Dipapišo tša ka Beibeleng​—Na o a di Kwešiša?

SESWANTŠHO se ka bolela go gontši, eupša ka dinako tše dingwe lentšu le tee goba a mabedi feela a ka nea tlhaloso e kwagalago. Beibele e diriša dipapišo tše dintši, goba dipolelwana tšeo di dirago gore mmadi a be le seswantšho-kgopolo sa seo se bolelwago. * Ka mohlala, Jesu o dirišitše dipapišo tšeo di ka fetago 50 tše fapa-fapanego polelong yeo a e neilego—Thuto ya Thabeng.

Ke ka baka la’ng o swanetše go kgahlegela dipapišo tše? Lebaka le lengwe ke gore, ge o di kwešiša di tla dira gore mmalo wa gago wa Beibele e be o ipiletšago, tša godiša kwešišo le tebogo ya gago bakeng sa Lentšu la Modimo. Go oketša moo, ge e ba o lemoga gore seo o se balago ke papišo gomme o kwešiša seo e se bolelago ka mo go nepagetšego, o tla kwešiša molaetša wa Beibele gakaone. Ge e le gabotse, go palelwa ke go lemoga papišo ya ka Beibeleng go ka se feleletše ka go gakanega feela, eupša gape go ka lebiša diphethong tše di fošagetšego.

Go Kwešiša Dipapišo

Papišo e bapetša kgopolo e itšego le e nngwe. Kgopolo yeo e bapišwago e bitšwa taba, gomme kgopolo yeo go bapetšwago le yona ke, seswantšho. Seo se bapetšwago magareng ga dikgopolo tše pedi ke go swana ga tšona. Ka gona, gore o kgone go kwešiša papišo gabotse o swanetše go lemoga le go kwešiša karolo e nngwe le e nngwe ya dikarolo tše tše tharo.

Ka dinako tše dingwe, go lemoga taba le seswantšho sa yona go ka ba bonolo. Eupša go ka ba le dikgonagalo tše mmalwa mabapi le go swana ga tšona. Ke’ng seo se ka go thušago go ba le kwešišo e nepagetšego ka go swana moo? Gantši karabo e ka hwetšwa tabeng e dikologilego. *

Ka mohlala, Jesu o boditše phuthego ya Sarede gore: “Ruri ge e ba o sa tsoge, ke tla tla bjalo ka lehodu.” Jesu mo o be a bapetša go tla gagwe (taba) le go tla ga lehodu (seswantšho). Eupša dikgopolo di be di swana ka’ng? Taba e dikologilego e a re thuša. Jesu o tšwetše pele ka gore: “O ka se ke wa tseba nako yeo ke tla tlago  go wena ka yona.” (Kutollo 3:3) Ka gona, se se bapišwago ga se morero wa go tla gagwe. O be a sa re gore o be a tlo utswa selo le ge e le sefe. Go e na le moo, morero wa papišo ya gagwe e be e le go bontšha gore go tla ga gagwe e be e tla ba mo go sa letelwago.

Lega go le bjalo, ka dinako tše dingwe papišo yeo e tšwelelago karolong e nngwe ya Beibele e ka go thuša gore o kwešiše papišo e swanago karolong e nngwe. Ka mohlala, moapostola Paulo o dirišitše papišo e swanago le yeo Jesu a e dirišitšego, ge a ngwala gore: “Le tseba gabotse-botse gore letšatši la Jehofa le tla go swana tlwa le lehodu la bošego.” (1 Bathesalonika 5:2) Taba e dikologilego mantšu a Paulo ga e bontšhe go swana ga dikgopolo ka mo go kwagalago. Lega go le bjalo, go bapetša papišo ye le yeo Jesu a e dirišitšego go Kutollo 3:3 go ka go thuša go kwešiša go swana ga dikgopolo. Papišo ye ruri ke kgopotšo e matla ya gore Bakriste ba therešo ba swanetše go dula ba phafogile moyeng!

