Kgaolo 34

Ke ka Baka La’ng o Swanetše go Phela ka Ditekanyetšo tša Beibele?

Akanya o eja dijo tša matena ka phapošing ya bojelo sekolong o na le banenyana ba babedi, ke moka mošemane yo a sa tšwago go fihla sekolong a tsena kamoo.

Ngwanenyana wa pele o re go wena: “O a tseba, Brett o tloga a go rata. Ke bona se tseleng yeo a go lebelelago ka yona. Mahlo a gagwe a ganeletše go wena!”

Ngwanenyana wa bobedi o ithekga ka wena ke moka o go sebela gore: “E re ke go botše, ga a na kgarebe!”

 O be o šetše o ile wa sola gore seo ke therešo. Go ba gona, malobanyana mo Brett o be a go laleditše gore o tle moletlong ga gabo. Eupša o ile wa gana, gaešita le ge ka pelong o be o ipotšiša gore go be go tla ba bjang ge nkabe o ile wa ya.

Ngwanenyana wa pele o bolela le wena o sa ile le monagano.

O re: “Ka maswabi e no ba e le gore ke šetše ke na le lesogana. Ke be ke tla ratana le Brett di tloga fase.”

Ke moka o go lebelela a bonagala a tlabegile. O šetše o tseba seo a tlago go go botšiša sona.

O go botšiša gore: “Wena, go tla bjang gore o se be le lesogana?”

Ga o nyake go kwa potšišo yeo. Therešo ke gore o be o ka rata go ba le lesogana. Eupša o boditšwe gore pele o ka thoma go beana mabaka, e tla ba mo gobotse go leta go fihlela o loketše go tsena lenyalong. Ge nkabe e se ka baka la . . .

Ngwanenyana wa bobedi o re: “Ka baka la bodumedi bja gago, na ga go bjalo?”

O ipotšiša gore: ‘O tsebile bjang seo ke bego ke se nagana?’

O go kwera ka gore: “Wena mehla ye o dula o bolela ka Beibele. Ke ka baka la’ng o sa ithabiše go se nene ka dinako tše dingwe?”

NA O kile wa kwerwa ka gobane o leka go phela ka ditekanyetšo tša Beibele? Ge e ba go le bjalo, mohlomongwe o ile wa ipotšiša ge e ba go na le selo se itšego seo se go fetago. Mofsa yo a bitšwago Deborah o ile a ikwa ka tsela yeo. O gopola ka gore: “Ditekanyetšo tša Beibele di be di bonala di tletše dithibelo. Tsela ya bophelo ya bagwera ba ka ba sekolong e be e ipiletša go nna ka ge e be e se na dithibelo.”

Seo se Diregago e le ka Kgonthe

Ga se ka mehla go lego kaone go ithuta go tšwa lebading. Ge e le gabotse, ke gabohlale le mo go thekgwago ke Mangwalo go ithuta diphošong tša ba bangwe, go etša ge mopsalme Asafa a ile a dira seo. Ka nakwana, o ile a kwa eka ditekanyetšo tša Modimo di be di tletše dithibelo. Eupša go hlahlobišiša bophelo bja bao ba ilego ba tlogela go sepela ditseleng tša Modimo go ile gwa  mo thuša go bona dilo ka tsela ya kgonthe. Ka morago Asafa o ile a phetha ka gore batho bao ba be ba le “mo go thedimošago.”—Psalme 73:18.

E le gore o ithute diphošong tša ba bangwe, ela hloko mantšu a latelago ao a boletšwego ke bafsa bao ka nakwana ba ilego ba hlokomologa ditekanyetšo tša Beibele gomme ba ba le thobalano pele ga lenyalo.

● Ke dilo dife tšeo di tutueditšego tsela ya lena ya go nagana le ditiro tša lena?

Deborah: “Ge ke be ke tsena sekolo ke be ke bona yo mongwe le yo mongwe a na le lesogana goba kgarebe ya gagwe, gomme ba bonala eka ba thabile. Ge ke be ke fetša nako le bona e bile ke bona ba atlana le go gokarelana, ke be ke ba duma le gona ke ikwa ke lewa ke bodutu. Gantši ke be ke fetša diiri tše dintši ke nagana ka mošemane yo a itšego yo ke bego ke mo rata. Se se ile sa gakatša kganyogo ya ka ya gore ke be le yena.”

Mike: “Ke be ke bala dipuku le go bogela mananeo ao a kgothaletšago go ba le thobalano. Go bolela ka thobalano le bagwera ba ka go ile gwa gakatša kganyogo ya ka. Ka gona, ge ke be ke le noši le ngwanenyana, ke be ke nagana gore re ka swaraswarana ka ntle le go ba le thobalano le gore ke be nka kgona go kgaotša go dira bjalo ka nako le ge e le efe.”

Andrew: “Ke be ke na le mokgwa wa go bogela diswantšho tše di kgothaletšago bootswa Inthaneteng. Ke ile ka thoma go nwa bjala kudu. Le gona, ke be ke eya meletlong le bafsa bao ba bego ba sa hlomphe ditekanyetšo tša Beibele tša boitshwaro.”

Tracy: “Ke be ke tseba gore go ba le thobalano pele ga lenyalo go fošagetše, eupša ke be ke se ka go hloya. Ke be ke se ka ikemišetša go ba le thobalano pele ke nyalwa, eupša maikwelo a ka a ile a mphenya. Ka nako e itšego, letswalo la ka le be le sa tshwenywe ke maikwelo le ge e le afe a go ba molato.”

 ● Na tsela ya lena ya bophelo e ile ya le tlišetša lethabo?

