Kgaolo 11

Go Thwe’ng ka go Dira Segwera Inthaneteng?

Ke mokgwa ofe wa poledišano woo o o ratago?

□ Go bolela re lebantše difahlego

□ Ka mogala

□ Ka khomphutha

Ke bomang bao o hwetšago go le bonolo kudu go boledišana le bona?

□ Bao ke tsenago le bona ka klaseng

□ Ditho tša lapa

□ Bakristegotee le nna

Ke kae moo o lokologago kudu go boledišana le batho?

□ Sekolong

□ Ka gae

□ Dibokeng tša phuthego

LEBELELA karabo ya gago potšišong ya mathomo. Na o arabile ka gore o rata go boledišana le batho o diriša khomphutha go e na le go boledišana le bona le lebantše difahlego? Ge e ba go le bjalo, o tloga o se nnoši. Bafsa ba bantši ba diriša Inthanete go thoma segwera le go se kgomarela. Kgarebe yeo e bitšwago Elaine e re: “Taba ya go kgona go tsebana le batho go tšwa lefaseng ka moka—batho bao o bego o ka se kgone go tsebana le bona—ke yeo e gogelago.” Tammy wa nywaga e 19 o bolela ka kgoketšo e nngwe. O re: “O ka kgona go laola tsela yeo batho ba go lebelelago ka yona. Ge o bolela le bona le lebantše difahlego, ga go na selo seo o ka se dirago ge e ba o sa amogelege.”

Bjale lebelela dikarabo tša gago potšišong ya bobedi le ya boraro. O se ke wa makala ge o hwetša go le bonolo kudu go boledišana le bao o tsenago le bona ka klaseng go e na le Bakristegotee le wena dibokeng tša phuthego. Jasmine wa nywaga e 18 o re: “Sekolong go na le kgonagalo e kgolo ya gore o hwetše batho bao  ba lebeletšanego le dilo tšeo le wena o lebeletšanego le tšona. Seo se ka dira gore o ikwe o lokologile ge o na le bona.”

Ka morago ga go lebeledišiša dintlha ka moka tše di lego ka mo godimo, go ka bonagala e le ga tlhago gore o nyake go boledišana le bao o tsenago le bona sekolo o diriša Inthanete. Tammy o a dumela gore o ile a dira seo ka nakwana. O re: “Batho ka moka bao ke tsenago le bona sekolo ba be ba boledišana ka dilo tše itšego Inthaneteng, ka gona ke be ke sa nyake go fetwa ke seo.” * Natalie wa nywaga e 20 o ile a itirela Wepesaete e le gore a kgone go boledišana le bagwera ba gagwe. O re: “Thekinolotši e tšwela pele. Go na le mekgwa e mefsa ya poledišano. Wo ke o mongwe wa yona gomme ke a o rata.”

Go Lebeledišiša Dikotsi

Ga go na pelaelo gore go batho ba bangwe go bonolo go dira segwera le go se kgomarela ba diriša Inthanete. Natalie o re: “Inthanete e go nea sebete seo o bego o ka se be le sona ge e ba o be o boledišana le motho le lebantše difahlego.” Tammy o dumelelana le seo. O re: “Ge e ba o na le dihlong, go swara poledišano Inthaneteng go go nea sebaka sa gore o nagane gabotse seo o tlago go se bolela.”

Eupša go na le dikotsi tša go swara poledišano Inthaneteng, le gona e tla ba gabošilo ge o ka di hlokomologa. Ka mohlala: Na o be o ka sepela o itswaletše mahlo ditarateng tša tikologo e kotsi? Ge e ba o be o ka se dire bjalo, gona ke ka baka la’ng o fetša nako Inthaneteng ntle le go ba šedi ka dikotsi tša go dira bjalo?

Ela hloko dikotsi tša go leka go hwetša bagwera Inthaneteng. Elaine yo a kilego a thabela go fo boledišana le batho bao a sa ba tsebego Inthaneteng o re:  “Go bonolo kudu gore o kopane le baradia.” O oketša ka gore: “Ka dinako tše dingwe ga go tšee nako gore motho yoo o boledišanago le yena a go botše dilo tše di sa hlwekago goba a go botšiše dipotšišo tše bjalo ka gore, ‘Na ga o ešo wa ba le thobalano? Na o kgona go hupa setho sa pelego sa motho yo mongwe?’ Ba bangwe e bile ba boledišana ka thobalano Inthaneteng ka morero wa go kgotsofatša dikganyogo tša bona tša botona le botshadi.”

