1, 2. (a) Bahlanka ba Jehofa ba be ba mo rapela kae nakong e fetilego? (b) Jesu o be a ikwa bjang ka tempele ya Jehofa ya Jerusalema? (c) Re tlo ahlaahla’ng sehlogong se?

MEHLENG ya bogologolo, bahlanka ba Modimo ba be ba na le mafelo ao ba rapelago Modimo go ona, gomme le lehono go sa le bjalo. Ka mohlala, go ka direga gore Abele o ile a aga aletare ge a be a neela Jehofa dihlabelo. (Genesi 4:3, 4) Noa, Aborahama, Isaka, Jakobo le Moshe le bona ba ile ba aga dialetare. (Genesi 8:20; 12:7; 26:25; 35:1; Ekisodo 17:15) Jehofa o ile a botša Baisiraele gore ba age taberenakele. (Ekisodo 25:8) Ka morago o ile a ba laela gore ba age tempele. (1 Dikgoši 8:27, 29) Ka morago ga gore batho ba Modimo ba boe bothopša Babilona, ka mehla ba be ba bokana disinagogeng. (Mareka 6:2; Johane 18:20; Ditiro 15:21) Le gona Bakriste ba lekgolong la pele la nywaga ba be ba bokana dintlong tša badumedigotee le bona. (Ditiro 12:12; 1 Bakorinthe 16:19) Lehono, batho ba Jehofa lefaseng ka moka ba bokana Diholong tša Mmušo tše dikete, moo ba ithutago ka Jehofa le go mo rapela.

² Jesu o be a hlompha kudu tempele ya Jehofa yeo e bego e le Jerusalema. Tsela yeo Jesu a bego a rata tempele yeo e ile ya gopotša barutiwa ba gagwe mantšu a mopsalme ao a rego: “Ke jelwe  ke phišego ya ntlo ya gago.” (Psalme 69:9; Johane 2:17) Holo ya Mmušo ga se “ntlo ya Jehofa” ka tsela e swanago le tempele ya Jerusalema. (2 Dikoronika 5:13; 33:4) Eupša re swanetše go hlompha mafelo a rena a borapedi. Sehlogong se, re tlo ahlaahla melao ya motheo ya Beibele yeo e re rutago kamoo re swanetšego go itshwara ka gona ge re le Diholong tša rena tša Mmušo, kamoo re swanetšego go di hlokomela le kamoo re ka thušago go di lefelela. *—Bona mongwalo wa ka tlase.

3-5. Holo ya Mmušo ke’ng, gona re swanetše go ikwa bjang ka diboka tša rena?

³ Holong ya Mmušo ke moo batho ba kopanago gona go tlo rapela Jehofa. Diboka ke mpho e tšwago go Modimo, gomme di re thuša go matlafatša tswalano ya rena le yena. Dibokeng tša rena, mokgatlo wa gagwe o a re kgothatša le go re nea tlhahlo yeo re e hlokago. Ke tokelo e kgolo go laletšwa ke Jehofa le Morwa wa gagwe go tlo jela “tafoleng ya Jehofa” beke e nngwe le e nngwe. (1 Bakorinthe 10:21) Le ka mohla ga se ra swanela go lebala gore taletšo ye e bohlokwa kudu.

⁴ Jehofa o re botša ka mo go kwagalago gore re be gona dibokeng gore re mo rapele le go kgothatšana. (Bala Baheberu 10:24, 25.) Ka ge re hlompha Jehofa, re ka se foše diboka ntle le ge re na le lebaka le le kwagalago la go dira seo. Re bontšha gore re leboga diboka tša rena ge re di lokišeletša le go tšea karolo go tšona.—Psalme 22:22.

⁵ Tsela yeo re itshwarago ka yona ge re le dibokeng le kamoo re hlokomelago Diholo tša rena tša Mmušo e bontšha kamoo re hlomphago Jehofa. Re nyaka gore boitshwaro bja rena bo tumiše leina la Jehofa, leo gantši le ngwalwago leswaong la Holo ya Mmušo.—Bapiša le 1 Dikgoši 8:17.

