Kgaolo 5

Ke ka Baka La’ng o sa Swanela go ba le Thobalano Pele ga Lenyalo?

“Ke ikwa ke lekega go ba le thobalano.”—Kelly.

“Ga ke ikwe gabotse ka ge ke sešo ka ba le thobalano.”—Jordon.

“O RA gore ga o ešo wa ba le thobalano?” Potšišo ye ka boyona e ka go dira gore o hlabje ke dihlong! Ge e le gabotse, dinageng tše dintši mofsa yo a sešogo a ba le thobalano gantši o lebelelwa e le yo a sa tlwaelegago, e le semaka. Ga go makatše ge bafsa ba bantši gakaakaa ba eba le thobalano ba sa le nywageng ya mahlalagadi!

 Go Gogwa ke Kganyogo le go Goketšwa ke Dithaka

Ge e ba o le Mokriste, o a tseba gore Beibele e re o “ile bootswa.” (1 Bathesalonika 4:3) Lega go le bjalo, o ka thatafalelwa ke go laola dikganyogo tša gago tša botona le botshadi. Lesogana le le bitšwago Paul le dumela ka gore: “Ka dinako tše dingwe ke tlelwa ke menagano ya thobalano ntle le sebaki goba lebaka.” Kgonthišega gore go fihla bokgoleng bjo itšego go ikwa bjalo ke ga tlhago.

Lega go le bjalo, ga go bose gore ka mehla o kwerwe le go tlaišwa ka ge o sešo wa ba le thobalano! Ka mohlala, go thwe’ng ge e ba dithaka tša gago di go botša gore o ka se be monnatia goba mosadisadi ntle le ge o ka ba le thobalano? Ellen o re: “Dithaka tša gago di dira gore go ba le thobalano go kwagale go kgahliša e bile  go tlwaelegile. Ge e ba o sa tšame o robala le batho ba bangwe, go thwe o setlaela.”

Eupša go na le taba e nngwe mabapi le go ba le thobalano pele ga lenyalo yeo dithaka tša gago di ka kgethago go se e bolele. Ka mohlala, Maria yo a kilego a ba le thobalano le lesogana la gagwe o gopola ka gore: “Ka morago ga moo ke ile ka ikwa ke lewa ke dihlong e bile ke nyatšega. Ke ile ka itlhoya ka ba ka hloya le lesogana la ka.” Diphihlelo tše bjalo di direga gantši go feta kamoo bafsa ba bantši ba ka lemogago. Therešong, go ba le thobalano pele ga lenyalo gantši ke phihlelo e kwešago bohloko maikwelong—yeo e bago le ditlamorago tše di šiišago!

Lega go le bjalo, mofsa yo a bitšwago Shanda o botšiša gore: “Ke ka baka la’ng Modimo a nea bafsa dikganyogo tša botona le botshadi mola a tseba gore ga se ba swanela go di kgotsofatša go ba go fihla ba tsena lenyalong?” Yeo ke potšišo e botse. Eupša ela hloko dintlha tše di latelago:

Na dikganyogo tša botona le botshadi ke tšona dikganyogo feela tše matla tšeo o bago le tšona? Aowa. Jehofa Modimo o go bopile ka tsela ya gore o ikwe o na le dikganyogo le maikwelo a fapafapanego.

Na o swanetše go kgotsofatša kganyogo e nngwe le e nngwe ge e thoma e tšwelela? Aowa, ka gobane Modimo o bile o go bopile o na le bokgoni bja go laola ditiro tša gago.

Ka gona, re ithuta’ng tabeng  ye? O ka fo se kgone go thibela dikganyogo tše itšego ge di tšwelela, eupša o ka kgona go laola kamoo o arabelago ka gona ge di tšwelela. Ruri go kgotsofatša kganyogo e nngwe le e nngwe ya botona le botshadi e tla ba mo go fošagetšego le gabošilo go swana le ge o ka itia motho yo mongwe nako e nngwe le e nngwe ge o ikwa o galefile.

Ntlha ke gore Modimo o be a se a re bopela gore re diriše gampe ditho tša rena tša pelego. Beibele e re: “Yo mongwe le yo mongwe wa lena a tsebe go laola mmele wa gagwe ka kgethego le kgodišo.” (1 Bathesalonika 4:4) Go fo swana le ge go na le “nako ya go rata le nako ya go hloya,” e bile go na le nako ya go kgotsofatša dikganyogo tša botona le botshadi le nako ya go se dire bjalo. (Mmoledi 3:1-8) Se se šalago, ke wena o laolago dikganyogo tša gago!

Eupša o ka dira’ng ge e ba motho yo a itšego a go kwera e bile a botšiša ka go se kgolwe gore: “O ra gore ruri ga o ešo wa ba le thobalano?” O se ke wa boifa. Go motho yo a nyakago go fo dira metlae ka wena o ka re: “Ee, ga ke ešo ka ba le thobalano, e bile e re ke go botše, ke thabišwa ke seo!” Goba o ka re: “Yeo ke taba ya ka, ga ke nagane gore e nyaka wena.” * (Diema 26:4; Bakolose 4:6) Ka lehlakoreng le lengwe, o ka lemoga gore motho yoo o botšiša a nyaka go tseba. Ge e ba go le bjalo, o ka kgetha go mo hlalosetša boemo bja gago bjo bo theilwego Beibeleng.

Na o ka nagana ka dikarabo tše dingwe potšišong ya dikwero e rego, “Na ruri ga o ešo wa ba le thobalano?” Ge e ba di le gona, di ngwale ka mo tlase.

