Beibele e Fetoša Maphelo

KE’NG seo se šušumeleditšego kgarebe yeo e bego e tlogetše tsela ya bodumedi yeo e godišitšwego ka yona gore e boele go yona? Bala seo e se bolelago.

“Ga Bjale ke na le Morero wa Kgonthe Bophelong.”—LISA ANDRÉ

NGWAGA WA MATSWALO: 1986

NAGA: LUXEMBOURG

BOPHELO BJA PELE E EBA MOKRISTE: NGWANA WA LEHLASWA

BOPHELO BJA KA BJA NAKONG E FETILEGO: Ke goletše Bertrange, e lego torotswana e hlwekilego, e šireletšegilego le e atlegilego ya kgauswi le toropo ya Luxembourg. Ke yo monyenyane wa bana ba bahlano. Batswadi ba ka ke Dihlatse tša Jehofa gomme ba šomile ka thata go ruta dikgaetšedi tša ka, bomogolwake le nna ditekanyetšo tša Bokriste.

Ge ke tsena nywageng ya ka ya mathomo ya mahlalagading, ke ile ka thoma go ba le dipelaelo tše kgolo ka dithuto tša Dihlatse tša Jehofa. Mathomong, ke ile ka hlokomologa dipelaelo tše, eupša tumelo ya ka e ile ya fokola ganyenyane-ganyenyane. Batswadi ba ka ba dirile sohle seo ba ka se kgonago go ntlhahla tseleng ya go loka, eupša ke ile ka gana thušo ya bona. Ke be ke fetša nako le bafsa bao ba bego ba sa hlomphe taolo gakaalo batswadi ba ka ba sa tsebe. Ke be ke nyaka tokologo yeo tsela ya bona ya bophelo e bego e bonagala e e nea. Re be re dula re le meletlong, re eba le dithobalano tše di gobogilego e bile re diriša dihlaretagi le bjala gampe. Mathomong ke be ke thabela go ba le batho bao ba bego ba bonagala ba thabela bophelo ka botlalo.

Lega go le bjalo, ge e le gabotse ke be ke se ka thaba e le ka kgonthe. Go phela le bagwera bao go be go tloga go se na mohola; go be go se na yoo a bego a naganišiša ka selo le ge e le sefe. Ka mo go fapanego, ke be ke tshwenywa ke dikgang tše bjalo ka go hloka toka mo go atilego lefaseng. Ge nako e dutše e eya, ke ile ka ikwa ke gateletšegile le go feta.

KAMOO BEIBELE E FETOTŠEGO BOPHELO BJA KA: Letšatšing le lengwe ge ke be ke ena le nywaga e 17, ke ile ka ikwa ke gateletšegile. Ge a lemoga kamoo ke bego ke se ka thaba ka gona, mma o ile a nkgopela gore ke ithute Beibele gape. O ile a nkgothaletša gore ke hlahlobe dithuto tša yona gomme ke dire phetho ya ge e ba ke nyaka go phela ka go dumelelana le tšona goba ya go se dire bjalo. Poledišano yeo ya go tšhollelana sa mafahleng e ile ya nthuša go fetoga. Ke ile ka dumela go ithuta Beibele le mogolwake Caroline le monna wa gagwe, Akif. Akif o be a se a godišwa ke Dihlatse tša Jehofa eupša o ile a fetoga Hlatse ge a godile. Ka baka la bophelo bja Akif bja nakong e fetilego, ke be ke ikwa nka kgona  go boledišana le yena ka bolokologi gomme ke bona seo se le bohlokwa.

Ke be ke tseba gore tsela ya ka ya bophelo ga e swanele Dihlatse, eupša mathomong ke be ke nagana gore bophelo bja ka bo be bo sa kgome ba bangwe. Lega go le bjalo, ge ke ithuta Beibele ke ile ka lemoga gore boitshwaro bja ka bo kgoma maikwelo a Jehofa. (Psalme 78:40, 41; Diema 27:11) Ke ile ka lemoga le gore bo be bo kgoma le batho ba bangwe.

Ge ke be ke hlahloba Beibele go ya pele, ke ile ka lemoga gore go be go ena le mabaka a kwagalago le a kgodišago a go dumela gore ke Lentšu la Modimo. Ka mohlala, ke ile ka ithuta ka diporofeto tše mmalwa tša Beibele tšeo di phethagetšego—tšeo di nepagetšego ka tsela e makatšago. Tsebo e bjalo e ile ya nthuša go fediša dipelaelo tša ka tša nakong e fetilego.

Mo e ka bago ngwaga ka morago ga ge ke thomile go ithuta Beibele, nna le batswadi ba ka re ile ra etela kgaetšedi ya ka yo mogolo yoo e bego e le moithaopi ofising ya lekala ya Dihlatse tša Jehofa ya Jeremane. Ge ke be ke bona kamoo kgaetšedi ya ka a bego a thabile ka gona, ke ile ka kgomega kudu. Lethabo leo ke sona seo ke bego ke se nyaka! Ke ile ka kgahlwa le ke Dihlatse tše dingwe tšeo le tšona e bego e le baithaopi moo. Ba be ba tloga ba sa swane le batho ba se nago therešo le ba go tsomana le boithabišo bja go lekela hlogong bao ke bego ke tlwaelane le bona. Kapejana ka morago ga moo, ke ile ka rapela Jehofa go tšwa pelong, ke mo holofetša gore ke nyaka go mo hlankela bophelo bja ka ka moka. Ge ke ena le nywaga e 19, ke ile ka bontšha gore ke be ke ineetše go Jehofa ka go kolobetšwa.

KAMOO KE ILEGO KA HOLEGA KA GONA: Ga bjale ke na le morero wa kgonthe bophelong. Ke thabišwa ke go ruta ba bangwe ka Beibele, ke ba thuša go ithuta ka Jehofa le ka dikholofetšo tša gagwe tša bokamoso. Lapa lešo le lona le ile la holega—ga le sa tshwenyega ka nna.

Ke sa gopola diphošo tša ka tša nakong e fetilego, eupša ke leka go se dule ke nagana ka tšona. Go e na le moo, ke lebiša tlhokomelo tebalelong ya Jehofa le go tshwenyegeng ga gagwe ka nna ka tsela e lerato. Ke dumelelana le mantšu a Diema 10:22 ka pelo ya ka ka moka, ao a rego: “Tšhegofatšo ya Jehofa e a humiša, ga a e okeletše ka bohloko.”

[Ntlhakgolo go letlakala 12]

“Re be re dula re le meletlong, re eba le dithobalano tše di gobogilego e bile re diriša dihlaretagi le bjala gampe”

[Ntlhakgolo go letlakala 13]

“Ke sa gopola diphošo tša ka tša nakong e fetilego, eupša ke leka go se dule ke nagana ka tšona”