Batamela Kgaufsi le Modimo

Modimo yo a Ratago Toka

Baheberu 10:26-31

NA O kile wa swarwa ka tsela e se nago toka goba e sehlogo, mohlomongwe o swarwa bjalo ke motho yo go bonalago a atlega go direng bjalo e bile a sa itshole? Go hloka toka mo go šoro ke e nngwe ya dilo tšeo go lego thata kudu go lebeletšana le tšona, kudu-kudu ge e ba bohloko bjoo o bo bakelwa ke motho yoo o bego o letetše gore a go rate le go go hlokomela. O ka botšiša gore, ‘Ke ka baka la’ng Modimo a dumelela dilo tše bjalo gore di direge?’ * Therešo ke gore Jehofa Modimo o hloile mehuta ka moka ya go hloka toka. Lentšu la gagwe, Beibele, le re kgonthišetša gore o tla otla bao ba dirago dibe gomme ba sa itshole. Anke re ahla-ahleng mantšu a moapostola Paulo ao a ngwadilwego go Baheberu 10:26-31.

Paulo o ngwala gore: “Ge re tlwaela go dira sebe ka boomo ka morago ga ge re hweditše tsebo e nepagetšego ya therešo, gona ga go sa na sehlabelo se sengwe bakeng sa dibe.” (Temana 26) Batho bao ba dirago dibe ka boomo ba na le molato o mogolo. Ka baka la’ng? Sa pele, ga ba dire sebe se itšego nakong ya ge ba fokola—phošo yeo ka moka re e dirago ka dinako tše dingwe ka gobane re sa phethagala. Ba tlwaela go dira dibe. Sa bobedi, dibe tša bona ke tša ka boomo. Go etša ge Beibele ya Sepedi e bolela, ba “senya ka boomo.” Dipelo tša bona di tletše bobe bjoo bo tsemilego medu. Sa boraro, ga ba dire dibe ka gobane ba se na tsebo. Ba na le “tsebo e nepagetšego ya therešo” ya mabapi le thato ya Modimo le ditsela tša gagwe.

Modimo o lebelela badiradibe ba sa itsholego le ba sehlogo bjang? Paulo o re: “Ga go sa na sehlabelo se sengwe bakeng sa dibe.” Sehlabelo sa Kriste—mpho ya Modimo go batho—se lefelela dibe tšeo re di dirago ka baka la go se phethagale. (1 Johane 2:1, 2) Eupša bao ba tlwaelago go dira dibe ba sa itshole ba bontšha gore ga ba tšee mpho ye e le e bohlokwa. Mahlong a Modimo ba ‘gataketše Morwa wa Modimo gomme ba tšea madi a Jesu e le a mohola o monyenyane.’ (Temana 29) Ka tsela ya bona ya bophelo, ba bontšha gore ba nyatša Jesu gomme ba tšea madi a gagwe ‘e se selo,’ e le a mohola o monyenyane go swana le a motho le ge e le ofe yo a sego a phethagala. (Beibele ya Sepedi) Batho ba bjalo ba se nago tebogo ba ka se holwe ke sehlabelo sa Kriste.

Ke’ng seo batho ba kgopo ba ka se letelago? Modimo wa toka o holofeditše gore: “Tefetšo ke ya-ka; ke tla lefetša.” (Temana 30) Anke bohle bao ba ikemišeditšego go dira dibe ka go kweša ba bangwe bohloko ba lemoge se: Ga go motho yo a ka robago melao ya Modimo e lokilego gomme a se otlwe. Gantši batho ba kgopo ba ba le ditla-morago tše bohloko ka baka la ditsela tša bona tše kgopo. (Bagalatia 6:7) Gaešita le ge ba sa be le tšona, ba tla ema pele ga Modimo kgaufsinyane ge a e-tla go fediša mehuta ka moka ya go hloka toka mo lefaseng. (Diema 2:21, 22) Paulo o lemoša gore: “Ke mo go boifišago go wela ka diatleng tša Modimo yo a phelago.”—Temana 31.

Go ithuta gore Jehofa ga a lokafatše go dira dibe ka boomo go a homotša e bile go a kgothatša, kudu-kudu go bao ba ilego ba kgopišwa ke motho yo a sa itsholego. Ka kgodišego re ka tlogelela Modimo, yo a hloilego mehuta ka moka ya go hloka toka, gore e be yena a lefetšago ka mo go feletšego.

[Mongwalo wa tlase]