Lengwalo le le Tšwago Nicaragua

“Ge o Fihla Nokeng ya Coco, o Fapogele ka go le Letona”

“O TLA swanelwa ke go hwetša koloi yeo e gogago ka maotwana a mane, motšhene wa go goga dikoloi ge di tantšwe ke leraga le peterole e oketšegilego. O itokišetše go lebeletšana le leraga leo le tlago go khupetša maotwana a koloi go fihla bogareng bja ona. Ge o fihla nokeng ya Coco, o fapogele ka go le letona.”

Ka kgonthe mantšu a a moromiwa-gotee le nna ga se a ka a nthuša gore ke be le boikholofelo. Lega go le bjalo, mesong ya Labobedi ke ile ka thoma leeto la-ka la go ya kopanong ya Bokriste kua Wamblán, e lego motsana o monyenyane wo o lego ka leboa la Nicaragua.

Ke ile ka tloga mesong, ke otlela lori ya-ka ya kgale eupša yeo e sa dutšego e le matla mmileng wa lephefo o otlologilego woo o tlogago Alaska o fihlago Chile. Ge ke fihla Jinotega, ke ile ka sepela ka tsela ya lekgwara yeo batho ba lefelong leo ba e bitšago feo goba e mpe. Pele ga ge ke tloga toropong ye ke ile ka bona mabenkele a mabedi, le lengwe le bitšwa Miracle of God gomme le lengwe le bitšwa The Resurrection.

Tsela ye e be e raragane gomme e namelela le go theoga. Ke be ke otlela ka go nanya ge ke feta mekoting. Leetong la-ka le ile ka feta letsha le legolo leo le lego moeding o lego godimo ga thaba yeo e khupeditšwego ke maru. Ge ke be ke le ka gare ga kgodi, ke ile ka bona dihlare di apešitšwe ke matšoba le dimela tšeo e kego ke maudu tšeo di bitšwago Spanish moss.

Ge ke fihla moo tsela e fapogago kudu ke ile ka nyaka go thula pese yeo e bego e sepela gare ga tsela e ntebile. E be e ntšha muši o moso gomme maotwana a yona a be a gata mafsika gomme a thanya ge e feta. Mo Nicaragua, o ka kgona go bona maina ao baotledi ba bogale ba bitšwago ka ona a bjalo ka Mofenyi, Phepheng, Tlhware goba Motsomi a ngwadilwe gabotse mafasetereng a dipese.

Ge e e-ba mosegare wa sekgalela ke be ke šetše ke feta Molaleng wa Pantasma. Ge ke le moo ke ile ka feta ntlo yeo e agilwego ka mapolanka yeo jarata ya yona e bego e fsietšwe. Go be go e-na le mokgalabje yo a dutšego pankeng, mpša e robetše ka fase ga sehlare gomme dipholo tše pedi tšeo di pannwego di tlemeletšwe karikaneng yeo e nago le maotwana ao a dirilwego ka mapolanka. Torotswaneng e nngwe ke ile ka bona sehlopha se segolo sa bana ba e-tšwa sekolong. Ba be ba tletše setarateng se segolo ka diaparo tša bona tša sekolo tša mmala o talalerata go swana le lephoto la lewatle leo le kgaphetšago meetse lebopong.

Letšatši le be le fiša kudu ge ke be ke lebile motseng wa Wiwilí gomme ke thoma go bona noka ya Coco. Noka yeo e be e le e kgolo kudu ka ge meetse a yona a dula a elela. Ke ile ka gopola ditaelo tšeo ke di neilwego, ka fapogela ka go le letona gomme ka tšea tsela e kotsi ya dikhilomithara tše 37 yeo e yago Wamblán.

Ge ke be ke feta mafsikeng, mekoting le mebotwaneng, lori ya-ka e ile ya phonkgela ka mekoting e seswai goba e senyane yeo e nago le meetse. Ge ke dutše ke leka go efoga diforo lerageng leo le omilego, ke ile ka tupiša lerole. Ee, “ke jele lerole,” bjalo ka ge batho ba lefelong leo ba realo. Mafelelong, leeto la-ka le ile  la fela gomme ke be ke kgona go bona motse wa Wamblán woo ke bego ke e-ya go ona, o le moriting o moso moeding o tletšego dihlare.

