NA O tšhoga go swana le batho ba bantši gore bomenetša ga bo phemege e bile bo ka se tsoge bo fedišitšwe ka mo go feletšego? Ge e ba go le bjalo, letšhogo leo le a kwešišega. Go theoša le histori, batho ba lekile mohuta o mongwe le o mongwe woo o ka naganwago wa mmušo. Eupša ga se ba ka ba kgona go fedišetša bomenetša sa ruri. Na go na le kholofelo le ge e le efe ya gore go tla tla nako yeo ka yona batho ba tlago go dirišana ka potego?

Se se thabišago ke gore karabo ya Beibele ke ee! E re botša gore go se go ye kae Modimo o tla gata mogato wa go fediša bomenetša lefaseng la rena. O tla dira bjang seo? O tla se dira ka Mmušo wa gagwe, e lego pušo ya legodimong yeo e tlago go fetošetša lefase la rena sa ruri. Wo ke Mmušo woo Jesu a rutilego balatedi ba gagwe gore ba o rapelele. Thapelong yeo ka dinako tše dingwe e bitšwago Thapelo ya Morena goba Tatawešo, Jesu o itše: “Mmušo wa gago a o tle; thato ya gago a e dirwe mono lefaseng.”—Mateo 6:10, Phetolelo ya Kgale.

 Beibele e bolela e sa le pele mabapi le Mmuši wa Mmušo woo, e lego Jesu Kriste, gore: “O tla hlakodiša modiidi yo a llelago thušo, le mohlaki gotee le mang le mang yo a se nago mothuši. O tla kwela mmotlana le modiidi bohloko, o tla phološa meoya ya badiidi. O tla lopolla moya wa bona kgatelelong le bošorong.” (Psalme 72:12-14) Ela hloko gore Jesu o kwela bohloko batho bao e lego bahlaselwa ba bomenetša, e bile o tla gata mogato wa go fediša kgatelelo! Na seo ga se homotše?

Mmušo wa Modimo o tla fediša bomenetša lefaseng la rena, o eteletšwe pele ke Mmuši yoo yo a nago le kwelobohloko le yo matla. Bjang? Ka go fediša dibaki tše tharo tša bomenetša.

Ga bjale, ka moka ga rena re swanetše go lwantšhana le ditshekamelo tša sebe, tšeo di dirago gore re dire dilo ka boithati. (Baroma 7:21-23) Lega go le bjalo, go na le batho ba lokilego bao ba nyakago go dira se se nepagetšego. Ba dumela moholeng o lopollago wa madi a tšholotšwego a Jesu, e bile ba ka lebalelwa dibe tša bona. * (1 Johane 1:7, 9) Batho ba bjalo ba na le sebaka sa go ka holwa ke tiro e kgolo ya Modimo e lerato, bjalo ka ge re bala go Johane 3:16: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”

Modimo o tla direla batho ba botegago selo se se kgahlišago e le ruri. Lefaseng le lefsa leo le tlago, o tla feleletša a fedišitše mehlala ka moka ya sebe le go bušetša batho ba botegago ganyenyane-ganyenyane phethegong gotee le go dira gore ba be le boemo bjo bo lokilego. (Jesaya 26:9; 2 Petro 3:13) Le ka mohla tutuetšo ya sebe e ka se sa hlwa e dira gore motho le ge e le ofe a dire dilo ka bomenetša. Ka tlase ga pušo ya Mmušo wa Modimo, batho ba botegago ba tla “[lokollwa] bokgobeng bja tshenyego.”—Baroma 8:20-22.

Ka manyami, batho ba bantši lehono ba swara batho ba bangwe gampe ka boomo. Ba ikhola ka batho ba maemo a tlasana le badiidi, e bile ba tutueletša ba bangwe gore le bona ba dire dilo ka bomenetša. Beibele e lemoša batho ba bjalo ka gore: “Anke motho yo kgopo a tlogele tsela ya gagwe, le yo kotsi a tlogele menagano ya gagwe.” Beibele e holofetša gore ge e ba batho ba bjalo ba nago le bomenetša ba itshola, Modimo “o tla [ba] lebalela kudu.”—Jesaya 55:7.

Lega go le bjalo, Modimo a ka se be le kgetho eupša o tla fediša bao ka kgang ba ganago go fetoša ditsela tša bona. Mmušo wa Modimo o tla phethagatša kholofetšo ya Beibele e rego: “Holofela Jehofa gomme o lote tsela ya gagwe . . . Wena o tla bona ge ba kgopo ba fedišwa.” * (Psalme 37:34) Barapedi bao ba botegago ba Modimo e ka se sa ba bahlaselwa ba bomenetša ge batho ba kgopo bao ba ganago go fetoga ba se sa le gona.

Yo mogolo wa badiradibe ba thata ke Sathane Diabolo. Re ka leboga kudu gore go se go ye kae Jehofa o tla thibela Sathane gore a se sa tutuetša batho. Mafelelong, Modimo o tla fedišetša Sathane sa ruri. Le ka mohla sephedi seo se kgopo ka go fetišiša se ka se sa tutueletša batho go dira dilo ka bomenetša.

Ke therešo gore kgopolo ya gore Modimo o tla fediša dibaki ka moka tša bomenetša e ka bonagala e le toro feela. O ka ipotšiša gore, ‘Na ruri Modimo a ka kgona go tliša diphetogo tše bjalo? Ge e ba go le bjalo, ke ka baka la’ng a se a hlwa a di tliša?’ Tšeo ke dipotšišo tše dibotse, gomme Beibele e nea dikarabo tše di kgotsofatšago. * Re go laletša gore o itlhahlobele seo Beibele e se rutago mabapi le seo se tlago go direga go se go ye kae, nakong ya ge bomenetša ka moka bo tla be bo se sa le gona.