Go ba Gotee ga Lapa
“Bona gore ke mo gobotse le mo go kgahlišago gakaakang ge bana ba motho ba dudišana ka botee!”—PSALME 133:1.
Lebaka la ba bangwe la go keteka Keresemose.
Ka ge Baisiraele ka moka e be e le ditlogolo tša monna o tee, Jakobo, goba Isiraele, e be e le “bana ba motho,” ditho tša lapa letee. Ge ba be ba bokana bakeng sa monyanya kua Jerusalema, e be e le “mo gobotse” le “mo go kgahlišago.” Go swana le bona, malapa a mantši lehono a lebelela pele bakeng sa go kopana le go thabela nako e ‘botse’ le e “kgahlišago” ka Keresemose.
Ke ka baka la eng e le tlhohlo?
Encyclopedia of Christmas and New Year’s Celebrations e re: “Mathata a manyenyane ao lapa le bago le ona ngwageng a fetoga a magolo ge lapa le kopana nakong ya maikhutšo.”
Ke melao efe ya motheo ya Beibele yeo e ka thušago?
“Lefa batswadi le borakgolo le bomakgolo ba [gago] seo se ba swanetšego.” (1 Timotheo 5:4) Go fihla bokgoleng bjo bo kgonegago, rulaganyang maeto a ka mehla a go etela ba leloko. Ge ba leloko leno ba dula kgole, o sa dutše o ka kgona go ikgokaganya le bona gantši. O re’ng o sa ngwale lengwalo, wa ba leletša mogala, wa ba romela molaetša ka e-mail, goba wa bolela le bona inthaneteng? Go boledišana le bona ka mehla go fokotša diphapano.
‘Le dikadika go bontšha lerato. Le katološeng lerato.’ (2 Bakorinthe 6:12, 13) Ba leloko bao ba bonwago gatee ka ngwaga ba ka fetoga batho ba šele kapejana—kudukudu go bana. Bana ba bangwe ba nagana gore ga ba swane gakaalo le borakgolo le bomakgolo ba bona goba ba leloko bao ba dulago kgole. Ka baka leo, kgothaletša bana ba gago gore ba ‘katološe’ lerato la bona ka go le bontšha le ba leloko bao ba tšofetšego. * Bana bao ba dulago ba fetša nako le batšofadi ba feleletša ba bontšha batho bao ba ba fetago ka bogolo kwelobohloko le tebogo kutšwanyana.
“Go bolela mantšu a nepagetšego ka nako e swanetšego go kgahliša kudu.” (Diema 15:23, New Century Version) Le ka thibela bjang diphapano goba dikgang gore di se ke tša senya ditswalano tša lapa? Tsela e nngwe ke ka go kgetha “nako e swanetšego” ya go boledišana ka dilo tšeo go tshwenyegilwego ka tšona. Ge e ba le boledišana ka mehla, le tla nolofalelwa ke go boledišana le ditho tša lapa ka sephiring bakeng sa go rarolla mathata le ge e le afe gotee le go thabela dinako tše ‘botse’ le tše “kgahlišago” tša ge le kopana.
^ ser. 9 Bona dihlogo tše rego, “Ke ka Baka La’ng ke Swanetše go Tseba Bo-rakgolo le Bo-makgolo?” le “Nka ba Kgaufsi Bjang le Bo-rakgolo le Bo-makgolo?” ka ditokollong tša Phafoga! tša May 8 le June 8, 2001, tšeo di gatišitšwego ke Dihlatse tša Jehofa.