Dipapišo Tšeo di re Rutago ka Modimo

Ga go motho yoo a ka kgonago go kwešiša dibopego ka moka tša semelo le matla a Ramatla-ohle. Mehleng ya bogologolo, Kgoši Dafida o ile a ngwala gore Jehofa ke “yo moxolo a se naxo moka-Yêna.” (Psalme 145:3) Ka morago ga go ela hloko mediro e mengwe ya Modimo ya tlholo, Jobo o goeleditše ka gore: “Ši-dio, ké yôna merumô ya ’tsela tša xaxwe, ’me tše rena re di kwaxo ke tša xo sêba-sêbya fêla. Modumô wa matla a xaxwe, wôna ké mang a kaxo o kwa?”—Jobo 26:14

Lega go le bjalo, Beibele e diriša dipapišo go go thuša go kwešiša dika tše di kgahlišago tša Modimo wa rena wa legodimong, ka tsela e lekanyeditšwego. Jehofa o hlaloswa e le Kgoši, Mohlami wa Molao, Moahlodi le Mogale—motho yoo ka ntle le pelaelo o swanetšego go mo hlompha. Gape o swantšhwa le Modiši, Moeletši, Morutiši, Tate, Mofodiši le Mophološi—motho yo o ka mo ratago. (Psalme 16:7; 23:1; 32:8; 71:17; 89:26; 103:3; 106:21; Jesaya 33:22; 42:13; Johane 6:45) E nngwe le e nngwe ya ditlhaloso tše tše bonolo di re gopotša diswantšho tše dintši tšeo di ipiletšago tšeo di nago le seo di se hlalosago ka yena. Dipapišo tše bjalo di fetiša kgopolo go feta mantšu a mantši.

Beibele gape e swantšha Jehofa le dilo tšeo di sa phelego. O hlalositšwe e le “Lefsika la Isiraele,” e le “lefsika” e bile e le “sebo.” (2 Samuele 23:3 PK; Psalme 18:2 PK; Doiteronomio 32:4) Ke go swana gofe mo go lego gona? Bjalo ka ge lefsika le legolo le dula le tiile, le sa šišinyege, Jehofa Modimo le yena a ka ba Mothopo wa gago o tiilego wa tšhireletšo.

Puku ya Psalme e tletše ka dipapišo tšeo di hlalosago dikarolo tše di fapa-fapanego tša semelo sa Jehofa. Ka mohlala, Psalme 84:11 e bolela ka Jehofa e le “letšatši le kôtsê” ka baka la gore ke Mothopo wa seetša, bophelo, matla le tšhireletšo. Ka lehlakoreng le lengwe, Psalme 121:5 e re “Morêna ké Yêna moriti wa xaxo. Ó ’tsoxong la xaxo le letona.” Bjalo ka ge lefelo leo le nago le moriti le ka go šireletša letšatšing leo le fišago tšhiri-tšhiri, Jehofa a ka šireletša bahlanka ba gagwe phišong ya mathata, a ba nea tšhireletšo yeo e swanago le moriti ka tlase ga “seatla” sa gagwe goba “’phêxô” tša gagwe.—Jesaya 51:16; Psalme 17:8; 36:7.

Dipapišo Tšeo di Hlalosago Jesu

Beibele e bolela leboelela gore Jesu ke “Morwa wa Modimo.” (Johane 1:34; 3:16-18) Batho  ba bangwe bao e sego Bakriste ba thatafalelwa ke go kwešiša se, ka ge Modimo a se na mosadi e bile e se motho wa nama. Go molaleng gore Modimo ga a tšweletše morwa go swana le batho. Ka gona, polelwana ye ke papišo. E hlametšwe go thuša mmadi go kwešiša gore tswalano ya Jesu le Modimo e swana le yeo morwa a nago le yona le tatagwe. Papišo ye gape e gatelela gore Jesu o amogetše bophelo bja gagwe go tšwa go Jehofa, o bopilwe ke Yena. Ka tsela e swanago, motho wa pele, Adama, le yena o bitšwa “morwa wa Modimo.”—Luka 3:38.