Go thwe’ng ge e ba o fo boledišana le mogwera yo o mmotago? Le gona moo, o swanetše go ba šedi. Joan o re: “O ka fetša nako e ntši kudu o boledišana le motho wa bong bjo bo fapanego le bja gago, gaešita le ge o re motho yoo e fo ba mogwera. Ge o dutše o fetša nako e ntši o romelana melaetša le motho yoo, ke moo segwera sa lena e bago sa kgauswi kudu gomme go na le kgonagalo e kgolo ya gore le thome go bolela ka dilo tše dikgolo.”

“Bao ba Utago Seo ba Lego Sona”

Kgoši Dafida o be a tseba gabotse bohlokwa bja go itiša malebana le bagwera ba babe. O ngwadile gore: “Ga se ka dula le batho ba maaka; ga ke tsene mo go nago le bao ba utago seo ba lego sona.”—Psalme 26:4.

Ge o be o le Inthaneteng, na o kile wa gahlana le mohuta wa batho bao Dafida a boletšego ka bona? Ke neng moo batho Inthaneteng “ba utago seo ba lego sona”? ․․․․․

Ka lehlakoreng le lengwe, na e ka ba e le gore  wena o uta seo o lego sona ge o le Inthaneteng? Abigail yo a bego a tsena mekerong ya dipoledišano ya Inthanete o re: “Ke be ke tla thoma poledišano le batho ke moka ke fetoše semelo sa ka gore se dumelelane le taba yeo re bolelago ka yona.”

Ngwanenyana yo a bitšwago Leanne o ile a diriša mokgwa o mongwe wa boradia. O re: “Ke be ke dula ke boledišana Inthaneteng le mošemane yo mongwe wa phuthegong ya kgauswi le ya gešo. Go se go ye kae ke ge re šetše re bolela ka maikwelo a rena a seo re bego re nagana gore ke lerato. Ge batswadi ba ka ba feta, ke be ke tla tswalela mokero wo ke o butšego mo khomphutheng, ka gona ba be ba sa tsebe le ganyenyane seo se bego se direga. Ga ke kgolwe gore ba be ba nagana gore go a kgonega gore morwedi wa bona wa nywaga e 13 a ngwalele mošemane wa nywaga e 14 direto tša marato. Ba be ba sa nagane gore seo se ka direga.”

Kamoo o ka Dulago o Šireletšegile

Therešo ke gore go na le dinako tšeo ka tšona go boledišana le batho Inthaneteng e lego mo go swanetšego. Ka mohlala, batho ba bantši—go akaretša le batho ba bagolo—ba diriša Inthanete go boledišana le bagwera ba bona. Ge e ba seo e le therešo ka wena, na go na le megato le ge e le efe yeo o ka e gatago gore o šireletšege dikotsing tša Inthanete? Ela hloko dintlha tše di latelago.

● Šetša nako yeo o e fetšago o le Inthaneteng, le gona o se ke wa e dumelela e go utswetša nako ya go dira dilo tša bohlokwa kudu—go akaretša le go robala. Mofsa yo a bitšwago Brian o re: “Bana ba bangwe sekolong ba boletše gore ba be ba dula Inthaneteng go fihlela ka iri ya boraro mesong.”—Baefeso 5:15, 16.

 ● Boledišana feela le batho bao o ba tsebago goba bao o ka kgonthišetšago gore ke bomang. Ka mehla batho ba mekgwa e gobogilego ba fetleka Inthanete ba nyaka go diriša gampe bafsa bao ba sego šedi.—Baroma 16:18.

● Ge o dira dilo tša kgwebo, eba šedi. Eba šedi kudu mabapi le go nea batho boitsebišo bja gago. Go sego bjalo, o ka radiiwa goba wa dirwa se se fetago seo.—Mateo 10:16.