6. Batho ba bangwe ba boletše’ng ka Diholo tša rena tša Mmušo le ka bao ba tlago dibokeng? (Bona seswantšho seo se lego mathomong a sehlogo.)

⁶ Batho ba bangwe ba a bona ge re hlokomela Diholo tša rena tša Mmušo. Ka mohlala, monna yo mongwe kua Turkey o itše: “Ke kgahlilwe kudu ke bohlweki bjo ke bo bonego Holong ya Mmušo le kamoo dilo di dirwago ka thulaganyo. Batho bao ba bego ba le moo ba be ba apere gabotse, ba myemyela e bile ba ntumediša ka lethabo. Nka se tsoge ke lebetše seo.” Monna yoo o ile a thoma go ba gona dibokeng ka moka gomme go se go ye kae a kolobetšwa. Motseng o mongwe kua Indonesia, bana babo rena ba ile ba laletša baagišani, ramotse le bahlankedi ba bangwe ba mmušo gore ba tlo bona Holo ya bona ya Mmušo e mpsha. Ramotse yoo o ile a kgahlwa kudu ke tsela yeo moago o agilwego ka yona, polane ya wona le jarata e botse. O itše: “Bohlweki bja holo ye bo bontšha gore le tloga le le Bakriste ba therešo.”

7, 8. Re bontšha bjang gore re hlompha Jehofa ge re le Holong ya Mmušo?

⁷ Jehofa ke yena a rego re tle dibokeng, gomme o letetše gore re apare gabotse le go itshwara gabotse ge re le moo. Ka gona re phema go dira dilo ka tsela e feteletšego. Lega go le bjalo, ga re bee melao e thata e bile ga re tlogelele dilo goba ra iketla kudu ge re le dibokeng. Ke therešo gore Jehofa o nyaka gore rena le batho bao re ba laletšago re iketle ge re le Holong ya Mmušo. Eupša ga re nyake go bontšha gore ga re hlomphe diboka ka tsela le ge e le efe. Ke ka baka leo re sa  aparego diaparo tša go hlwa goba tšeo di bontšhago moya wa lefase ge re eya dibokeng, le gona re ba šedi gore re se ke ra ngwalelana melaetša ka diselefouno, ra sebaseba goba ra ja le go nwa nakong ya diboka. Le gona batswadi ba swanetše go ruta bana ba bona gore ba se ke ba kitimakitima goba ba bapala ka Holong ya Mmušo.—Mmoledi 3:1.

⁸ Ge Jesu a be a bona batho ba rekiša dilo ka tempeleng ya Modimo, o ile a galefa gomme a ba raka. (Johane 2:13-17) Diholong tša rena tša Mmušo, re rapela Jehofa le go ithuta ka yena. Ka gona e ka se be mo gobotse go dira kgwebo ge re tlile dibokeng.—Bapiša le Nehemia 13:7, 8.

9, 10. (a) Batho ba Jehofa ba aga Diholo tša Mmušo bjang, gona mafelelo e bile afe? (b) Mokgatlo wa Jehofa o thuša bjang diphuthego tšeo di sa kgonego go ikagela Diholo tša Mmušo?

⁹ Batho ba Jehofa lefaseng ka bophara ba šoma ka thata go aga Diholo tša Mmušo. Dipolane tša diholo tše di thalwa ke baithaopi bao ba sa lefiwego, ba di aga le go di lokiša. Ka baka leo, nywageng e 15 e fetilego, re agile Diholo tša Mmušo tše dibotse tša ka godimo ga tše 28 000 lefaseng ka moka, goba Diholo tša Mmušo tše ka bago tše hlano letšatši le lengwe le lengwe.

¹⁰ Mokgatlo wa Jehofa o diriša meneelo go aga Diholo tše tša Mmušo le go romela baithaopi le ge e le kae moo diholo di nyakegago. Re diriša molao wa motheo wa Beibele wa gore bao ba nago le mo gontši ba thuše bao ba hlaelelwago. (Bala 2 Bakorinthe 8:13-15.) Mafelelo e bile afe? Diphuthego tše dintši tše di diilago di agetšwe Diholo tša Mmušo tše dibotse.

