Itšhireletše Kgahlanong le Meoya e Kgopo

JAMES o ile a godišetšwa karolong yeo e lego lekatana ya sehlakahlaka sa Malaita, kua Dihlakahlakeng tša Solomon. O ile a rutwa go hlompha meoya go tloga bjaneng. O re: “Le ka mohla ga se nke ka kgopela meoya gore e gobatše batho ba bangwe, eupša ke be ke sa nagane gore go a kgonega gore ke dule ke thabile bophelong ntle le go diriša rarafono [mekgwa ya setšo yeo e dirišwago go kgopela thušo go meoya] bakeng sa go itšhireletša kotsing.”

Go swana le batho ba bantši dikarolong tše dintši tša lefase, badudi ba Dihlakahlakeng tša Solomon ba dumela gore meoya e ka thuša motho goba ya mo gobatša. Ge e le gabotse, ba-Melanesia ba bantši ba lebelela seo go thwego ke meoya e botse ka lerato, e sego ka poifo.

Tumelo ya gore meoya e ka hola goba ya gobatša batho e bonagala ka ditsela tše dintši. Ka mohlala, ge James e be e sa le yo monyenyane, basadi ba motseng wa gabo ba be ba iša bana ka ntlong ka lebelo ge ba e-kwa molodi wa nonyana yeo e bitšwago korokoro (koel e tlwaelegilego). Ka baka la’ng? Ba be ba dumela gore ge nonyana yeo e letša molodi, motho yo mongwe o be a le kgaufsi le go gobala.

Badudi ba bangwe ba be ba bea lefsika le lešweu le le kgethegilego ka godimo ga mabati a dintlo tša bona. James o be a dira se, a dumela gore lefsika leo le tla mo šireletša kgahlanong le meoya e kotsi. Le gona, ge James a be a le mošomong, o be a olela marathana a dijo tša gagwe tša matena gomme a a tšhela ka mokotleng e le gore a ka a lahla ka morago. Seo a bego a tshwenyegile kudu ka sona e be e le gore moloi a se ke a hwetša marathana ao gomme a mo loya gore a babje.

Gaešita le ge mekgwa ye e ka ba e sa tlwaelega karolong yeo o dulago go yona, mohlomongwe go swana le James o ile wa kwa go nyakega gore o latele mekgwa ya setšo e le gore o šireletšwe go meoya e kgopo. O ka ba o dumela gore ge e ba o sa tšee karolo mekgweng e bjalo ya setšo go na le kotsi e kago go wela.

Ge e ba o hlompha Beibele, ga go pelaelo gore o nyaka go tseba kamoo e arabago dipotšišo tše di latelago ka gona: (1) Meoya e kgopo e ka go gobatša bjang? (2) Ge e le gabotse, na go latela metlwae e itšego ya setšo go ka dira gore o laolwe ke batemona? (3) O ka hwetša bjang tšhireletšo ya kgonthe kgahlanong le meoya e kgopo gomme wa thaba?

 Kamoo Meoya e Kgopo e Gobatšago ka Gona

Beibele e utolla gore ga go kgonege gore meoya e kgopo e be ya batho bao ba hwilego. Lentšu la Modimo le re: “Ba ba phelaxo ba tseba xore ba tlo hwa; ’me xo bahu xa xo se se tsebyaxo.” (Mmoledi 9:5) Meoya e kgopo ge e le gabotse ke barongwa ba marabele bao ba tladitšego Sathane ge a leka go timetša batho.—Kutollo 12:9.

Mangwalo a bolela thwii gore re nyaka tšhireletšo kgahlanong le meoya e kgopo. Moapostola Paulo o ngwaletše Bakriste ba Efeso gore: “Ga re kakadipane le madi le nama, eupša re kakadipana . . . le madira a kgopo a moya mafelong a legodimong.” Moapostola Petro o hlalositše gore mmuši wa meoya ka moka e kgopo, Sathane Diabolo, o bjalo ka ‘tau e rorago, e nyaka go metša yo mongwe.’—Baefeso 6:12; 1 Petro 5:8.