● Ge o romela bagwera ba gago dinepe, ipotšiše gore: ‘Na se ruri se swanela motho yo a ipolelago gore o hlankela Modimo?’—Tito 2:7, 8.

● Ka go swana le poledišano ya ge le lebantše difahlego, ge e ba poledišano ya Inthaneteng e sekamela ‘dilong tše di sa swanelago,’ e kgaotše.—Baefeso 5:3, 4.

 ● Ka mehla o se ke wa ba le boradia ge o diriša Inthanete. Ge e ba o swanetše go ‘utela batswadi ba gago seo o lego sona,’ gona go ra gore go na le bothata. Mofsa yo a bitšwago Kari o re: “Ke boledišana le mma ka bolokologi. Ke mmontšha seo ke se dirago Inthaneteng.”—Baheberu 13:18.

“O ka se ke wa Itshola Gore o Ile wa Leta!”

Ke ga tlhago go nyaka go ba le bagwera. Batho ba bopetšwe gore ba thabele segwera le batho ba bangwe. (Genesi 2:18) Ka gona ge o ikwa o kganyoga go ba le bagwera, tseba gore seo se dumelelana le tsela yeo o bopilwego ka yona! E fo hlokomela gore o kgetha bagwera ba mohuta ofe.

Kgonthišega gore o ka hwetša bagwera ba babotse ge e ba o ba kgetha go ya ka ditekanyetšo tša Lentšu la Modimo. Ngwanenyana yo mongwe wa nywaga e 15 o beile taba ka tsela ye: “Go thata go hwetša bagwera bao ba ratago Jehofa le bao ba go ratago. Eupša ge o ba hweditše, o ka se ke wa itshola gore o ile wa leta!”

KGAOLONG YA RENA YEO E LATELAGO

Ke mang yo a rego mantšu a ka se kweše motho bohloko? Lesebo le ka hlaba bjalo ka tšhoša. O ka kgaotša bjang lesebo?

[Mongwalo wa tlase]

KEY SCRIPTURE

“Ga se ka dula le batho ba maaka; ga ke tsene mo go nago le bao ba utago seo ba lego sona.”—Psalme 26:4.

KELETŠO

Nako e a kitima ge o le Inthaneteng! Ka gona ipeele nako yeo o tlago go e fetša o le go yona gomme o e kgomarele. Ge e ba go nyakega, bea alamo yeo e tlago go lla ge nako yeo o ipeetšego yona e fedile.

NA O BE O TSEBA . . . ?

Go nyakega feela boitsebišo bjo bonyenyane bjo o nago le bjona Intha-neteng—mohlomongwe sefane sa gago, leina la sekolo sa geno le nomoro ya gago ya mogala—gore motho yo mongwe yo a nago le maikemišetšo a mabe a go hwetše.

KGATO YEO KE TLAGO GO E TŠEA!

Nka rata go lekanyetša nako yeo ke e fetšago ke le Inthaneteng ka diiri goba metsotso e ․․․․․ ka beke, gomme e le gore ke dire se ke tla ․․․․․

Ge e ba ke ikhwetša ke bolela le motho yo ke sa mo tsebego Inthaneteng, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Mehola le dikotsi tša go boledišana le batho Inthaneteng ke dife ge di bapetšwa le go boledišana le batho le lebantše difahlego?

● Ke ka baka la’ng go le bonolo gore motho a fetoše semelo sa gagwe ge a boledišana le batho Inthaneteng?

● O ka laola bjang nako yeo o e fetšago o le Inthaneteng?

● Go boledišana le batho Inthaneteng go ka dirišwa ka ditsela dife tšeo di holago?

[Ntlhakgolo go letlakala 103]

“Ga go na batho bao ke boledišanago le bona Inthaneteng bao ke sa ba tsebego goba bao ke bego nka se gwerane le bona le ge nkabe ke be ke ba tseba.”​—Joan

[Seswantšho go letlakala 100, 101]

Na o be o ka sepela o itswaletše mahlo ditarateng tša tikologo e kotsi? Ge e ba o be o ka se dire bjalo, gona ke ka baka la’ng o boledišana le batho Inthaneteng ntle le go ba šedi ka dikotsi tša go dira bjalo?