O ikwa bjang ka December 21, 2012, e lego letšatšikgwedi la almanaka ya Maya leo ba bantši ba bego ba dutše ba re le tla tliša diphetogo tša lefase ka bophara? Go ithekgile ka seo o bego o se letetše, o ka ikwa o imologile, o nyamile goba o tenegile. Na e be e fo ba polelelopele e nngwe e fošagetšego ka bofelo bja lefase?

Go thwe’ng ka “bofelo bja lefase” bjoo bo hlalositšwego ka Beibeleng? (Mateo 24:3, Phetolelo ya Kgale) Ba bangwe ba boifa gore lefase le tla fišwa ka mollo. Ba bangwe ba kgahlegela ditiragalo tša bofelo bja lefase. Ba bantši ba fo ba ba lapišitšwe ke go botšwa gore bofelo bo kgauswi. Eupša na tšeo e ka ba e le go arabela nonwaneng goba therešong?

O ka makatšwa ke go tseba seo ge e le gabotse Beibele e se bolelago ka bofelo bja lefase. Beibele ga e fo nea mabaka a go fagahlela bofelo eupša gape e bolela ka kgakanego yeo e ka bago gona ge bofelo bo bonagala bo sa fihle ka pela. Re go kgothaletša go ela hloko dikarabo tša Beibele tša dipotšišo tše dingwe tše di tlwaelegilego ka bofelo bja lefase.

KARABO YA BEIBELE: “[Modimo] o theile lefase godimo ga metheo ya lona; le ka se tsoge le thekesetše go iša mehleng ya neng le neng, le ka mo go sa felego.”—PSALME 104:5.

Lefase le ka se fedišwe, e ka ba ka mollo goba ka tsela le ge e le efe. Go e na le moo, Beibele e ruta gore polanete ye ke legae la batho la ka mo go sa felego. Psalme 37:29 e re: “Baloki bona e tla ba beng ba lefase, ba tla dula mo go lona ka mo go sa felego.”—Psalme 115:16; Jesaya 45:18.

Ka morago ga ge Modimo a bopile lefase, o ile a re e be e le ‘le lebotse kudu,’ gomme o sa dutše a ikwa ka tsela yeo. (Genesi 1:31) Go e na le go rera go le fediša, o holofetša go “senya bao ba senyago lefase” le go le šireletša gore le se senyetšwe sa ruri.—Kutollo 11:18.

Lega go le bjalo, o ka ipotšiša ka 2 Petro 3:7. Temana yeo ya Beibele e re: “Magodimo le lefase tšeo gona bjale di lego gona di boloketšwe mollo.” Na se ga se bontšhe gore lefase le tla fišwa ka mollo? Ge e le gabotse, Beibele ka dinako tše dingwe e diriša mantšu “magodimo,” “lefase,” le “mollo” ka tsela ya seswantšhetšo. Ka mohlala, ge Genesi 11:1 e re: “Lefase ka moka le be le bolela leleme letee,” e diriša “lefase” go swantšhetša lekoko la batho.

Taba e dikologilego 2 Petro 3:7 e bontšha gore magodimo, lefase le mollo tšeo go bolelwago ka tšona moo ke tša seswantšhetšo. Ditemana 5 le 6 di bapiša taba ye le Meetsefula a mehleng ya Noa. Lebakeng leo, lefase la bogologolo le ile la fedišwa, eupša polanete ya rena ga se ya ka ya nyamela. Go e na le moo, Meetsefula a ile a fediša lekoko la batho ba šoro, goba “lefase.” A ile a fediša le “magodimo” a mohuta o itšego—batho bao ba bego ba buša lekoko leo la batho. (Genesi 6:11) Ka tsela e swanago, 2 Petro 3:7 e bolela e sa le pele ka phedišo ya sa ruri yeo e swanago le ya mollo ya lekoko le kgopo la batho gotee le mebušo ya lona e nago le bomenetša.

KARABO YA BEIBELE: “Lefase le a feta gomme go bjalo le ka kganyogo ya lona, eupša yo a dirago thato ya Modimo o dula a le gona ka mo go sa felego.”—1 JOHANE 2:17.

“Lefase” leo le tlago go feta ga se polanete ye eupša ke lefase la batho bao maphelo a bona a sa sepedišanego le thato ya Modimo. Go fo swana le ge ngaka ya go bua e ka tloša serurugi seo se nago le kankere bakeng sa go phološa molwetši, Modimo o tla ‘fediša’  ba kgopo e le gore batho ba lokilego ba ka thabela bophelo e le ka kgonthe mo lefaseng. (Psalme 37:9) Ka kgopolo yeo, “bofelo bja lefase” ke selo se sebotse.

Pono e bjalo e nepagetšego ka “bofelo bja lefase” e umakwa ke diphetolelo tša Beibele, tšeo di fetolelago polelwana ye e le “bofelo bja tshepedišo ya dilo,” goba “bofêlô bya mabaka.” (Mateo 24:3; Beibele ya Sepedi) Ka ge go tlo phologa batho le lefase le nakong ya bofelo, na ga go bonagale go kwagala gore mehla e mefsa, tshepedišo e mpsha ya dilo, e be e tla latela? Karabo ya Beibele ke ee, ka gobane e bolela ka “[tshepedišo] e tlago ya dilo.”—Luka 18:30.