11. Bana babo rena ba bangwe ba re’ng ka Holo ya bona ya Mmušo e mpsha, gona se se dira gore o ikwe bjang?

¹¹ Bana babo rena ba phuthegong e nngwe kua Costa Rica ba ngwadile gore: “Re kwa eka re a lora ge re eme ka pele ga Holo ya rena ya Mmušo! Ga re kgolwe gore re na le holo. Holo ya rena e botse e agilwe ka matšatši a seswai feela! Se se kgonegile ka thušo ya Jehofa le ka dithulaganyo tšeo mokgatlo o ilego wa di dira gotee le thekgo ya bana babo rena ba ba rategago. Lefelo le la borapedi e tloga e le mpho ya bohlokwa, letlotlo leo re le filwego ke Jehofa. Re hloka le mantšu.” Re thaba kudu ge re ekwa bana babo rena le dikgaetšedi ba leboga seo Jehofa a ba diretšego sona. Le gona re thabela gore bana babo rena lefaseng ka moka ba ka ba le Holo ya bona ya Mmušo. Go molaleng gore Jehofa o šegofatša modiro wo wa go aga Diholo tša Mmušo ka gobane gateetee ka morago ga gore di agiwe, batho ba bantši ba thoma go ba gona dibokeng gore ba tle ba ithute ka yena.—Psalme 127:1.

12. O ka thuša bjang go aga Diholo tša Mmušo?

¹² O ka thuša bjang go aga Diholo tša Mmušo? Mohlomongwe o ka ithaopela go thuša ka go aga. Le gona ka moka ga rena re ka ntšha  moneelo bakeng sa go lefelela go agwa ga Diholo tša Mmušo. Ge re dira sohle seo re ka se kgonago go thekga modiro wo, re thabišwa ke go nea, le gona sa bohlokwa kudu ke gore re tumiša Jehofa. Re latela mohlala wa batho ba Modimo ba mehleng ya Beibele bao ba bego ba ntšha meneelo ka pelo ka moka gore go agiwe mafelo a borapedi.—Ekisodo 25:2; 2 Bakorinthe 9:7.

13, 14. Beibele e re thuša bjang go boloka Diholo tša rena tša Mmušo di hlwekile e bile di bogega?

¹³ Jehofa ke Modimo yo a hlwekilego le yo mokgethwa. Ke Modimo wa thulaganyo. Ke ka baka leo re swanetšego go boloka Diholo tša rena tša Mmušo di hlwekile e bile di bogega. (Bala 1 Bakorinthe 14:33, 40.) Le gona e le gore re hlweke le go ba ba bakgethwa go etša Jehofa, ga re boloke feela borapedi bja rena bo hlwekile, tsela ya rena ya go nagana le ditiro tša rena, eupša re dula re hlwekile le mmeleng.—Kutollo 19:8.

¹⁴ Ge re boloka Diholo tša rena tša Mmušo di hlwekile e bile di bogega, ga re be le bothata bja go laletša batho go tla dibokeng. Le gona batho ba tla bona gore re tloga re diriša seo re se rutago ba bangwe mabapi le lefase le lefsa leo le hlwekilego. Ba tla bona gore re rapela Modimo yo mokgethwa le yo a hlwekilego yoo a tlago go fetoša lefase le gore e be paradeise e botse.—Jesaya 6:1-3; Kutollo 11:18.

15, 16. (a) Ke ka baka la’ng go se bonolo go boloka Holo ya gabo rena ya Mmušo e hlwekile? Ke ka baka la’ng re swanetše go e boloka e hlwekile? (b) Lenaneo la go hlwekiša Holo ya gabo lena ya Mmušo le sepela bjang, gona yo mongwe le yo mongwe o na le tokelo efe?