Letšatšing le latelago, go be go bonala batho ka moka ba tsogile ka 4:30 a.m. Ka ge ke tsošitšwe ke go lla ga mekoko ka go se kgaotše e sa le mesong kudu, ke ile ka tšwela ka ntle gomme ka sepela go theoga le setarata se segolo. Moya o lego thabeng o be o tletše monkgo wa borotho bjo bo dirilwego ka mae le lefela bjo bo bitšwago tortilla bo le ka diontong tšeo di dirilwego ka mafsika.

Mabotong a mmalwa go be go e-na le diswantšho tša mebalabala tša paradeise tšeo di thadilwego ke mothadi wa diswantšho wa lefelong leo. Maswao ao a lego mabenkeleng a manyenyane ao a bitšwago di-pulperías a be a bapatša dinwa-maphodi tše fapa-fapanego. Dipampiri tša tsebišo di be di gopotša batho ka dikholofetšo tšeo di dirilwego ke mebušo e meraro e fetilego. Go be go e-na le mekutwana yeo e agilwego godimo ga lebato la khonkhoriti ka masenke a phadimago.

Ke be ke dumediša batho pele, ke diriša tumedišo ya Nicaragua e rego, Adiós. Batho ba be ba myemyela gomme ba bolela le nna ka borutho. Re ile ra swanelwa ke go bolelela godimo ka baka la lešata leo le bego le bakwa ke dipere le dimeila ge di feta.

Ka Labohlano thapama, malapa a ile a fihla bakeng sa kopano ya matšatši a mabedi. Ba tlile ka maoto, ka dipere le dilori. Bašemanyana le banenyana ba bangwe ba be ba sepetše leeto la diiri tše tshela ba rwele diramphašane tša polasitiki. Ba tshetše dinoka mafelong a kotsi ao a nago le dithuthupi tšeo di lego ka tlase ga mmu gomme ka sebete ba feta meetseng ao a nago le diphedi tše nwago madi a batho tšeo di bitšwago di-leeche. Ba bangwe bao ba tšwago metseng ya kgole ba tlile le dijo tše dinyenyane—reisi yeo e nokilwego ka makhura a kolobe. Bohle ba be ba tlišitšwe ke’ng?

Ba be ba tlile go tlo matlafatša kholofelo ya bona ya bokamoso bjo bokaone. Ba be tletše go tlo hlalosetšwa Beibele. Ba be ba tlile go tlo kgahliša Modimo.

Letšatši la Mokibelo le ile la goroga. Batho ba fetago 300 ba be ba dutše ka tlase ga marulelo a lesenke godimo ga dipanka le ditulo tša polasitiki. Bo-mma ba be ba fepa masea a bona. Dikolobe le dikgogo di be di lla ka polaseng yeo e lego kgaufsi.

Thempheretšha e ile ya phagama gomme go se go ye kae phišo e be e se sa kgotlelelega. Lega go le bjalo, ka kelohloko batheetši ba ile ba theetša keletšo le tlhahlo yeo ba bego ba e newa. Ba be ba phetla mangwalo ge diboledi di be di bala ditemana tša Beibele, ba opela dikopelo tšeo di theilwego Beibeleng gomme ba theetša ka tlhompho ge go be go rapelwa.

Ka morago ga kopano ke ile ka ya go ba bangwe bao ba bego ba tlile kopanong gomme ka bapala le bana papadi ya go kitimišana. Ke moka re ile ra boeletša dintlha tšeo bafsa ba bego ba di ngwadile. Ke ile ka ba bontšha diswantšho tša dinaledi le melalatladi ya dinaledi khomphutheng ya-ka. Bana ba be ba myemyela gomme batswadi ba bona ba be ba thabile.

Go se go ye kae kopano e be e fedile gomme bohle ba be ba swanetše go boela gae. Mesong e latelago ke ile ka boela morago, ke sa dutše ke gopola dinako tše thabišago tšeo ke bilego le tšona gomme pelo ya-ka e tletše lerato bakeng sa bagwera ba-ka ba bafsa. Ke ikemišeditše go ba ekiša le go ithuta go kgotsofalela seo ke nago le sona gaešita le go letela tlhakodišo ya Modimo.

[Diswantšho go letlakala 17]

Malapa a ile a sepela dikhilomithara tše dintši e le gore a tle kopanong kua Wamblán