Go Tsoma Dikarabo
Go Tsoma Dikarabo
“Mo e ka bago motho yo mongwe le yo mongwe o na le kgopolo ya gagwe mabapi le gore [Jesu] ke mang. Go sa šetšwe tekanyo ya tumelo ya rena goba go se kgodišege mo go itšego, ka moka re ipotšiša gore, ‘Motho yo ke mang?’”—MONGWADI STAN GUTHRIE.
BATHO ba ipotšiša dipotšišo mabapi le Jesu. Dipuku tšeo di bolelago ka yena di rekwa kudu. Difilimi tša mabapi le yena di ratwa kudu. Lega go le bjalo, go sa dutše go ena le dipotšišo ka Jesu. Batho ba na le dipono tše sa swanego mabapi le gore ge e le gabotse Jesu e be e le mang.
Nywageng e mmalwa e fetilego, boraditaba ba babedi ba ile ba laletša batho ka Inthanete gore ba arabe potšišo e rego, “Jesu e be e le mang?” Dikarabo di be di akaretša tše di latelago:
● “Go bonagala e be e le rabi (morutiši) yoo a bego a phela ka tsela ya go bea mohlala wa go bontšha kwelobohloko.”
● “E be e le motho yo a tlwaelegilego yoo a bego a phela bophelo bjo bo sa tlwaelegago.”
● “Ga go na bohlatse bjo bo bontšhago gore Jesu o kile a ba gona.”
● “Jesu ke Morwa wa Modimo yoo a ilego a belegwa, a hwa gomme a tsošwa bahung e le gore a re phološe dibeng tša rena. Lehono o a phela, gomme O tla tla gape lefaseng.”
● “Ke dumela gore Jesu Kriste ke morwa a nnoši wa Modimo, motho yo a feletšego le Modimo yo a feletšego, bobedi ka nako e swanago.”
● “Jesu ke nonwane ya bana bao ba gotšego.”
Go a kwagala gore dipono tše bjalo tše di fapanago kudu e ka se be tše nepagetšego ka moka ga tšona. Na go na le mothopo o ka botwago wa tsebišo woo o ka neago dikarabo tše ka botwago tša dipotšišo tša rena mabapi le Jesu? Bagatiši ba makasine wo ba dumela gore Beibele ke Lentšu la Modimo le gore ke yona e nnoši yeo e re botšago therešo e feletšego mabapi le Jesu. *—2 Timotheo 3:16.
Sehlogong se se latelago, re tla ahlaahla dikarabo tša Beibele tša dipotšišo tše dingwe tše tlwaelegilego mabapi le Jesu. O boletše ka boyena gore tsela ya phološo e bulegetše “yo mongwe le yo mongwe yo a dumelago go yena.” (Johane 3:16) Re go laletša gore o hlahlobe dikarabo ke moka o itirele phetho ya ge e ba o nyaka go ithuta ka mo go oketšegilego mabapi le Jesu le kamoo o ka bontšhago tumelo go yena ka gona.
[Mongwalo wa ka tlase]
^ ser. 11 Bakeng sa tsebišo e oketšegilego, bona kgaolo 2, e rego “Beibele—Puku e Tšwago go Modimo,” ka pukung ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.
