Go ka direga gore o kwešišitše go tšwa dihlogong tše di fetilego gore Mmušo wa Modimo o bolela mo gontši go Dihlatse tša Jehofa. Mohlomongwe o kgahlilwe ke tše dingwe tša ditšhegofatšo tša nakong e tlago tša Mmušo wa Modimo tšeo go boletšwego ka tšona. Ka nako e swanago, o ka ba o ipotšiša ge e ba dikholofetšo tše bjalo e tloga e le tša kgonthe.

O dira gabotse gore o be šedi go e na le gore o dumele selo se sengwe le se sengwe seo o se kwago. (Diema 14:15) Ka ditsela tše dingwe, go ba ga gago šedi go ka swantšhwa le ga Baberea ba bogologolo. * Ge ba be ba thoma go botšwa ka ditaba tše dibotse tša Mmušo wa Modimo, Baberea ba ile ba amogela seo ba bego ba se kwa, eupša e sego feela ka gobane ba be ba nyaka gore seo e be sa therešo. Go e na le moo, ba ile ba hlahloba Mangwalo ka kelohloko “go bona ge e ba dilo tše di be di le bjalo.” (Ditiro 17:11) Ka mantšu a mangwe, Baberea ba be ba bapiša ditaba tše dibotse tšeo ba bego ba di kwa le seo Mangwalo a se bolelago. Ge nako e dutše e eya, ba ile ba kgodišega gore ditaba tše dibotse ge e le gabotse di be di theilwe ka go tia Lentšung la Modimo.

Dihlatse tša Jehofa di go laletša ka borutho gore le wena o dire sona seo. Re diriša lenaneo la rena la mahala la go ithuta Beibele, re go nea sebaka sa gore o bapiše seo Dihlatse tša Jehofa di se dumelago ka Mmušo wa Modimo le seo Beibele e se rutago.

Go oketša tabeng ya go ithuta ga gago ka Mmušo wa Modimo, go ithuta ga gago Beibele go ka go thuša go hwetša dikarabo tša tše dingwe tša dipotšišo tše bohlokwa bophelong.

•   Re tšwa kae?

• Morero wa bophelo ke ofe?

• Ke ka baka la’ng Modimo a dumelela tlaišego?

• Go direga’ng ge re ehwa?

• Na lefase le tla fedišwa?

• Senotlelo sa bophelo bjo bo thabišago bja lapa ke sefe?

Ka godimo ga tšohle, go ithuta Beibele go tla go thuša gore o ‘batamele Modimo.’ (Jakobo 4:8) Ka morago, ge o dutše o batamela kgauswi le Modimo, ke moo o tlago go bona kudu kamoo Mmušo wa Modimo o ka bolelago dilo tše dibotse go wena—e sego gona bjale feela, eupša le ka mo go sa felego. Jesu o boletše ge a be a rapela Tatagwe a re: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”—Johane 17:3.