TABA YA LETLAKALA LA KA NTLE | BEIBELE E BOLELA KA ENG?
Modimo o Rulaganya go Phološa Batho
Modimo o holofeditše Aborahama yo a botegago gore “peu” yeo go boletšwego ka yona e sa le pele e be e tla ba se sengwe sa ditlogolo tša Aborahama. Batho ba “ditšhaba ka moka” ba be ba tla šegofatšwa ka setlogolo seo. (Genesi 22:18) Ka morago setlogolo sa Aborahama e lego Jakobo se ile sa hudugela Egipita, moo lapa la sona le ilego la gola ya ba setšhaba sa Isiraele sa bogologolo.
Ka morago, Farao yo sehlogo o ile a dira Baisiraele makgoba kua Egipita go fihlela Modimo a kgetha moporofeta Moshe, yoo a ilego a ntšha setšhaba seo nageng yeo gomme sa phatša meetseng a Lewatle le Lehwibidu ao a bego a arotšwe ka mohlolo. Ka morago ga moo, Modimo o ile a nea Baisiraele melao, yeo e bego e akaretša Melao e Lesome, gore e ba hlahle le go ba šireletša. Melao yeo e be e hlalosa ka botlalo dibego tša tebalelo ya dibe. A buduletšwe ke Modimo, Moshe o ile a botša Baisiraele gore Modimo o be a tla ba romela moporofeta yo mongwe. Moporofeta yoo e be e tla ba “peu” e holofeditšwego.
Nywaga e ka godimo ga e 400 ka morago, Modimo o ile a holofetša Kgoši Dafida gore motho yo a bego a tla tla, e lego “peu” yeo e bego e boletšwe e sa le pele kua Edene, o be a tla buša mmušong wo o bego e tla ba wa ka mo go sa felego. Yena yoo e be e tla ba Mesia, e lego Mophološi yo a kgethilwego ke Modimo gore a phološe batho le go tsošološa Paradeise lefaseng.
Modimo o ile a tšwela pele a utolla mo gontši ka Mesia a diriša Dafida le baporofeta ba bangwe. Ba ile ba bolela e sa le pele gore Mesia e be e tla ba yo a ikokobeditšego le yo botho le gore ka tlase ga pušo ya gagwe tlala, go hloka toka le ntwa di be di tla fela. Batho ka moka ba be ba tla phedišana ka khutšo gotee le diphoofolo. Bolwetši, tlaišego le lehu—tšeo e bego e se karolo ya morero wa Modimo wa mathomong—di be di tla fela gomme batho bao ba hwilego ba bušetšwa bophelong lefaseng.
Modimo o ile a bolela e sa le pele ka moporofeta Mika gore Mesia o be a tla belegelwa Betlelehema, gomme a bolela ka moporofeta Daniele gore ka morago Mesia o be a tla bolawa. Eupša Modimo o be a tla tsoša Mesia bahung gomme a mo kgetha gore e be Kgoši kua legodimong. Gape Daniele o ile a bona e sa le pele gore Mmušo wa Mesia mafelelong o be o tla tšea sebaka sa mebušo e mengwe ka mo go sa felego. Na ruri Mesia o ile a tla bjalo ka ge go be go porofetilwe?
