Kgokagano le Lefelo la Moya

MODIMO RAMATLA-OHLE o ile a fa dibopiwa tše dingwe tša moya boikarabelo bjo itšego. Ka mohlala, o file Jesu Kriste bogoši bja lefase, e bile o kgethile barongwa ba botegago gore ba thuše go hlahla go tsebatšwa ga ditaba tše dibotse. (Kutollo 14:6) Lega go le bjalo, dithapelo di fapane. Ga se a fetišetša go motho yo mongwe boikarabelo bja go kwa dithapelo. Dithapelo di swanetše go lebišwa go Modimo feela.

Jehofa ke “Mokwi wa dithapêlô.” (Psalme 65:2) O theetša dithapelo tša rena e bile o a di araba. Moapostola Johane o ngwaletše bahlanka-gotee le yena ba Jehofa mabapi le thapelo gore: “Go sa šetšwe seo re se kgopelago go ya ka thato ya gagwe, [Modimo] o a re kwa. Go feta moo, ge e ba re tseba gore o a re kwa mabapi le se sengwe le se sengwe se re se kgopelago, gona re tseba gore re tla ba le dilo tše re di kgopelago ka ge re di kgopetše go yena.”—1 Johane 5:14, 15.

Barongwa ba botegago ga ba nyake re ikgokaganya le bona goba re ba rapela. Ba a kwešiša e bile ba dira ka go dumelelana le tokišetšo ya Modimo ya thapelo, yeo ka dinako tše dingwe e ba akaretšago ka go lebanya. Ka tsela efe? Go ba gona, ge moporofeta Daniele a be a rapela Jehofa mabapi le go senywa ga Jerusalema, Modimo o ile a araba thapelo ya Daniele ka go  romela morongwa Gabariele gore a mmotše molaetša o kgothatšago.—Daniele 9:3, 20-22.

Na ke Melaetša e Tšwago go Bahu?

Na re swanetše go leka go ikgokaganya le bahu? Dikanegelo tše dintši di bolela ka dipoledišano tšeo batho ba rego ba bile le tšona le meoya ya bahu. Ka mohlala, mosadi yo mongwe wa kua Ireland o ile a boledišwa ke senoge, seo se ilego sa bolela gore bošegong bja go feta, se ile sa boledišana le Fred, e lego monna wa mosadi yoo. Lega go le bjalo, Fred o be a e-na le dibeke tše mmalwa a hwile. Senoge seo se ile sa tšwela pele se anega seo “Fred” a se boletšego, dilo tšeo mosadi wa gagwe a bego a dumela gore di tsebja ke yena feela. Go swanetše go ba go bile bonolo go yena go phetha ka gore Fred o be a phela lefaseng la moya le gore o be a leka go ikgokaganya le yena a diriša motho o šele yoo. Lega go le bjalo, phetho yeo e be e tla thulana le seo Beibele e se bolelago ka boemo bja bahu.—Bona lepokisi le le lego ka mo tlase.

Bjale, dikanegelo tše bjalo di ka hlaloswa bjang? Tsela yeo batemona ba e dirišago ya go fora batho ke ka go itira bahu, gomme boemong bjo ba be ba itira Fred. Ka morero ofe? Ka morero wa go aroša batho go seo Beibele e se rutago le go fokodiša tumelo ya bona le go bota ga bona Jehofa. Ka ntle le pelaelo, Sathane le batemona ba timetša batho “ka modiro o mongwe le o mongwe o matla le dipontšho le dika tša bofora le ka bofora bjo bongwe le bjo bongwe bjo bo sa lokago go bao ba lahlegago.”—2 Bathesalonika 2:9, 10.

Taba ke gore go na le dinoge gotee le bao ba  dirišanago le tšona bao ba tlogago ba dumela gore ba ikgokaganya le bahu. Ge e le gabotse, ge e le gore go na le yoo ba ikgokaganyago le yena, ba ikgokaganya le meoya yeo e lego manaba a Jehofa. Ka mo go swanago, go na le bao ba dumelago gore ba rapela Modimo eupša go se bjalo. Moapostola Paulo o ile a budulelwa go ngwala temošo ye e matla: “Dilo tšeo ditšhaba di di dirago dihlabelo di di hlabela batemona, e sego Modimo.”—1 Bakorinthe 10:20, 21.