Jesu o dirišitše dipapišo go hlalosa ditema tše di fapa-fapanego tšeo a di kgathago go phethagatšweng ga morero wa Modimo. Ka mohlala, o itše: “Ke nna morara wa kgonthe, gomme Tate ke molemi.” (Johane 15:1, 4) Ke moka Jesu o bapišitše barutiwa ba gagwe le makala a morara. (Johane 15:1, 4) Papišo ye e re ruta dintlha dife tše bohlokwa? Gore a dule a phela e bile a tšweletša dienywa, makala a morara a swanetše go dula a kgomaretše koteng. Ka tsela e swanago, barutiwa ba Kriste ba swanetše go dula ba le boteeng le yena. Jesu o itše: “Ka ntle le nna le ka se kgone go dira selo le gatee.” (Johane 15:5) Bjalo ka ge molemi a letetše gore morara o tšweletše dienywa, Jehofa o letetše gore bao ba lego boteeng le Kriste ba tšweletše dienywa tša moya.—Johane 15:8.

Kgonthišiša Kamoo Dikgopolo di Swanago ka Gona

Re ka fihlelela diphetho tše di fošagetšego ge re ka fo bala papišo re sa kwešiše kamoo dikgopolo di swanago ka gona. Ka mohlala, ela hloko mantšu a hwetšagalago go Baroma 12:20, a rego: “Ge e ba lenaba la gago le swerwe ke tlala, le fepe; ge e ba le nyorilwe, le nee sa go nwa; gobane ka go dira se o tla kgobelela magala a mollo hlogong ya lona.” Na go kgobelela magala hlogong ya motho go bontšha go itefeletša? Aowa, e sego ge re kwešiša kamoo dikgopolo di swanago ka gona. Papišo ye e tšerwe mokgweng wa bogologolo wa go tološa ditšhipi. Borale bo be bo fišwa godimo ga magala, gomme magala a mangwe a be a kgobelelwa godimo ga borale. Se se be se dira gore borale bo tologe gomme se dira le gore tšhipi e tšwe ditšhila. Ka tsela e swanago, go bontšha botho go ka letefatša boemo bja motho bja kgopolo le go mo dira gore a bonagatše dika tše dibotse.

Kwešišo e nepagetšego ya dipapišo ga e edišetše seetša megopolong ya rena feela, eupša gape e kgoma dipelo tša rena. Re bona bogolo bja sebe ge se bapetšwa le sekoloto. (Luka 11:4) Eupša ge Jehofa a re lebalela le go phumola sekoloto seo re bego re swanetše go se lefelela, re ikwa re imologile gakaakang! Ge re botšwa gore o ‘khupetša’ dibe tša rena e bile o a di ‘phumola,’ re a kgodišega gore a ka se re gopotše dibe tše bjalo nakong e tlago. (Psalme 32:1, 2; Ditiro 3:19) Le gona, ke mo go homotšago gakaakang go tseba gore Jehofa a ka dira gore dibe tšeo di hubetšego wa letsoku di šweufale wa leswela!—Jesaya 1:18.

Dipapišo tše e fo ba tše mmalwa tša dipapišo tše makgolo tšeo di hwetšagalago ka Lentšung la Modimo, Beibele. Ka gona ge o bala Beibele ya gago, ela hloko dipapišo. Iphe nako ya go kgonthišiša kamoo dikgopolo di swanago ka gona gomme o naganišiše ka tšona. Go dira bjalo go tla humiša kwešišo ya gago ya Mangwalo le go dira gore o a tšeele godimo kudu.

[Mengwalo ya tlase]

[Lepokisi go letlakala 13]

Kamoo Dipapišo di Thušago ka Gona

Dipapišo di re thuša ka ditsela tše dintši. Selo se thata se ka bapetšwa le selo se itšego seo se ka kwešišwago gabonolo. Go ka dirišwa dipapišo tše fetago e tee go hlalosa dibopego tše fapa-fapanego tša taba e itšego. Dikgopolo tše bohlokwa di ka gatelelwa ka dipapišo goba tša dirwa gore e be tše di ipiletšago.

[Lepokisi go letlakala 14]

Ela Hloko Dikarolo tše di Fapa-fapanego

PAPIŠO: “Lena le letswai la lefase.” (Mateo 5:13)

TABA: Lena (Barutiwa ba Jesu)

SESWANTŠHO: Letswai

GO SWANA GA DIKGOPOLO TABENG YE: Go phološa

THUTO: Barutiwa ba be ba e-na le molaetša wo o bego o ka phološa maphelo a batho ba bantši.

[Ntlhakgolo go letlakala 15]

“Morêna ké modiši wa-ka; nka se hlôke selô.”​—PSALME 23:1