¹⁵ Batho ba na le dipono tše di sa swanego ka bohlweki. Ka baka la’ng? Mohlomongwe ke ka baka la tsela yeo ba godišitšwego ka yona. Le gona, ba bangwe ba dula mo go nago le marole goba moo ditsela tša gona di se nago sekontiri e bile di na le maraga. Ba bangwe ga ba na meetse a lekanego goba dilo tša go hlwekiša. Eupša go sa šetšwe gore re dula kae le gore batho ba moo ba ikwa bjang ka bohlweki, re swanetše go boloka Diholo tša rena tša Mmušo di hlwekile e bile di  bogega. Ke moo re rapelago Jehofa.—Doiteronomio 23:14.

¹⁶ Ge re nyaka gore Holo ya gabo rena ya Mmušo e dule e hlwekile, re swanetše go ba le thulaganyo. Bagolo ba direla phuthego lenaneo la go hlwekiša le go kgonthišetša gore go dula go na le dilo tše di lekanego tša go hlwekiša. Le gona bagolo ba rulaganya modiro woo gore o phethwe gabotse. Dilo tše dingwe di swanetše go hlwekišwa ka mehla ka morago ga diboka, eupša tše dingwe di ka hlwekišwa ka morago ga nako e itšego. Ka moka ga rena re na le tokelo ya go hlwekiša Holo ya gabo rena ya Mmušo.

17, 18. (a) Re ka ithuta’ng tseleng yeo batho ba Jehofa nakong e fetilego ba ilego ba hlokomela tempele? (b) Ke ka baka la’ng re swanetše go hlokomela Holo ya gabo rena ya Mmušo?

¹⁷ Le gona re boloka Holo ya gabo rena ya Mmušo e le boemong bjo bobotse ka go e lokiša ge go na le seo se senyegilego. Bahlanka ba Jehofa ba nakong e fetilego ba ile ba dira sona seo. Ka mohlala, nakong ya pušo ya Kgoši Jehoashe wa Juda, batho ba ile ba ntšha tšhelete ya go lokiša tempele. Kgoši ye e ile ya laela baperisita go diriša tšhelete ye go lokiša tempele gohle moo e bego e senyegile gona. (2 Dikgoši 12:4, 5) Nywaga ya ka godimo ga e 200 ka morago, Kgoši Josia le yena o ile a diriša meneelo yeo e bego e ntšhitšwe tempeleng go e lokiša.—Bala 2 Dikoronika 34:9-11.

¹⁸ Ditho tše dingwe tša Dikomiti tša Makala di lemogile gore batho ba dinageng tšeo ba di hlankelago ga se ba tlwaela go hlokomela meago goba dilo tšeo ba di dirišago. Bothata e ka ba e le gore ke batho ba sego kae dinageng tše bao ba tsebago go dira modiro woo. Goba ba ka ba ba se na tšhelete ya go lokiša dilo tšeo. Eupša ge e ba re sa lokiše Holo ya gabo rena ya Mmušo ge e senyegile, e tla thoma go se sa bogega gomme batho ba tla bona seo. E ka se ba nee bohlatse bjo bobotse. Go e na le moo, ge ka moka ga rena re dira seo re ka se kgonago go hlokomela Holo ya gabo rena ya Mmušo, re tumiša Jehofa e bile ga re senye meneelo yeo bana babo rena ba e ntšhitšego.

19. O tlo dira’ng go bontšha gore o hlompha lefelo leo o rapelago Jehofa go lona?

¹⁹ Holo ya Mmušo ke moago wo o neetšwego go Jehofa. Ga se ya motho le ge e le ofe goba phuthego. Go etša ge re ithutile sehlogong se, melao ya motheo ya Beibele e tla re thuša go ba le pono e nepagetšego ka lefelo leo re rapelago Modimo go lona. Ka ge re hlompha Jehofa, re hlompha diboka tša rena le Holo ya Mmušo. Re thabela go ntšha meneelo e le gore go agwe Diholo tša Mmušo, le gona re šoma ka thata go di hlokomela le go di boloka di hlwekile. Go swana le Jesu, re fišegela lefelo leo re rapelago Jehofa go lona le go le hlompha.—Johane 2:17.