Ke ka baka la’ng re ka nyaka go rapela motho yo mongwe mola re tseba gore re ka rapela Yo a Phagamego, yoo a re ratago le go re hlokomela? Go ba gona, Beibele e re kgonthišetša ka gore: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”—2 Koronika 16:9.

[Ntlhakgolo go letlakala 9]

Ke ka baka la’ng re ka nyaka go rapela motho yo mongwe mola re tseba gore re ka rapela Modimo yo a Phagamego, yoo a re ratago le go re hlokomela?

[Lepokisi/​Seswantšho go letlakala 8, 9]

Therešo le Boikgopolelo

THEREŠO: SATHANE KE MOTHO WA KGONTHE

“Sathane ka boyena o dula a itira morongwa wa seetša.”—2 Bakorinthe 11:14.

“Dulang le hlaphogetšwe, le phakgame. Lenaba la lena, Diabolo, o sepela-sepela go swana le tau e rorago, a nyaka go metša yo mongwe.”—1 Petro 5:8.

“Yo a tšwelago pele a dira sebe o tšwa go Diabolo, gobane Diabolo o be a dutše a dira sebe go tloga mathomong.”—1 Johane 3:8.

“Ka gona, ikokobeletšeng Modimo; eupša le ganetše Diabolo, o tla le tšhaba.”—Jakobo 4:7.

“Diabolo . . . e bile mmolai wa batho go tloga mathomong, gomme ga se a ka a ema a tiile therešong, gobane therešo ga e gona go yena. Ge a bolela maaka o bolela go ya ka tshekamelo ya gagwe, gobane ke moaketši le tatago maaka.”—Johane 8:44.

BOIKGOPOLELO: BATHO KA MOKA GE BA E-HWA BA FETELA LEFELONG LA MOYA

“Boxôbê O tlo bo ja ka dikudumêla tša sefahloxô sa xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.”—Genesi 3:19.

“Ba ba phelaxo ba tseba xore ba tlo hwa; ’me xo bahu xa xo se se tsebyaxo.”—Mmoledi 9:5.

“Tšohle tše ’atla sa xaxo se di kxônaxo, di dirê ka matla a xaxo, xobane kwa bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.”—Mmoledi 9:10.

“Môya wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.”—Psalme 146:4.

THEREŠO: BARONGWA BA BOTEGAGO BA A RE HLOKOMELA

“Morongwa wa Morêna ó xoraxorêla ba ba mmoifaxo; ó a ba namolêla.”—Psalme 34:7; 91:11.

“Na ka moka ga bona [barongwa] ga se meoya ya go direla setšhaba, yeo e romelwago go direla bao ba tlago go rua phologo e le bohwa?”—Baheberu 1:14.

“Ka bona morongwa yo mongwe a fofa gare ga legodimo a e-na le ditaba tše dibotse tša ka mo go sa felego gore a di tsebiše e le ditaba tše di thabišago go bao ba dulago lefaseng, le go ditšhaba tšohle le meloko yohle le maleme ohle le batho bohle, a bolela ka lentšu le le hlabošago a re: ‘Boifang Modimo gomme le mo nee letago.’”—Kutollo 14:6, 7.

BOIKGOPOLELO: JESU O LEKANA LE MODIMO

“Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.”—1 Bakorinthe 11:3.

“Ge dilo tšohle di tla ba di beilwe ka tlase ga gagwe, ke moka Morwa le yena o tla ipea ka tlase ga Yo a beilego dilo tšohle ka tlase ga gagwe, gore Modimo e be tšohle go yo mongwe le yo mongwe.”—1 Bakorinthe 15:28.

“Ruri-ruri ke re go lena, Morwa a ka se dire selo le se tee ka la gagwe, eupša o dira feela seo a bonago Tate a se dira.”—Johane 5:19.