Sathane o gobatša batho kudu-kudu ka go ba timetša, go ba fora goba ka go ba leka gore ba dire dilo tšeo di sa kgahlego Modimo. Beibele e re Sathane “o dula a itira morongwa wa seetša.” (2 Bakorinthe 11:14) O itira eka ke moya o šireletšago mola ge e le gabotse maikemišetšo a gagwe e le a kgopo. Sathane o foufatša menagano ya batho gore e se ke ya phadimelwa ke therešo ya mabapi le yena le therešo ka Modimo. (2 Bakorinthe 4:4) Maikemišetšo a gagwe a go timetša batho ke afe?

Sathane o duma go rapelwa gomme o nyaka batho ba mo nea borapedi bjo bjalo, ba tseba goba ba sa tsebe. Ge Morwa wa Modimo, Jesu, a be a le lefaseng, Sathane o ile a re a ‘wele fase a mo direle tiro ya borapedi.’ Jesu o ile a re: “Tloga, Sathane! Gobane go ngwadilwe gwa thwe, ‘Ke Jehofa Modimo wa gago yo o swanetšego go mo rapela.’” (Mateo 4:9, 10) Jesu o ile a gana go dira selo le ge e le sefe seo se bego se tla bonagala e le go ikokobeletša Sathane ka tsela ya borapedi.

Jehofa ke yo matla kudu go feta meoya ka moka gomme a ka se ke a dumelela tlaišo le ge e le efe ya ka mo go sa felego e wela bao ba mo kwago. (Psalme 83:18; Baroma 16:20) Eupša ge e ba re nyaka go kgahla Jehofa Modimo go swana le ge Jesu a dirile, re swanetše go phema tiro le ge e le efe ya go ikokobeletša Sathane le batemona ba gagwe. Gore re kgone go dira bjalo, re swanetše go tseba mekgwa ya setšo yeo e neago madira a kgopo a moya tlhompho ya borapedi. O ka dira seo bjang?

Tseba Metlwae Yeo e sa Kgahlišego Modimo

Jehofa Modimo o lemošitše batho ba gagwe ba bogologolo, Baisiraele, mabapi le go ekiša mekgwa e mengwe ya setšo ya ditšhaba tša baagišani. O itše: “Xo wêna xo se kê xwa hwetšwa . . . e a diraxo tša bonoxê le tša maphalô, le e a upaxo ka meupô le boloi. Xo se kê xwa hwetšwa wa malôpô le e a botšišaxo badimo.” Ge Beibele e bolela mabapi le bao ba latelago metlwae ye, e re: “Ba ba diraxo tše byalo Morêna ó bôna e le makxapa.”—Doiteronomio 18:10-12.

Ka gona, ge o nyaka go ekiša metlwae ya tikologong ya geno, naganišiša ka dipotšišo tše di latelago: Na motlwae wo o kgothaletša go dumela go meupo? Na o bontšha eka matla a maleatlana a tšhireletšo a ka hwetšwa dilong tšeo di sa phelego? Na e akaretša go foša ka meleko goba go šireletšwa melekong? Na o tla akaretša tiro ya go ikokobeletša moya o mongwe go e na le go ikokobeletša Jehofa goba moemedi wa gagwe yo a kgethilwego e lego Jesu?—Baroma 14:11; Bafilipi 2:9, 10.

Go bohlokwa gore o gane metlwae le ge e le efe yeo e kgothaletšago mekgwa e bjalo. Ka baka la’ng? Moapostola Paulo o ile a budulelwa go ngwala gore: “Le ka se jele ‘tafoleng ya Jehofa’ le tafoleng ya batemona.” O ile a lemoša gore bao ba lekago go kgahliša Modimo le meoya ba tla be ba “dira gore Jehofa a hufege.” (1 Bakorinthe 10:20-22) Jehofa Modimo o nyaka boineelo bjo bo feletšego e bile bo a mo swanela.—Ekisodo 20:4, 5.

Le gona, ela hloko potšišo ye: Na motlwae woo o gatelela taba ya gore motho ga a ikarabele ka ditiro tša gagwe? Ka mohlala, bohlotlolo le thobalano ya pele ga lenyalo di lebelelwa e le tše sa swanelago ditšhabeng tše dintši gomme Beibele le yona ga e di amogele. (1 Bakorinthe 6: 9, 10) Lega go le bjalo, ditšong tše dingwe tša Pacific, mekgwa e bjalo e ka ba e amogelegago ge ngwanenyana a ka bolela gore o ješitšwe (green leafed), * ke gore, o bolela gore o gapeletšegile go robalana ka baka la ge a loilwe.

