ka, morategi, yo ke mo amogetšego.” Nakong e latelago, ka morago ga Paseka ya 32 C.E., Jesu o ile a fetoga ponagalo pele ga Jakobo, Johane le Petro. Banna bao ba bararo ba kwele Modimo a re: “Yo ke Morwa wa ka yo a rategago, yo ke kgahlwago ke yena; le mo theetšeng.” (Mateo 3:17; 17:5) Eupša bjale, lekgeng le la boraro, Jehofa o bolela ka tsela yeo a kwewago ke ba bantši!

Jesu o re: “Lentšu le le kwagetše e sego ka baka la ka, eupša ka baka la lena.” (Johane 12:30) Ke bohlatse bja gore ruri ke Morwa wa Modimo, Mesia yo go boletšwego ka yena e sa le pele.

Go oketša moo, bophelo bja Jesu bja potego bo bontšha kamoo batho ba swanetšego go phela ka gona gotee le go tiišetša gore Sathane Diabolo, yena mmuši wa lefase le, o swanetše go fedišwa. Jesu o re: “Bjale lefase le le a ahlolwa; bjale mmuši wa lefase le o tla lahlelwa ntle.” Lehu la Jesu leo le batamelago ga se go fenywa, go e na le moo e tla ba phenyo. Bjang? O a hlalosa o re: “Lega go le bjalo, nna ge ke phagamišwa [goba, fegwa] ke etšwa lefaseng, ke tla gogela batho ba mehuta ka moka go nna.” (Johane 12:31, 32) Ka go hwela ga gagwe koteng, Jesu o tla gogela batho go yena, a ba bulela tsela ya go hwetša bophelo bjo bo sa felego.

Ge lešaba le arabela go seo Jesu a se boletšego mabapi le go “fegwa,” le re: “Re kwele Molaong gore Kriste o dula a le gona ka mo go sa felego; bjale go tla bjang gore o re Morwa wa motho o swanetše go fegwa? Morwa yo wa motho ke mang?” (Johane 12:34) Go sa šetšwe bohlatse ka moka, go akaretša le gore ba kwele lentšu la Modimo, ba bantši ba bona ga ba amogele Jesu e le Morwa wa motho wa kgonthe, yena Mesia yo a holofeditšwego.

Bjalo ka ge a ile a dira peleng, Jesu o ipolela gore ke yena “seetša.” (Johane 8:12; 9:5) O kgothatša lešaba o re: “Seetša se tla ba gare ga lena ka lebakanyana. Sepelang ge le sa dutše le na le seetša gore leswiswi le se ke la le aparetša . . . Ge le sa dutše le na le seetša, dumelang go seetša e le gore le be bana ba seetša.” (Johane 12:35, 36) Ke moka Jesu o a tloga, ka gobane Nisani 10 ga se letšatši leo a swanetšego go hwa ka lona. Paseka ya Nisani 14 ke letšatši leo a swanetšego go “fegwa” ka lona—a kokotelwe koteng.—Bagalatia 3:13.

Ge go lebelelwa morago bodireding bja Jesu, go molaleng gore boporofeta bjoo bo be bo phethagala ge Bajuda ba be ba sa dumele go yena. Jesaya o boletše e sa le pele gore mahlo a batho a be a tla foufala le dipelo tša bona di be di tla thatafala e le gore ba se ke ba sokologa ba fodišwa. (Jesaya 6:10; Johane 12:40) Ee, Bajuda ba bantši ka bonganga ba gana bohlatse bja gore Jesu ke Mophološi wa bona yo a holofeditšwego, e lego tsela e išago bophelong.

Nikodemo, Josefa wa Arimathea le babuši ba bangwe ba bantši “ge e le gabotse ba ile ba dumela” go Jesu. Eupša na ba tla bontšha tumelo, goba ba ka se bolele gore ba dumela go yena, e le ge ba boifa gore ba tla rakwa sinagogeng goba ka gobane ba “rata go tumišwa ke batho”?—Johane 12:42, 43.

Jesu o hlalosa seo go dumela go yena go se akaretšago, o re: “Yo a dumelago go nna, ga a dumele go nna feela, eupša o dumela le go yo a nthomilego; yo a mponago o bona le yo a nthomilego.” Ditherešo tšeo Modimo a laetšego Jesu gore a di rute le tšeo Jesu a tšwelago pele a di bolela di bohlokwa, gomme di bohlokwa kudu mo a bilego a kgona gore: “Yo a ntlhokomologago gomme a sa amogele dipolelo tša ka, go na le yo a tlago go mo ahlola. Lentšu le ke le boletšego ke lona le tlago go mo ahlola ka letšatši la mafelelo.”—Johane 12:44, 45, 48.

Ke moka Jesu o phetha ka gore: “Ga se ka bolela ka la ka, eupša Tate yo a nthomilego ka noši o nneile taelo mabapi le seo ge e le gabotse ke swanetšego go se bolela le go se ruta. Le gona, ke tseba gore taelo ya gagwe e bolela bophelo bjo bo sa felego.” (Johane 12:49, 50) Jesu o a tseba gore kgauswinyane o tla tšholla madi a gagwe e le sehlabelo bakeng sa batho bao ba dumelago go yena.—Baroma 5:8, 9.