Na o kile wa ipotšiša dipotšišo tše di swanago le tšeo? Ge e ba go le bjalo, ga o noši. Lefaseng ka bophara batho ba naganišiša ka dipotšišo tša bohlokwa bophelong. Na o ka hwetša dikarabo tša dipotšišo tše?

Batho ba dimilione ba re, “Ee!” Ka baka la’ng? Ka gobane ba hweditše dikarabo tše di kgotsofatšago ka Beibeleng. Na o ka rata go tseba seo Beibele e se bolelago? Mohlomongwe o ka rata go holwa ke lenaneo la thuto ya mahala ya Beibele leo le swarwago ke Dihlatse tša Jehofa. *

Ke therešo gore ge go tliwa tabeng ya go hlahloba Beibele, batho ba bangwe ba re: “Ke tloga ke swaregile.” “E thata kudu go ka kwešišwa.” “Ga ke nyake go itlama.” Eupša ba bangwe ba na le pono e fapanego. Ba diriša sebaka se sengwe le se sengwe go ithuta seo Beibele e se rutago. Ela hloko mehlala e sego kae:

• “Nkile ka ya dikerekeng tša Katholika le tša Protestanta, ka ya tempeleng ya ma-Sikh ka ba ka ya lefelong la baitlami la Mabuddha, gomme ka ithuta thutatumelo yunibesithing. Lega go le bjalo, bontši bja dipotšišo tša ka tša mabapi le Modimo ga se tša ka tša arabja. Ke moka Hlatse e nngwe ya Jehofa e ile ya etela legaeng la ka. Ke kgahlilwe ke dikarabo tšeo di theilwego Beibeleng, ke ile ka dumela go ithuta Beibele.”—Gill, Engelane.

• “Ke be ke na le dipotšišo tše dintši ka bophelo, eupša dikarabo tša moruti wa kereke yeo ke bego ke e tsena di be di sa nkgotsofatše. Lega go le bjalo, Hlatse ya Jehofa e ile ya araba dipotšišo tša ka e diriša Beibele feela. Ge Hlatse yeo e botšiša ge e ba ke nyaka go ithuta ka mo go oketšegilego, ke ile ka dumela ka lethabo.”—Koffi, Benin.

• “Ke be ke nyaka go tseba ka boemo bja bahu. Ke be ke dumela gore bahu ba ka gobatša bao ba phelago, eupša ke be ke nyaka go tseba seo Beibele e se bolelago. Ka gona ke ile ka thoma go ithuta Beibele le mogwera’ka yo e bego e le Hlatse.”—José, Brazil.

• “Ke ile ka leka go ithuta Beibele eupša ke be ke sa e kwešiše. Ke moka Dihlatse tša Jehofa di ile tša nketela gomme tša ntlhalosetša diporofeto tše mmalwa tša Beibele ka mo go kwagalago. Ke be ke nyaka go bona se sengwe gape seo ke bego nka ithuta sona.”—Dennize, Mexico.

• “Ke be ke ipotšiša ge e ba Modimo o tloga a na le taba le nna. Ka gona ke ile ka dira phetho ya go rapela Modimo wa Beibele. Letšatšing le le latelago Dihlatse di ile tša kokota mojakong wa ka gomme ka amogela thuto ya Beibele.”—Anju, Nepal.

Diphihlelo tše di re gopotša mantšu a Jesu a rego: “Go thaba bao ba lemogago gore ba nyaka dilo tša moya.” (Mateo 5:3) Ee, ka tlhago batho ba nyaka go tseba Modimo. Ke Modimo feela yo a ka kgotsofatšago dilo tša moya tše ba di nyakago, le gona o dira se ka Lentšu la gagwe e lego Beibele.

Ka gona, thuto ya Beibele e akaretša’ng? E ka go hola bjang? Dipotšišo tše di tla arabja sehlogong se se latelago.