Ruri Modimo o na le Taba le Rena​—Kamoo re Tsebago ka Gona

KE POTŠIŠO ya kgale eupša ke e bohlokwa, yeo batho ba eleleditšego ka yona ka nywaga-kgolo: Ge e ba Modimo a re rata, ke ka baka la’ng go e-na le tlaišego e kaakaa? Mohlomongwe o dumela gore ge o rata motho, ga o nyake gore motho yoo a tlaišege gomme ge e ba a le mathateng, o be o tla leka go mo thuša. Ka baka leo, ba bantši ba nagana gore ka ge go tletše tlaišego lefaseng, go ra gore Modimo ga a na taba le rena. Ka gona, go bohlokwa gore re thomeng ka go ela hloko bohlatse bja gore Modimo o re rata e le ka kgonthe, le gore o na le taba le rena.

Tlholo e Hlatsela Gore Modimo o a re Rata

Jehofa Modimo ke “[yena] Yo a dirilego legodimo le lefase le lewatle le dilo ka moka tše di lego go lona.” (Ditiro 4:24) Ge re nagana ka seo Jehofa a se hlodilego, ka ntle le pelaelo re swanetše go phetha ka gore o na le taba le rena. Ka mohlala, nagana ka dilo tšeo di dirago gore o thabe. Na o rata dijo tše bose? Jehofa a ka ba a ile a dira mohuta o tee wa dijo bakeng sa go thekga bophelo bja rena. Go e na le moo, o hlotše mehuta-huta ya dijo tšeo magalagapa a rena a di thabelago. Ka mo  go swanago, Jehofa o apešitše lefase ka mehlare e mentši e kgahlišago, matšoba gotee le ponagalo e botse ya naga bakeng sa go dira gore re thabišwe le go kgahlišwa ke bophelo.

Ela hloko le tsela yeo re dirilwego ka yona. Go rata ga rena metlae, bokgoni bja rena bja go thabela mmino le bja go lemoga bobotse bja dilo ga se gore di thekga bophelo—ka moka ke dimpho tše tšwago go Modimo tšeo di humišago bophelo bja rena. Le gona nagana ka tswalano ya gago le ba bangwe. Ke mang yo a sa thabelego bogwera bjo borutho bja bagwera ba babotse goba go gokarwa ke motho yoo a mo ratago kudu? Ruri bokgoni bja go rata ke mpho e tšwago go Modimo yo lerato! Ka ge Modimo a bopile batho ba e-na le bokgoni bja go rata, seka seo e swanetše go ba e le karolo ya semelo sa Modimo.

Beibele e re Kgonthišetša Gore Modimo o a re Rata

Beibele e re botša gore Modimo ke lerato. (1 Johane 4:8) Lerato la gagwe ga le bonagale feela tlholong eupša gape le hlatselwa ke Lentšu la gagwe, Beibele. Ka mohlala, Beibele e nea tlhahlo yeo e dirago gore re phele gabotse mmeleng, e kgothaletša go lekanyetša dilong tšohle gomme ya lemoša malebana le botagwa gotee le bojagobe.—1 Bakorinthe 6:9, 10.

Beibele gape e nea keletšo mabapi le ditirišano le batho, ka go re kgothaletša go ratana le go swarana ka tlhompho, ka seriti le ka botho. (Mateo 7:12) E ganetša mekgwa yeo e bakago tlaišego—megabaru, lesebo, lehufa, bohlotlolo le go bolaya. Ge e ba yo mongwe le yo mongwe a be a leka go phela ka go dumelelana le keletšo ye e botse yeo e hwetšwago ka Mangwalong, ruri tlaišego e ka be e se e kaalo lefaseng ka bophara.

Lega go le bjalo, pontšho e kgolo kudu ya lerato la Modimo e bile go gafa Morwa wa gagwe, Jesu, bakeng sa go lopolla moloko wa batho. Johane 3:16 e re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” Ka go rialo, Jehofa o šetše a rulagantše go fedišetša sa ruri lehu gotee le mohuta o mongwe le o mongwe wa tlaišego.—1 Johane 3:8.

Ka ntle le pelaelo, go na le bohlatse bjo bontši bja gore Jehofa o a re rata. Ka gona, ke mo go kwagalago gore Modimo ga a kgahlwe ke ge re tlaišega. O tla gata mogato wa go fediša tlaišego. Ga se ra swanela go belaela tabeng ye—Beibele e re botša ka go lebanya kamoo Modimo a tlago go fediša tlaišego ka gona.

[Seswantšho go letlakala 4]

Bokgoni bja go rata ke mpho e tšwago go Modimo yo lerato