․․․․․

 Mpho e Bohlokwa Kudu

Modimo o ikwa bjang ge batho ba phetha ka go ba le thobalano pele ga lenyalo? Go ba gona, akanya o reketše mogwera wa gago mpho. Eupša mogwera yoo wa gago ka baka la go rata go bona, o e bula pele o ka mo nea yona! Na o be o ka se nyame? Ka gona, nagana kamoo Modimo a tlago go ikwa ka gona ge e ba o ka ba le thobalano pele ga lenyalo. O nyaka gore o lete go fihlela o tsene lenyalong gore o tle o thabele mpho ya thobalano.—Genesi 1:28.

O swanetše go dira’ng ka dikganyogo tša gago tša go nyaka go ba le thobalano? Karabo e bonolo ke ya gore, ithute go di laola. O na le matla a go dira bjalo! Rapela Jehofa gore a go thuše. Moya wa gagwe o ka matlafatša boikemišetšo bja gago bja go bontšha boitshwaro. (Bagalatia 5:22, 23) Ikgopotše gore “bao ba sepelago ka  go hloka bosodi Jehofa yena a ka se ba time selo le ge e le sefe se sebotse.” (Psalme 84:11) Mofsa yo a bitšwago Gordon o re: “Ge ke ikhwetša ke nagana gore go ba le thobalano pele ga lenyalo ga e nape e le sebe se sekaalo, ke naganišiša ka ditlamorago tše mpe tša moya gomme ka lemoga gore ga go na sebe se se ka tlogago se tšeela legato tswalano ya ka le Jehofa.”

Ntlha ke gore, go se be le thobalano pele ga lenyalo ga se semaka goba mohlolo. Boitshwaro bjo bo gobogilego bja tša botona le botshadi ke bjona bjo bo theošago motho seriti, bo mo gobošago le go mmea kotsing. Ka gona o se ke wa dumelela maaka a lefase le a go lahletša gore o nagane gore o na le bothata ge e ba o kgomarela ditekanyetšo tša boitshwaro tša Beibele. Ka go dula o sa be le thobalano pele ga lenyalo, o itšhireletša mmeleng le maikwelong gomme sa bohlokwa le go feta, o šireletša tswalano ya gago le Modimo.

BALA KA MO GO OKETŠEGILEGO MABAPI LE TABA YE GO BOLUMO 1, KGAOLO 24

[Mongwalo wa tlase]

KEY SCRIPTURE

“Ge e ba motho . . . pelong ya gagwe a dirile phetho ya gore a dule a se lenyalong, o tla dira gabotse.”—1 Bakorinthe 7:37.

KELETŠO

O se ke wa gwerana le batho bao ba sa ikemi-šetšago go dula ba itshwere gabotse, gaešita le ge ba ipolela gore ba bodumeding bjo tee le wena.

NA O BE O TSEBA . . . ?

Go na le kgonagalo e kgolo ya gore batho bao ba nago le mekgwa e gobogilego ya thobalano ba se fetoše mekgwa yeo ya bona feela ka gobane ba tsena lenyalong. Go fapana le seo, go na le kgonagalo e kgolo ya gore bao ba botegelago ditekanyetšo tša Modimo tša boitshwaro pele ba tsena lenyalong ba bote-gele balekane ba bona.

KGATO YEO KE TLAGO GO E TŠEA!

Ge e ba ke nyaka go se be le thobalano go fihlela ke tsene lenyalong, ke tla swanelwa ke go ․․․․․

Ge e ba bagwera ba ka ba dira gore ke thatafalelwe ke go phelela boikemišetšo bja ka, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● O nagana gore ke ka baka la’ng batho ba bangwe ba kwera bao ba sa bego le thobalano pele ga lenyalo?

● Ke ka baka la’ng go ka ba thata go se be le thobalano pele ga lenyalo?

● Mehola ya go se be le thobalano go fihlela o tsena lenyalong ke efe?

● O ka hlalosetša bjang moratho wa gago mehola ya go se be le thobalano pele ga lenyalo?

[Ntlhakgolo go letlakala 51]

“Ke kgona go ganetša diteko tša go ba le thobalano ka go dula ke ikgopotša gore ‘ga go na seotswa goba motho wa ditšhila yo a nago le bohwa mmušong wa Modimo.’” (Baefeso 5:5)—Lydia

[Lepokisi go letlakala 49]

Letlakala la go Itlhahloba

Ke Eng Seo Ruri se Diregago ka Morago?

Gantši boithabišo bjo bo tumilego le dithaka tša gago ka bohlale di uta ditlamorago tše di sa kgahlišego tša go ba le thobalano pele ga lenyalo. Ela hloko maemo a mararo ao a latelago. O nagana gore ke’ng seo ruri se tlago go diragalela bafsa ba?

● Morutwana yo o tsenago le yena sekolo o ikgantšha ka gore o šetše a robetše le banenyana ba bantši. O re go bose e bile ga go na yo a gobalago. Ke eng seo ruri se diragalelago yena le banenyana bao ka morago? ․․․․․

● Filimi e fela bafsa ba ba babedi bao ba lego mahlalagading ba sa nyalanago ba eba le thobalano go bontšha gore ba a ratana. Ke eng seo se tlago go direga ka morago ge e ba se se diragetše e le ka kgonthe? ․․․․․

● O kopana le mošemane yo mobotse kudu gomme o go kgopela gore o robale le yena. O go botša gore ga go na yo a tlago go tseba ka seo. Ge e ba o ka dumela go robala le yena e bile wa leka go uta taba yeo, ke eng seo ruri se tlago go direga ka morago?

․․․․․

[Seswantšho go letlakala 54]

Go ba le thobalano pele ga lenyalo go swana le go bula mpho pele o ka e newa