“Dula Lentšung la ka”

“Ge e ba le dula lentšung la ka, gona le barutiwa ba ka e le ka kgonthe, le tla tseba therešo gomme therešo e tla le lokolla.”—JOHANE 8:31, 32.

Seo go se Bolelago: ‘Lentšu’ la Jesu le bolela dithuto tša gagwe, tšeo di bego di etšwa mothopong o phagamego. Jesu o itše: “Tate yo a nthomilego ka noši o nneile taelo mabapi le seo ge e le gabotse ke swanetšego go se bolela le go se ruta.” (Johane 12:49) Ge a be a rapela Tatagwe wa legodimong, Jehofa Modimo, Jesu o ile a re: “Lentšu la gago ke therešo.” Gantši o be a tsopola Lentšung la Modimo go thekga dithuto tša gagwe. (Johane 17:17; Mateo 4:4, 7, 10) Ka gona, Bakriste ba therešo ba ‘dula lentšung la gagwe’—ke gore, ba amogela Lentšu la Modimo, Beibele, e le “therešo” le mothopo o mogolo wa ditumelo tša bona le mekgwa ya bona.

Kamoo Bakriste ba Pele ba Bontšhitšego se ka Gona: Mongwadi wa Mokriste wa mangwalo a mantši a Beibele, e lego moapostola Paulo, o be a swana le Jesu ka go hlompha Lentšu la Modimo. O ngwadile gore: “Lengwalo ka moka le buduletšwe ke Modimo gomme le [a] hola.” (2 Timotheo 3:16) Banna bao ba bego ba kgethilwe bakeng sa go ruta Bakristegotee le bona ba be ba swanetše “go swarelela ka go tia Lentšung la Modimo le le kgonthišeditšwego le leo le botegago.” (Tito 1:7, 9, The Amplified Bible) Bakriste ba pele ba be ba neilwe keletšo ya go ganetša “filosofi le bofora bja lefeela go ya ka tlwaelo ya batho, go ya ka dilo tša motheo tša lefase, e sego go ya ka Kriste.”—Bakolose 2:8.

Ke Bomang ba Latelago Mohlala wo Lehono?: Go ya ka Dogmatic Constitution on Divine Revelation ya Vatican, yeo e amogetšwego ka 1965 le go tsopolwa ka go Catechism of the Catholic Church: “Kereke ya [Katholika] ga e hwetše kgonthišetšo mabapi le dilo tšohle tšeo di utolotšwego Lengwalong le Lekgethwa feela. Ka gona, moetlo o mokgethwa gotee le Lengwalo le Lekgethwa di swanetše go amogelwa le go godišwa ka boineelo le tlhompho tše di swanago.” Sehlogo se sengwe ka makasineng wa Maclean se tsopotše moruti yo mongwe wa Toronto, Canada, yoo a botšišitšego gore: “Ke ka baka la’ng re nyaka go hlahlwa ke lentšu la go dira diphetogo la nywagaketeng e mebedi e fetilego? Re na le ditšhišinyo tše dibotse, tšeo di fokodišwago leboelela ge di dutše di tswalanywa le Jesu le Mangwalo.”

Ge e bolela ka Dihlatse tša Jehofa, New Catholic Encyclopedia e re: “Di lebelela Beibele e le mothopo o nnoši wa tšona wa tumelo le tekanyetšo ya boitshwaro.” Morago bjale, monna yo mongwe kua Canada o ile a šitiša yo mongwe wa Dihlatse tša Jehofa ge a be a itsebiša. O ile a šupa Beibele ya gagwe a re, “Ke a tseba gore le bomang, ke le tseba ka leswao la lena.”