Deborah: “Mathomong, ke ile ka ikwa ke na le tokologo e bile ke thabetše gore mafelelong ke amogelwa ke dithaka tša ka. Eupša maikwelo ao ga se a ka a tšea nako e telele. Ke ile ka thoma go ikwa ke šilafetše, ke le molato e bile ke se selo. Ke ile ka itshola kudu gore ke lahlile bokgarebe bja ka.”

Andrew: “Go ile gwa ba bonolo kudu go kgotsofatša dikganyogo tše di fošagetšego. Eupša ka nako e swanago, ke be ke imelwa ke maikwelo a go ba molato gomme ke se ka thaba.”

Tracy: “Boitshwaro bjo bo gobogilego bo sentše bofsa bja ka. Ke be ke nagana gore nna le lesogana la ka re tla ipshina. Ga se gwa ba bjalo. Re ile ra feleletša re kwešana bohloko, re nyamišana le go robana dipelo. Bošego bjo bongwe le bjo bongwe ke be ke lla ke le malaong, ke duma eka nkabe ke ile ka dira dilo ka tsela ya Jehofa.”

Mike: “Ke ile ka thoma go kwa eka karolo e nngwe ya ka e hwile. Ke ile ka leka go hlokomologa mafelelo ao ditiro tša ka di bego di eba le ona go ba bangwe, eupša ka palelwa. Ke ile ka setlwa pelo ke go lemoga gore ka go tsoma go ithabiša, ke be ke kweša ba bangwe bohloko.”

● Ke keletšo efe yeo le ka e neago bafsa bao ba ipotšišago ge e ba ditekanyetšo tša Beibele tša boitshwaro di tletše dithibelo?

Tracy: “Phela ka ditekanyetšo tša Jehofa gomme o gwerane le batho bao ba dirago se se swanago. Ka go re’alo, o tla thaba.”

Deborah: “Ditiro tša gago ga di kgome wena feela eupša di tla kgoma le ba bangwe. Le gona ge e ba o hlokomologa keletšo ya Modimo, o tla ikgobatša.”

 Andrew: “Ge o se na phihlelo, o nagana gore tsela ya bophelo ya dithaka tša gago e a kgahliša. Mekgwa ya bona e tla go fetela. Ka gona, kgetha bagwera ka bohlale. Bota Jehofa gomme o tla itšhireletša manyaming.”

Mike: “Gare ga dilo tša bohlokwa kudu tšeo Jehofa a go neilego tšona ke seriti le bohlweki. Go lahla dimpho tšeo e le ka baka la gore ga o kgone go itshwara ke go ithekiša ka sente. Boledišana le batswadi ba gago le batho ba bangwe bao ba godilego tsebong ka mathata a gago. Ge e ba o dira phošo, e bolele ka pela gomme o e lokiše. Ge e ba o dira dilo ka tsela ya Jehofa, o tla ba le khutšo ya kgonthe.”

Na Ditekanyetšo tša Beibele di Tletše Dithibelo Goba di a Šireletša?

Jehofa ke “Modimo yo a thabilego” gomme o nyaka gore le wena o thabe. (1 Timotheo 1:11; Mmoledi 11:9) Ditekanyetšo  tšeo di ngwadilwego ka Beibeleng ke tša go go hola. Ke therešo gore o ka di lebelela e le dithibelo tšeo di lekanyetšago tokologo ya gago. Lega go le bjalo, therešo ke gore ditekanyetšo tša Beibele tša boitshwaro di bjalo ka lepanta leo o itlemago ka lona ka koloing leo le go šireletšago kotsing.

Ruri o ka bota Beibele. Ge e ba o kgetha go phela ka ditekanyetšo tša yona, o ka se thabiše Jehofa feela eupša gape o tla ikhola.—Jesaya 48:17.

KGAOLONG YA RENA YEO E LATELAGO

O ka ba mogwera wa Modimo. Ithute kamoo o ka dirago seo ka gona.

KEY SCRIPTURE

“Nna, Jehofa, ke Modimo wa lena, Yo a le rutago gore le holege.”—Jesaya 48:17.

KELETŠO

Nagana kamoo o ka hlalosetšago moratho wa gago bohlale bja go phela ka ditekanyetšo tša Beibele. Go bolela ka ditumelo tša gago ke tsela e matla ya go di nweletša ka pelong ya gago.

NA O BE O TSEBA . . . ?

Go ka tšea metsotso e sego kae feela go senya tswalano ya gago le Jehofa, eupša go ka go tšea nywaga e mentši go e lokiša.

KGATO YEO KE TLAGO GO E TŠEA!

E le gore ke kwešiše bohlale bja go phela ka ditekanyetšo tša Beibele, ke tla ․․․․․

Ge e ba ke thoma go duma bao ba phelago ka ditekanyetšo tša lefase, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ge go tliwa tabeng ya go lebeletšana le ditlamorago tša go se kwe melao ya Modimo, ke ka baka la’ng e se gabohlale go ithuta go tšwa lebading?

● O ithuta’ng mantšung a Deborah, Mike, Andrew le Tracy?

● Ke ka baka la’ng batho ba bangwe ba ka lebelela ditekanyetšo tša Beibele e le tše di thibelago kudu, eupša ke ka baka la’ng go ba le pono e bjalo e se gabohlale?

[Ntlhakgolo go letlakala 285]

“Bohloko bja go kgalengwa ka baka la sebe seo o se dirilego bo kaone go phala bja go leka go se uta.”—Donna

[Diswantšho go letlakala 288]

Ditekanyetšo tša Beibele ga di go thibele go thaba; di a go šireletša