Jesu o biditše nako ye yeo e tlago gore ke “go mpshafatšwa ga dilo tšohle.” Nakong yeo, o tla bušetša batho maemong ao Modimo a bego a a rerile mathomong. (Mateo 19:28, New International Version) Nakong yeo re tla thabela

• Lefase la paradeise leo le nago le polokego le katlego.—Jesaya 35:1; Mika 4:4.
• Mošomo wo o nago le morero le o kgotsofatšago. —Jesaya 65:21-23.
• Go fodišwa ga malwetši ka moka.—Jesaya 33:24.
• Go bušetšwa bofseng.—Jobo 33:25.
• Go tsošwa ga bahu.—Johane 5:28, 29.

Ge e ba re dira “thato ya Modimo,” e lego seo a se kgopelago go rena, ga go nyakege gore re boife bofelo bja lefase. Go e na le moo, re ka bo fagahlela.

KARABO YA BEIBELE: “Ge le bona dilo tše di direga, le tsebe gore Mmušo wa Modimo o batametše.”—LUKA 21:31.

Ka pukung ya The Last Days Are Here Again, Moprofesara Richard Kyle o ngwala gore “phetogo yeo e sa letelwago le tšharakano ya tša leago di baka maemo ao a dirago gore go akanyetšwe gore bofelo bja lefase bo tla tla neng.” Go ba bjalo kudukudu ge go bonagala go le thata go hlalosa phetogo yeo gotee le tšharakano.

Lega go le bjalo baporofeta ba Beibele bao ba boletšego ka bofelo ba be ba sa leke go hlalosa ditiragalo tše sa kgahlišego tša mehleng ya bona. Go e na le moo, ba be ba buduletšwe ke Modimo gore ba hlalose maemo ao a bego a tla bontšha bofelo bjo bo batamelago bja lefase. Ela hloko tše dingwe tša diporofeto tšeo gomme o dire phetho ya ge e ba di phethagala mo mehleng ya rena.

•   Dintwa, ditlala, ditšhišinyego tša lefase le mauba a malwetši a bolayago.—Mateo 24:7; Luka 21:11.
• Koketšego e kgolo ya bosenyi.—Mateo 24:12.
• Go senywa ga lefase ke batho.—Kutollo 11:18.
• Batho bao ba ithatago, ba ratago tšhelete le maipshino eupša ba sa rate Modimo.—2 Timotheo 3:2, 4.
• Go phuhlama ga malapa.—2 Timotheo 3:2, 3.
• Go se šetše ga batho ka kakaretšo bohlatse bja gore bofelo bo e tla.—Mateo 24:37-39.
• Go bolelwa ga ditaba tše dibotse tša Mmušo wa Modimo lefaseng ka bophara.—Mateo 24:14.

Bjalo ka ge Jesu a boletše, ge re bona “dilo tše ka moka” a re tsebeng gore bofelo bja lefase bo batametše. (Mateo 24:33) Dihlatse tša Jehofa di dumela gore bohlatse bjoo bo a kgodiša, e bile di botša ba bangwe ka tumelo ya tšona ka go dira boboledi dinageng tše 236.

KARABO YA BEIBELE: “Nakong ya ge batho ba re: ‘Go na le khutšo le polokego,’ ke moo tshenyego ya tšhoganyetšo e tla ba welago gateetee go etša dihlabi tša mosadi wa moimana; ba ka se ke ba phonyokga le gatee.” —1 BATHESALONIKA 5:3.

Beibele e swantšha tshenyego ya lefase le mathomo a lešoko la mosadi wa moimana—dihlabi tša mma yoo ga di phemege e bile di tla gateetee. Nako yeo e lebišago bofelong le yona e swana le boimana, ka gobane mosadi wa moimana o lemoga maswao ao a dulago a oketšega a gore o tlo belega. Ngaka ya gagwe e ka akanyetša nako ya go belega; lega go le bjalo, gaešita le ge tiragalo yeo e ka diega, o tla dula a kgodišegile gore ngwana o tla belegwa go se go ye kae. Ka mo go swanago, ditebelelo le ge e le dife tše fošagetšego mabapi le bofelo ga di fetoše dikarolo tše nepagetšego tšeo di bontšhago gore ye ke ‘mehla ya bofelo.’—2 Timotheo 3:1.

O ka botšiša gore: ‘Ge e ba pontšho ya gore bofelo bo kgauswi e le molaleng ka tsela ye, ke ka baka la eng batho ba palelwa ke go e lemoga?’ Beibele e bontšha gore ge bofelo bo batametše, ba bantši ba tla tšeela fase bohlatse bjoo. Go e na le go dumela gore go na le diphetogo tše dikgolo mehleng ya bofelo, ba tla kwera ka gore: “Ga e sa le go tloga letšatšing leo borakgolokhukhu ba rena  ba robetšego ka lona lehung, dilo tšohle di sa le ka tsela yeo di bego di le ka yona mathomong a tlholo.” (2 Petro 3:3, 4) Ka mantšu a mangwe, pontšho ya mehla ya bofelo e bonagala gabotse, eupša ba bantši ba tla e hlokomologa.—Mateo 24:38, 39.

Sehlogo se se hlahlobile bohlatse bjo bongwe feela bja Mangwalo bja gore bofelo bo kgauswi. * Na o ka rata go ithuta ka mo go oketšegilego? Ge e ba go le bjalo, o re’ng o sa ikgokaganye le Dihlatse tša Jehofa gomme o dumele go ithuta Beibele le tšona ntle le tefo? Di ka ithuta le wena legaeng la gago, goba lefelong le lengwe leo le kgethwago ke wena, goba gaešita le ka mogala. Selo feela seo se nyakegago ke nako ya gago, gomme o tla holega kudu.