Lega go le bjalo, Beibele e ruta gore re ikarabela ka ditiro tša rena. (Baroma 14:12; Bagalatia 6:7) Ka mohlala, mosadi wa pele Efa o ile a ikwa a forilwe ke Sathane gore a se kwe Modimo, ka go bolela gore: “Nôxa e mphorile, ka ja.” Lega go le bjalo, Jehofa o ile a bea Efa molato ka baka la ditiro tša gagwe. (Genesi 3:13, 16, 19) Le gona, o bona re ikarabela ka baka la boitshwaro bja rena.—Baheberu 4:13.

O Swanetše go Dira Eng?

Ge e ba o nyaka go kgahla Modimo le go phela ka go dumelelana le melao ya motheo ya Beibele, o swanetše go dira sohle seo o ka se kgonago go itšhireletša kgahlanong le Sathane le batemona ba gagwe. Batho ba dipelo tše di botegago bao ba bego ba dula Efeso lekgolong la pele la nywaga ba beile mohlala o mobotse tabeng ye. Go re ba ikgaoganye le tutuetšo ya meoya e kgopo, ba ile ba kgoboketša dipuku ka moka tšeo ba bego ba e-na le tšona tša malea gomme ba di “fiša pele ga mang le mang.”—Ditiro 19:19.

Pele ba fiša dipuku tšeo, batho ba “ba be ba e-tla gomme ba ipobola le go bega mekgwa ya bona phatlalatša.” (Ditiro 19:18) Ba kgomilwe pelo ke thuto ya Paulo ya mabapi le Kriste, ga se ba tutueletšega feela go fiša dipuku tša bona tša malea. Ba ile ba tutueletšega le go fetoša maikwelo a bona mabapi le mediro ya bona ya setšo.

Ka kgonthe, go lahla mediro ya setšo go ka no se be bonolo. James, yo go boletšwego ka yena pejana, o ile a lebeletšana le tlhohlo ye. O ile a thoma go ithuta Beibele le Dihlatse tša Jehofa gomme o be a thabela seo a bego a ithuta sona. Lega go le bjalo, o ile a tšwela pele a diriša rarafono. Ge a be a hlahloba maikwelo a gagwe mabapi le mediro ye, o ile a lemoga gore o be a dumela dikholofetšo tša Jehofa tša bokamoso eupša o be a nagana gore o be a sa swanetše go ithekga ka mediro ya setšo bakeng sa tšhireletšego.

Ke’ng seo se thušitšego James go fetoša pono ya gagwe? O re: “Ke ile ka rapela Jehofa gore a ntšhireletše le gore a nthuše gore ke mmote. Ka nako e swanago, ke ile ka tlogela mediro ya setšo.” Na o ile a gobatšwa? James o re: “Le gatee. Seo se ilego sa direga ke gore ke ile ka ithuta go bota Jehofa. Ke bone kamoo Jehofa a ka bago mogwera wa kgaufsi ka gona.” Ge e le gabotse, nywageng e šupa e fetilego, James o hlanketše bjalo ka modiredi wa nako e tletšego, a thuša ba bangwe go ithuta seo Beibele e se rutago.

Ke ka baka la’ng o sa latele mohlala wa James? Hlahloba metlwae yeo e kgomaretšwego setšhabeng sa geno gomme o diriše ‘matla a gago a tlhaologanyo’ go bona ge e ba e dumelelana le ‘thato ya Modimo.’ (Baroma 12:1, 2) Ka gona, e-ba le sebete sa go ikgaoganya le mediro ya ditumela-khwele. Ge o dira bjalo, o tla ba le kholofelo ya gore Jehofa o tla go “amogela” gomme a go šireletša. (2 Bakorinthe 6:16-18) Go swana le James, o tla bona therešo ya Beibele ya kholofetšo ya Modimo e rego: “’Ina la Morêna ké sebô se sethata; moloki ó thšabêla xôna a pholoxa.”—Diema 18:10.

[Mongwalo wa tlase]

[Seswantšho go letlakala 19]

“Korokoro”

[Mothopo]

Courtesy of Dr. Bakshi Jehangir

[Seswantšho go letlakala 19]

Ngwanenyana o olela marathana a dijo e le gore a se ke a loiwa ka ona